جۇڭگو سەيسەنبى كۇنى «چانچجەن-6B» (Long March-6س) موديفيكاسيالى زىمىران تاسىعىشىن العاش رەت ۇشىردى. ول عارىشقا ءتورت جەر سەرىگىن الىپ شىقتى. بۇل تۋرالى WeChat الەۋمەتتىك جەلىسىندە جۇڭگو اەروعارىشتىق عىلىمي-تەحنيكالىق كورپوراسياسىنىڭ (CASC) پاراقشاسىندا ايتىلدى، دەپ حابارلايدى Alash.KZ ۇلتتىق پورتالى.
زىمىران تاسىعىش سەيسەنبى كۇنى بەيجىڭ ۋاقىتىمەن ساعات 11:21-دە جۇڭگو سولتۇستىگىنىڭ شانسي پروۆينسياسىنداعى تايۋان سپۋتنيكتىك ۇشىرۋ ورتالىعىنان Neptune-01 جانە Smart-1C جەرسەرىكتەرىن، سونداي-اق كەڭ جولاقتى وپتيكالىق جەرسەرىكتى جانە جوعارى اجىراتىمدىلىقتاعى بەينەسپۋتنيكتى جوسپارلانعان وربيتاعا الىپ شىقتى.
ەكى ساتىلى زىمىران تاسىعىشتىڭ ديامەترى 3،35 مەتر، ونى سۇيىق وتتەگى مەن كەروسينمەن جۇمىس ىستەيتىن ءۇش قوزعالتقىش باسقارادى.
جالپى ۇشىپ كوتەرىلۋ سالماعى 215 توننا بولاتىن زىمىران 500 شاقىرىم بيىكتىكتەگى گەوستاسيونارلىق وتپەلى وربيتاسىنا جالپى سالماعى شامامەن 2،4 توننا عارىش اپپاراتىن شىعارۋعا قابىلەتتى.
جاڭا زىمىراننىڭ زەرتتەۋلەرى مەن ازىرلەنۋلەرى 2020 جىلدىڭ باسىندا باستالدى. بۇل مودەل نەگىزىنەن شاعىن جانە ورتا سپۋتنيكتەردى وربيتاعا اپاراتىن كوممەرسيالىق عارىش كاسىپورىندارىندا قولدانىلادى.
بۇگىندە ەلدە Long March سەريالى زىمىرانداردىڭ 20-دان استام ءتۇرى جاسالىپ، ۇشىرىلدى.
Long March زىمىراندارى – جۇڭگو عارىشتىق باعدارلامالارىنىڭ نەگىزى. بۇل Long March تاسىمالداۋشىسىنىڭ 520-شى ۇشىرۋى.
