ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

جالعىز قىزىمدى اياۋسىز ءولتىردى: مارقۇمنىڭ اكەسى قوعامنان كومەك سۇرادى

16 مامىر 2024 420

ءوز پاتەرىندە اياۋسىز ولتىرىلگەن دارىگەر قىزدىڭ ءىسى اكەسىنىڭ ايتۋىنشا بۇرمالانىپ كەتۋدىڭ ءسال-اق الدىندا تۇر.

ءمولدىر تۇمانوۆانىڭ اكەسى حالىقتان كومەك سۇرايدى. ول قوعامنان جالعىز قىزىنىڭ ولىمىنە كىنالى ادام قاتاڭ جازاعا تارتىلۋىن باقىلاۋدى ءوتىندى. بۇل تۋرالى Alash.kz nur.kz سايتىنا سىلتەمە جاساپ حابارلادى.

مارقۇمنىڭ اكەسى قىزىلوردالىق قالدىباي توماروۆ اقتوبەدە تۇرعان قىزىمەن سوڭعى رەت تەلەفون ارقىلى سويلەسكەن ءساتىن ەسىنە الدى.

"بۇل جاعداي اقتوبەدە بولدى. قىزىم سول جاقتا 10 جىل وقىدى. مەديسينالىق ۋنيۆەرسيتەتكە مەملەكەتتىك گرانتپەن ءتۇستى. وقۋىن ءبىتىرىپ، سول جاققا جۇمىسقا كىردى. قىزىممەن وقيعا بولعان كۇنى كەشكى ۋاقىتتا سويلەسكەن ەدىم. ساعات 23:30 شاماسىندا حابارلاستىق. قىزىم Toyota Corolla دەگەن كولىگىن ساتقانىن، قىزىلورداعا بيلەت الىپ قويعانىن، ۇيگە قايتاتىنىن ايتتى. "ەرتەڭ كەشكە مەنى پويىزدان كۇتىپ ال" دەپ قوشتاسىپ ەدى. بۇل سوڭعى رەت سويلەسكەنىم ەكەن. ەرتەڭىنە دەنەسىن عانا كوردىم"، - دەدى قالدىباي توماروۆ.

قازا بولعان دارىگەردىڭ تۋىستارىنا قايعىلى حاباردى پوليسيا جەتكىزگەن. دارىگەردىڭ اكەسى قىزىنىڭ باسىنان وتكەن وقيعانى بيشىمبايەۆ ىسىمەن سالىستىردى.

"ەرتەڭىنە نەمەرەلەرىمدى بالاباقشاعا اپارىپ، ءۇيدىڭ تىرلىگىمەن ءجۇردىم. تەلەفونىما حابارلاما كەلدى. الدەكىمنىڭ ءاتى-جونى جازىلعان. "سىزدەر مىنا ادامدى تانيسىزدار ما؟" دەپ جازىلىپ تۇردى. ءبىز ونى تانىمايمىز، تۇسىنگەن جوقپىز. شامالى ۋاقىتتان كەيىن پوليسيا قىزمەتكەرى قوڭىراۋ شالىپ "اقتوبەگە كەلۋىڭىز كەرەك، قىزىڭىز قايتىس بولدى" دەپ حابارلادى. توبەمنەن جاي تۇسكەندەي بولدى. ۋ-شۋ بولدىق. اعايىندار جينالىپ، ەكى كولىكپەن جولعا شىقتىق. تۇندە جەتتىك. ارىپتەستەرى كۇتىپ الدى. بىرگە جۇمىس ىستەگەن ارىپتەستەرى ءمايىتحانادا جاتقان قىزىمدى كورسەتتى. جۇرەگىنىڭ تۇسىندا ساۋ جەر جوق. اياۋسىز پىشاق سالعان. باسىنا دا پىشاق كىرگەن. ۇيگە اكەلگەندە دە دەنەنى اشىپ كوردىم. باسى مەن جۇرەگىنىڭ تۇسىنان ۇرا بەرگەن. ۇيگە ءبىر كۇن قوندىرىپ، جەر قوينىنا تاپسىردىق. بيشىمبايەۆتىڭ ءىسى ويىنشىق بوپ قالادى. ءبىز قان جىلاپ وتىرمىز"، - دەدى اكەسى. 

جالعىز قىزىنان ايىرىلىپ، قارا جامىلعان اكە كوز جاسىنا ەرىك بەردى. ءقازىر مارقۇمنىڭ اناسىنىڭ دا دەنساۋلىعى سىر بەرگەن.

"مەن ءۇشىنشى توپ مۇگەدەگىمىن. 2005 جىلى ينفاركت العانمىن. سودان كەيىن دەنساۋلىق بولماي قالدى. مىنا جاعداي ءبىزدى ەسەڭگىرەتىپ جىبەردى. ءبىر ۇل، ءبىر قىزىم بار-تۇعىن… جالعىز قىزىم… ءقازىر اناسىنىڭ دا دەنساۋلىعى ناشارلاپ كەتتى. وسى ىسكە قوعامنىڭ قاداعالاۋى كۇشەيسە ەكەن. ءوزىم الەۋمەتتىك جەلىدە پاراقشا اشىپ قويدىم. ءوز قولى وزىنە جەتىپ، ەڭبەك ەتىپ جۇرگەن جالعىز قىزىمىزدى اياۋسىز ءولتىردى. وعان قاتاڭ جازا تاعايىندالعانىن تالاپ ەتەمىز. ولارعا تاعايىندالعان جازا دا اياۋسىز بولۋى كەرەك. قوعام بەلسەندىلەرىنەن كومەك سۇرايمىز. جاعدايدىڭ بۇرمالانباۋىن، قاتاڭ جازالاۋىن باقىلاۋعا السا ەكەن"، - دەدى مارقۇمنىڭ اكەسى.

 

بۇل ماقالا تۋرالى نە ويلايسىز؟