ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ماۋلەن اشىمبايەۆتىڭ قازاقستان ەكونوميكاسىنىڭ دامۋىنا كوڭىلى نەگە تولمايدى؟

24 مامىر 2024 439

قازاقستان ەكونوميكاسى ءالى تاۋ-كەن جانە مۇناي سالاسىنا، شيكىزات باعاسىنا جانە تومەن دەڭگەيدە وڭدەلگەن تاۋارلار ەكسپورتىنا تاۋەلدى. بۇل تۋرالى سەنات ءتوراعاسى ماۋلەن اشىمبايەۆ مالىمدەدى، دەپ حابارلايدى Alash.kz.

سەناتتا «مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ شەڭبەرىندە قازاقستاندا ەكونوميكانىڭ وڭدەۋشى سەكتورىن دامىتۋ» تاقىرىبى بويىنشا پارلامەنتتىك تىڭداۋ ءوتىپ جاتىر.

پالاتا ءتوراعاسىنىڭ ايتۋىنشا، سالادا كادر ماسەلەسى ءالى دە وزەكتى.

ءقازىر وڭدەۋشى سەكتوردا شامامەن 613 مىڭ ادام جۇمىس ىستەيدى (جۇمىسپەن قامتىلعانداردىڭ 6،7%-ى). سوڭعى 10 جىلدا سالاداعى جۇمىسشىلار سانى نەبارى 10% ءوستى. كوپتەگەن باعىت بويىنشا بىلىكتى ماماندار جەتىسپەيدى. ءقازىر ءتيىستى قۇرىلىمدار تاراپىنان شەشىمدەر قابىلدانىپ جاتقانىن بىلەمىز. بۇل جۇمىستى كۇشەيتۋ كەرەك، - دەدى ماۋلەن اشىمبايەۆ.

سونداي-اق ماۋلەن اشىمبايەۆ وڭدەۋشى كاسىپورىندارعا بەرىلەتىن كرەديت پايىزى وتە جوعارى ەكەنىن جانە بۇل سالانىڭ دامۋىنا كەرى اسەر ەتىپ وتىرعانىن اتاپ ءوتتى.

«سالاداعى كوپتەگەن ادامدى تولعاندىراتىن تاعى ءبىر وزەكتى ماسەلەنىڭ ءبىرى – قارجىلاندىرۋعا قول جەتكىزۋ. ءقازىر قارجى نارىعىنداعى كرەديتتەۋ مولشەرلەمەسى 22%-عا دەيىن جەتەدى. بۇل سۋبسيديا بولىنۋىنە قاراماستان وڭدەۋشى سەكتورداعى كاسىپورىنداردىڭ دامۋىنا كەرى اسەر ەتەدى. 2022 جىلدىڭ باسىنان بيىل ساۋىرگە دەيىن بانكتەردىڭ جالپى بيزنەستى نەسيەلەندىرۋدەگى ۇلەسى 51%-دان 43%-عا دەيىن، ال وڭدەۋشى ونەركاسىپتى نەسيەلەۋ 14%-دان 12%-عا دەيىن تومەندەدى»، - دەدى سەنات ءتوراعاسى.

ماۋلەن اشىمبايەۆ قازىرگى قازاقستان ەكونوميكاسىنىڭ دامۋىنا كوڭىلى تولمايتىنىن اشىق ايتتى.

«ەل ەكونوميكاسىنا ءالى دە بولسا تاۋ-كەن جانە مۇناي سالاسىنا، شيكىزات باعاسىنا جانە تومەن دەڭگەيدە وڭدەلگەن تاۋارلار ەكسپورتىنا تاۋەلدى بولىپ وتىرعانى جاسىرىن ەمەس. مەملەكەت باسشىسى وسىعان بايلانىستى الداعى اۋقىمدى مىندەنتتەردى بەلگىلەپ بەردى. سونى ەسكەرىپ، ەكونوميكانىڭ وڭدەۋشى سەكتورىن دامىتۋعا ارنالعان تىڭ جانە ءتيىمدى شەشىمدەر قاجەت دەپ ەسەپتەيمىز. بۇل باعىتتا سەناتورلار ءوز تاراپىنان زاڭنامالىق تۇرعىدان ءتيىستى قولداۋ كورسەتىپ، بەلسەندى جۇمىس ىستەۋگە دايىن»، - دەپ ءسوزىن تۇيىندەدى ول.

بۇل ماقالا تۋرالى نە ويلايسىز؟