ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

Forte Bank قازاقتىڭ ءتىلىن عانا ەمەس تاريحىن دا مەنسىنبەي مە؟

17 مامىر 2024 213

Forte Bank قازاق ءتىلىن عانا ەمەس، قازاق مەدياسى مەن تاريحىن دا مەنسىنبەي مە؟ بۇل تۋرالى 7Kun.kz جازدى.

وتكەن اپتادا Forte Bankء-تىڭ بوس جۇمىس ورنى تۋرالى حابارلاندىرۋىنداعى «قىزمەتكەرگە قازاق ءتىلىن ءبىلۋ ماڭىزدى ەمەس» دەگەن ءسوز كوپشىلىكتىڭ نارازىلىعىن تۋدىرعان ەدى.

Forte Bank بولسا مۇنى جاساندى ينتەللەكتكە جابا سالدى. جاساندى ينتەللەكتەن كەتكەن قاتەلىك دەپ جاۋاپ بەردى.

ارتىنشا Facebook-تە بلوگەرلەردىڭ كومەگىمەن بىرنەشە جازبا جاريالادى. وندا بانكتىڭ مەملەكەتتىك ءتىلدى قولدايتىن بىرنەشە جوبانى قولعا العانى تۋرالى ايتىلعان.

«مىسالى، «Mazmundama» قورىنىڭ ەكى الەمدىك بەستسەللەردى قازاق تىلىنە اۋدارۋىنا تولىق دەمەۋشىلىك ەتەدى. ەسىك قالاسىندا بيىل قازاق مەكتەبىنىڭ قۇرىلىسىن اياقتايدى. ءوز ىشىندە دە بانك مەملەكەتتىك ءتىلدى بيزنەس پروسەستەرگە ءساتتى ەنگىزىپ كەلەدى. قىزمەتكەرلەر انا تىلىمىزدە سويلەيدى»، دەگەندى بىرنەشە بلوگەر سوزبە-سوز قايتالاپ شىقتى.

بىزگە اتىن اتاۋدى قالماعان PR مامانى بۇل وتە ءساتسىز كەيس بولدى، دەيدى.

«بانكتىڭ كەشىرىم سۇراپ، قاتەلىكتىڭ رەتتەلەتىنى تۋرالى ايتقانى دۇرىس بولعانىمەن، اۋديتورياعا اقپاراتتى بلوگەرلەر ارقىلى اقىلى پوستتارمەن جەدەل جەتكىزگىسى كەلگەنى ءساتسىز كەيس بولدى. جاعدايدى رەتتەۋگە اسىققان بانكتىڭ ماسەلەنى شەشۋدى اگەنتتىككە نەمەسە جەكەلەگەن ادامدارعا بەرىپ، پروسەسستى سوڭىنا دەيىن قاداعالاماعانى، اقىلى پوست جازعان بلوگەرلەردى بىلمەيتىنى، ءقازاقتىلدى ب ا ق، مەديامەن بايلانىسى جوعى بايقالادى. قازىرگى كەزدە قازاق اۋديتورياسىندا اقىلى پوستتارعا قارسىلىق بار. اقىلى پوستاردىڭ جارناما رەتىندە بەلگىلەنبەۋى، اقپاراتتىڭ بۇرمالانۋى، مانيپۋلاسياعا جول بەرۋ كوپ ادامنىڭ نارازىلىعىن تۋدىرادى. بۇل جەردە بانكتى اقتاپ الۋعا ەمەس، اقپارات تاراتۋعا كوبىرەك سۇيەنۋ كەرەك ەدى. مۇمكىن بانكتىڭ جوسپارى سولاي بولعان شىعار. ءبىراق، كورىنىس باسقاشا بولدى»، دەيدى مامان.

