ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"كرەمل ءبىزدىڭ ەلمەن ءبىلىم الماسۋعا مۇقتاج ەمەس": رەسەيدەن قازۇۋ فيليالىنىڭ اشىلۋى - ءپۋتيننىڭ ساياساتى

17 ماۋسىم 2024 364

"ءپۋتيننىڭ رەسەيى" قازاقستانداعى ستراتەگيالىق ماڭىزدى سالالارعا اۋىز سالۋدا. وسىلاي دەپ دابىل قاققان Fragment "رەسەي مەن قازاقستاننىڭ ءبىلىم جانە عىلىم سالاسىنداعى ىنتىماقتاستىعى بارعان سايىن الاڭداۋشىلىق تۋعىزۋدا" دەيدى.

ارنا ومبىدان ءال-فارابي اتىنداعى قازۇۋ-دىڭ فيليالىنىڭ اشىلعانىنا الاڭداۋشىلىق ءبىلدىرىپتى.

بۇل وقيعا اكادەميالىق بايلانىستاردىڭ كەڭەيۋىن عانا ەمەس، سونىمەن قاتار رەسەيدىڭ قازاقستانداعى ىقپالىنىڭ ارتىپ كەلە جاتقانىن اڭعارتادى دەپ، حابارلايدى Alash.kz سايتى ارنانىڭ اقپاراتىنا سىلتەمە جاساپ.

قازۇۋ قازاقستانداعى ەڭ كونە ءارى ابىرويلى وقۋ ورنى. مۇندا 25 مىڭ ستۋدەنت ءبىلىم الادى. وسىنداي بەدەلدى ۋنيۆەردىڭ ورىس جەرىندە فيليال اشۋى وڭ قادام سياقتى كورىنۋى مۇمكىن. الايدا قازىرگى گەوساياسي جاعدايدى ەسكەرە وتىرىپ، بۇل وقيعانى مۇلدە باسقا قىرىنان قاراستىرۋ قاجەت.

كرەمل، پوستكەڭەستىك كەڭىستىكتە ءوز ىقپالىن كەڭەيتۋگە دەگەن ۇمتىلىسىن ءبىر ساتكە دە دامىلداتقان جوق. ءبىلىم جانە عىلىم سالاسىندا تاجىريبە الماسۋ انشەيىن سىلتاۋ: رەسەيدىڭ قازاقستانداعى ىقپالىن نىعىزداي ءتۇسۋدىڭ امالى. مۇنى قازاقستانداعى ماڭىزدى سفەرالاردى "وتارلاۋ" دەيتىن اۋقىمدى ستراتەگيانىڭ ءبىر بولىگى رەتىندە قاراستىرۋ قاجەت.

Fragment-كە جەتكەن مالىمەت بويىنشا "ءپۋتيننىڭ رەسەيى" ورتا ازياداعى ىقپالىن جوعالتپاۋ ءۇشىن soft power ساياساتىن بەلسەندى پايدالانا باستاعان. ءبىلىم مەن عىلىم سالاسى وسى ساياساتتىڭ نەگىزگى "رىچاگىنىڭ" ءبىرى.

الداعى وقۋ جىلىنان باستاپ رەسەيلىك پروپاگاندا قۇرالدارى "ەكى ەل اراسىناداعى اكامەديالىق الىس-بەرىستەن قازاقستاننىڭ ۇتارى كوپ" دەگەن اگيتاسيانى ۇدەتە باستايدى.

"ءىس جۇزىندە بۇل قازاقستاننىڭ رەسەيدىڭ ءبىلىم جانە عىلىم باعدارلاماسىنا بىرتىندەپ تاۋەلدى بولۋىنا الىپ كەلەدى"، - دەپ پايىمدايدى ارنا ءوز اقپاراتىن.

قازاق ۇلتتىق ۋنيۆەرسيتەتىنىڭ رەسەيلىك سەرىكتەسى – دوستويەۆسكيي اتىنداعى ومبى ۋنيۆەرسيتەتى ءسوزسىز بەدەلدى وقۋ ورنى. الايدا، مۇنداي ىنتىماقتاستىقتىڭ قازىرگى ساياسي شىندىق كونتەكستىندە نەنى بىلدىرەتىنى تۋرالى ويلانۋ كەرەك.

رەسەي ەلىمىزدىڭ ەكونوميكادان باستاپ ءبىلىم بەرۋگە دەيىنگى ستراتەگيالىق ماڭىزدى سالالارىنا دەندەپ ەنىپ جاتىر. كرەمل ءبىزدىڭ ەلمەن ءبىلىم الماسۋعا مۇقتاج ەمەس، ماسكەۋ قازاقستاندىق وسكەلەڭ ۇرپاقتىڭ جۇرەگى مەن ساناسى ءۇشىن كۇرەس جۇرگىزۋدە.

قازاقستاندىق ۋنيۆەرسيتەتتەر مەن عىلىمي ينستيتۋتتار گەوساياسي قۇرالعا اينالماي، تاۋەلسىز وي مەن يننوۆاسيانىڭ تىرەگى بولىپ قالۋى كەرەك. ءپۋتيننىڭ پارانوياسى اسقىنعان شاقتا قازاقستان بارلىق سالادا ءوز تاۋەلسىزدىگى مەن ەگەمەندىگىن قورعاۋعا ءتيىس. رەسەيدىڭ ارباۋىنا تۇسپەۋدىڭ جالعىز جولى وسى.

بۇل ماقالا تۋرالى نە ويلايسىز؟