ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

كۇندە ۇرادى، باسىمنان تەبەدى: شاعىمدانعان سارباز ارىزى قارالماعان

14 مامىر 2024 2602

"اسكەرگە 6 اي بۇرىن بارعاندار كۇندە ۇرادى، باسىمنان تەبەدى" دەپ ازاتتىققا شاعىمدانعان سارباز ساپارحان قاۋىنبايدىڭ ارىزى بويىنشا قوزعالعان قىلمىستىق ءىس توقتاپ قالدى. بۇل تۋرالى ازاتتىق راديوسى زەرتتەدى.

سارباز ارىزىندا ۇلتتىق ۇلاننىڭ الماتى وبلىسىنداعى №3660 اسكەري بولىمىندە قىزمەت ەتىپ جۇرگەن بىرنەشە ادامدى اتاپ، ولار "اقشا سۇرايدى، باسىمنان ۇرادى، سەيىلگە شىققاندا قالاعان زاتىن الىپ كەلۋدى بۇيىرادى" دەگەن.

تەرگەۋشى ادىلەت ايداربايەۆتىڭ ايتۋىنشا، ساربازدىڭ اسكەردە الىمجەتتىك كورگەنىنە دالەل جوق. 

 "Cارباز قاۋىنباي ارىزىندا كورسەتكەن ادامداردىڭ بارىنەن جاۋاپ الىندى. ءبارى ايىپتى جوققا شىعاردى. ساپارحان قاۋىنبايدىڭ سوزىنە كۋا تابىلعان جوق. بولىمدەگىلەردىڭ ءبارى ونى بىرەۋدىڭ ۇرعانىن كورگەن جوقپىز، بىلمەيمىز دەپ وتىر" دەدى تەرگەۋشى ازاتتىققا.

ساربازدىڭ اكەسى عاني التايەۆ تەرگەۋ بارىسىن باقىلاي الماعانىن ايتتى. اسكەري تەرگەۋ باسقارماسى "بالا كامەلەتكە تولعان" دەپ اكەسىن تەرگەۋدەن شەتتەتكەن. التايەۆ بۇعان نارازى بولعان.

"ادۆوكات جالداۋعا قاراجاتىم بولمادى. مەنى تەرگەۋدەن ادەيى شەتتەتىپ تاستادى. بالانىڭ ءوزى اسكەردە ءجۇر. سول ءۇشىن بۇل ءىستى ەشكىم باقىلاي المادى. بالاما دا، ماعان دا تەرگەۋدىڭ توقتاپ قالعانىن كەش ايتتى. وعان ءتىپتى تەرگەۋ بارىسى باياندالماعان" دەدى التايەۆ ازاتتىققا.

 

 

بۇل ماقالا تۋرالى نە ويلايسىز؟