اقىلى پوستار سەرياسىنان كەيىن بۇل تاقىرىپ ۋشىعىپ، كەيبىر ادامدار بانكتەگى شوتتارىن جابا باستادى. ولاردىڭ قاتارىندا QAZBILIM GROUP كومپانياسىنىڭ باسقارما ءتوراعاسى اياتجان احمەتجان دا بار. «جاس الاش» گازەتىنە بەرگەن اقپاراتىنا قاراعاندا ءبىلىم بەرۋ باعىتىنداعى كومپانيالار توبىنىڭ قۇرامىنا كىرەتىن 8 كومپانيا Forte-دەگى شوتىن جاپقان. ولاردىڭ قىزمەتكەرلەرى اي سايىن Forte-دەن 250 ملن تەڭگە جالاقى الىپ وتىرعان.

بانك قانشا اقتالىپ، اقپارات تاراتىپ باققانىمەن قازاق تىلىنە قۇرمەتى تۋرالى ەكس-قىزمەتكەرلەرى دە ايتىپ ۇلگەردى. بۇل تۋرالى janabastau.kz سايتى جازدى.

«Forte Bank – ءتىڭ ماسەلەسىنە بارلىعى جازىپ جاتىر. Forte Bank ء-تىڭ ءوزى دە جازىپ جاتىر. روبوتتىڭ جىبەرگەن قاتەلىگى ەمەس. وسىدان 3-4 جىل بۇرىن Forte Bank -تە جۇمىس جاساعان كەزدە بۇل سيستەما ءالى دە اكتۋالدى ەدى. ورىس ءتىلىن بىلەتىندەرگە نەمەسە ورىس ءتىلىن مىندەتتى تۇردە بىلەتىندەرگە جۇمىستا كوتەرىلۋگە جوعارى مۇمكىندىك جاسالاتىن دا، قازاق تىلىنە ايتارلىقتاي كوڭىل بولىنبەيتىن. قاتتى كوڭىل بولىنبەيتىن، سول سەبەپتى ايتىلىپ جاتقان سوڭعى پوستتارىنداعى قازاق ءتىلىن قۇرمەتتەۋگە بايلانىستى، روبوتتىڭ جىبەرگەن قاتەلىگىنە بايلانىستى ونىڭ ءبارى وتىرىك اڭگىمە»، – دەيدى بانكتىڭ بۇرىنعى قىزمەتكەرى ماعجان ىسقاقوۆ.

بانكتەگى ءتىل ماسەلەسى، جىبەرىلگەن اعاتتىقتى اقتاپ الۋ وپەراسياسى ءساتسىز بولعانىن بايقايمىز. داۋلى تاقىرىپتان بانكتى 9 مامىر مەرەكەسى، ەرتەڭىندە بيشىمبايەۆقا شىققان ۇكىم قۇتقاردى. اۋديتوريانىڭ نازارى قوس تاقىرىپقا اۋىپ كەتتى. الايدا تاقىرىپتىڭ باسى اشىق. (جالپى قازاق ءتىلى ماسەلەسى تەك Forte-دە عانا ەمەس، بارلىق بانكتەردە بارىن ايتۋىمىز كەرەك). سوندىقتان ءبىز ماسەلەگە تەرەڭىرەك ءۇڭىلىپ، وقىرمانعا شىنايى جاعدايدى جەتكىزۋ ءۇشىن Forte-گە ساۋالحات جولداعان ەدىك. الايدا بانكتىڭ PR-ديرەكتورى اسەل تىنىشبەكوۆا، 6 سۇراققا التى اۋىز دا جاۋاپ بەرمەستەن بۇعان دەيىنگى مالىمدەمەسىن قايتا جولداپ، «بولشە كوممەنتارييەۆ نەت» ءبىر اۋىز ءسوز جولداپتى. بۇل جاۋاپتى دا جاساندى ينتەللەكت جولداعان شىعار دەپ تۇيدىك. وسىلايشا تىلگە قىرىن قاراعان بانك، ءقازاقتىلدى باق-قا دا باسقاشا قاراپ وتىر.

