ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"جايىق سۋىنىڭ دەڭگەيى 10 مەترگە دەيىن كوتەرىلۋى مۇمكىن" - اكىمشىلىك

06 ءساۋىر 2024 527

مامانداردىڭ بولجامى بويىنشا جايىق وزەنىندەگى سۋ دەڭگەيى 10 مەترگە دەيىن كوتەرىلۋى مۇمكىن. نەگىزىنەن العاندا،8،5 مەتردەن جوعارى كورسەتكىش قاتەرلى بولىپ سانالادى، دەپ حابارلايدى Alash.KZ ۇلتتىق پورتالى. 

ءبىز جايىق جانە شاعان وزەندەرىنىڭ قالامەن استاسىپ جاتقان اۋماقتارىنداعى بوگەسىندەردى نىعايتامىز. توپوگرافيالىق ءتۇسىرىلىم جاسالدى، ءبىز بار بوگەتتەردى ءارى نىعايتۋدى كوزدەپ وتىرمىز. بقو تجد-سى سۋدىڭ كوتەرىلۋى مەرزىمى 10-20 ساۋىرگە سايكەس كەلەدى دەپ بولجادى. سۋدىڭ تاسۋى، شامامەن، 15،16،17 ساۋىردە بولادى. وبلىستىڭ 20-دان استام ءىرى كومپانياسى 200-دەن استام ارنايى تەحنيكا ۇسىندى. جۇمىستى جالعاستىرامىز،- دەدى ورال قالاسى اكىمىنىڭ ورىنباسارى جاندوس دۇيسەنعالييەۆ. 

ورايى كەلگەندە ايتا كەتەيىك، بۇگىن زاشاعان كەنتى اۋماعىنداعى ساياجاي تۇرعىندارىن كوشىرۋ جۇمىستارى باستالدى. 

جايىق وزەنىندەگى سۋ دەڭگەيىنىڭ كوتەرىلۋ قاۋپىنە بايلانىستى اتالعان وزەن اڭعارىندا ورنالاسقان ساياجاي تۇرعىندارى الدىن الا ءقاۋىپسىز جەرگە كوشىرىلدى. ۋاقىتشا تۇراتىن ۇيلەرى جوق ادامدار جەدەل-ەۆاكۋاسيالىق پۋنكتتەرگە ورنالاسىپ جاتىر. ولار ىستىق تاماق جانە قاجەتتى گيگيەنالىق قۇرالدارمەن قامتىلادى.

بۇگىن ستەنوۆيك، ۋرالوچكا، دوروجنيك، وتدىح، كوماروۆو، كوسموس ساياجايلارىنان بارلىعى 178 ادام ەۆاكۋاسيالاندى. ولار اقان سەرى 47/1 مەكەنجايى بويىنشا كوپقاباتتى ءۇيدىڭ ءبىرىنشى قاباتىندا جانە «التىن وردا» مادەنيەت ۇيىندەگى ەۆاكۋاسيالىق پۋنكتتەرگە ورنالاستى.

بۇل ماقالا تۋرالى نە ويلايسىز؟