قازاقستاننىڭ سىبايلاس جەمقورلىققا قارسى ءىس-قيمىل اگەنتتىگى جەرگىلىكتى باسپا ءسوز قۇرالدارى ەلدىڭ بۇرىنعى پرەزيدەنتى نۇرسۇلتان نازاربايەۆتىڭ ءىنىسى بولات نازاربايەۆتىڭ ۇلى دەپ اتايتىن ەربول نازاربايەۆتىڭ قىزمەتتەن بوساتىلعانىن حابارلادى.
"جەلىدە تاراعان ۆيدەوعا بايلانىستى جەمقورلىققا قارسى قىزمەت بىلاي دەپ حابارلايدى: 2022 جىلعى قاڭتاردىڭ 26-كۇنى اگەنتتىك ءتوراعاسىنىڭ بۇيرىعىمەن ە.نازاربايەۆ اگەنتتىكتىڭ ارنايى دەپارتامەنتى جەتەكشىسىنىڭ ورىنباسارى قىزمەتىنەن بوساتىلدى" دەپ جازىلعان قازاقستاننىڭ سىبايلاس جەمقورلىققا قارسى ءىس-قيمىل اگەنتتىگى تاراتقان اقپاراتتا.
بۇعان قوسا اگەنتتىك ەربول نازاربايەۆتىڭ 14 ساۋىردە جەمقورلىققا قارسى قىزمەت ورگانىنان قىزمەتتەن الىنعانىن ايتادى.
جاقىندا الەۋمەتتىك جەلىلەردە تاراعان اقپاراتتا 2021 جىلدىڭ اياعىندا پوليسيا قىزمەتكەرلەرى تەرەزەسىن كۇڭگىرتتەپ العان قىمبات كولىكتى توقتاتقاندا رولدە "بولات نازاربايەۆتىڭ تۋىسى" وتىرعانى ايتىلعان ەدى.
سىبايلاس جەمقورلىققا قارسى ءىس-قيمىل اگەنتتىگىنىڭ ءۇشىنشى دەپارتامەنتى جەتەكشىسىنىڭ ورىنباسارى قىزمەتىنە ەربول نازاربايەۆتىڭ تاعايىندالعانى جايلى حابار 2020 جىلعى قاراشادا تاراعان. ول كەزدە جەمقورلىققا قارسى قىزمەت بۇل اقپاراتقا بايلانىستى ەشقانداي تۇسىنىكتەمە بەرمەگەن ەدى.
بيىل قاڭتار وقيعالارى كەزىندە 81 جاستاعى نۇرسۇلتان نازاربايەۆ ەلدەگى ىقپالدى ورگان – قاۋىپسىزدىك كەڭەسىنىڭ باسشىسى قىزمەتىنەن كەتتى. ول حالىققا جاساعان ۆيدەوۇندەۋىندە ءوزىن "قاراپايىم زەينەتكەرمىن" دەپ اتاعان. نازاربايەۆتان كەيىن ونىڭ جاقىن-تۋىستارى دا قىزمەتىنەن ايرىلدى. بەيرەسمي اقپاراتتا ەكس-پرەزيدەنتتىڭ ءىنىسى بولات نازاربايەۆتىڭ 6 قاڭتاردا قازاق-قىرعىز شەكاراسىنان وتكەنى، كەيىن قىرعىزستاننان دۋبايعا ۇشىپ كەتكەنى ايتىلادى.