ءتىل عانا ەمەس، تاريحتى دا سىيلامايدى

Forteء-نىڭ يەسى وليگارح بولات وتەمۇراتوۆ ەكەنى بەلگىلى. تانىستىرىپ، بيزنەسىن سانامالاۋدىڭ ءوزى ارتىق. Forbes باستاپ، باسقالارى قوستاپ، كۇن سايىن جازىپ جاتىر. ءبىز وتەمۇراتوۆتىڭ يەلىگىندەگى تاعى ءبىر نىسان – Narxoz University تۋرالى ايتا كەتكىمىز كەلەدى.

بۇگىن سەناتور دارحان ءقىدىرالى دەپۋتاتتىق ساۋال جولداپ، ت.رىسقۇلوۆتىڭ اتىن نارحوز ۋنيۆەرسيتەتىنە قايتارۋ تۋرالى ماسەلە كوتەردى.

«2000 جىلى شەرحان مۇرتازا، ءابىش كەكىلبايەۆ، كامال سمايىلوۆ سياقتى ەل اعالارىنىڭ باستاماسىمەن حالىق شارۋاشىلىعى ينستيتۋتى ۇلتتىق ەكونوميكالىق ۋنيۆەرسيتەتكە اينالىپ، وعان رىسقۇلوۆتىڭ ەسىمى بەرىلگەن ەدى. كەيىن وقۋ ورنى جەكەمەنشىككە ءوتىپ، كەڭەستىك «نارحوز» اتاۋىن تاڭداپ، ت.رىسقۇلوۆتىڭ اتىن الىپ تاستادى. ۇكىمەت قاۋلىسىنا سايكەس بەرىلگەن اتاۋدى جوو قانداي باسقارۋ تۇرىنە جاتاتىنىنا قاراماي، اۋىستىرۋعا قۇقى جوق. تاياۋدا ءبىر توپ زيالى قاۋىم وكىلدەرى تۇراردىڭ اتىن ۋنيۆەرسيتەتكە قايتارۋ كەرەك دەپ حات جازعان ەكەن. سوندىقتان الاش ارىسى تىنىشبايەۆتىڭ ەسىمى لوگيستيكا جانە كولىك اكادەمياسىنا قايتا بەرىلگەنى سياقتى، بۇل ماسەلە دە وڭ شەشىمىن تابادى دەپ سەنەمىز»، دەدى سەناتور.

2016 جىلى مەكەمەنشىككە ءوتىپ، ۇكىمەت قاۋلىسىمەن بەرىلگەنىنە قاراماستان ت.رىسقۇلوۆتىڭ اتىنان باستاپ، باس عيمارات الدىنداعى ەسكەرتكىشى دە جاسىرىن الىنىپ تاستالعان. ۋنيۆەرسيتەت سايتىنداعى تاريحىنان ت.رىسقۇلوۆقا قاتىستى دەرەكتىڭ ءبارىن جويعان. ءسويتىپ تاريحقا بالتا شاۋىپ وتىر. زيالى قاۋىم بۇل ماسەلەنى بۇعان دەيىن دە بىرنەشە رەت كوتەرگەن. «ەگەمەن قازاقستان» باستاپ، كولەمدى ماقالالار جازدى. الايدا وتەمۇراتوۆ باستاعان يەلەرى ءۇنسىز. سوندا بۇلار Forteء-سى، Narxoz-ى بار، قازاق ءتىلىن عانا ەمەس، قازاق مەدياسى مەن تاريحىن دا مەنسىنبەي مە؟

Forte Bank-كە مۇندا ايتىلعان ماسەلەلەردى ساۋال دەپ ساناپ، جاۋاپ بەرۋىن سۇرايمىز. قازاق تىلىنە دە، مەدياسىنا دا، تاريحىنا دا جاناشىر بولۋى مۇمكىن عوي. بىزگە تەك اقپارات جەتپەي جاتقان بولار… ايتپاقشى جاقىندا GPT4-4o شىقتى. قازاقشاسى وتە جاقسى. ەگەر ءقازاقتىلدى مامان بولماسا، جۇگىنۋگە بولادى. «بولشە كوممەنتارييەۆ نەت» دەگەنگە قاراعاندا جان-جاقتى جاۋاپ بەرەدى.

بۇل ماقالا تۋرالى نە ويلايسىز؟