ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ەڭبەگىمدى قازاققا دالەلدەي المادىم، ونىڭ قاسىندا قىرعىزدار اتاق بەردى - وپەرا ءانشىسى

30 مامىر 2024 1609

بەلگىلى وپەرا ءانشىسى مايرا مۇحامەد قىزى حالقىنا رەنىشىن ءبىلدىردى، دەپ حابارلايدى Alash.kz ۇلتتىق پورتالى "ايقىن" گازەتىنە سىلتەمە جاساپ.

ونەر يەسى قىرعىز رەسپۋبليكاسى ۇلتتىق كونسەرۆاتورياسىنىڭ “قۇرمەتتى پروفەسسورى” اتاعىنا يە بولعان. 

«قىرعىز رەسپۋبليكاسى مادەنيەت مينيسترلىگىنىڭ ۇيىمداستىرۋىمەن ەلارالىق فورۋم الەمنىڭ 52 ەلىنەن كەلگەن قوناقتاردى بەي-جاي قالدىرمادى. بۇل كەزدەسۋ مۋزىكا سالاسىندا سەنساسيا بولدى. قىرعىزستان ۇلتتىق كونسەرۆاتوريا رەكتورى ءارى حالىق ءارتيسى كومپوزيتور مۇراتبەك بەگالييەۆ مىرزانىڭ الەمدىك ارەناداعى بەدەلى مەن شاقىرۋىنىڭ ارقاسىندا ۇمتىلماس تاريحي كەشتەر ءوتىپ جاتىر»، – دەيدى ونەر يەسى.

 كەزىندە شەتەلدەن شاقىرتۋ السا دا، ءوز ەلىندە قالۋدى ءجون كورگەنىن ايتادى.

«مەن استانا شابىت اكادەمياسىندا بەس جىل ۆوكالدان ساباق بەرىپ مەنىڭ شاكىرتتەرىم حالىقارالىق جۇلدەلەر الىپ جەڭىسپەن ورالعاندا ەڭبەگىمدى ەشكىم باعالاعان ەمەس. سونداعى العان جالاقى 17 000 تەڭگە. كۇلكىم كەلەدى ويلاسام. قايران ۋاقىت پەن سارقىلعان قۋاتىڭ. ال قىرعىز باۋىرلار قىرعىزستان ۇلتتىق كونسەرۆاتوريانىڭ پروفەسسور اتاعىن باياعىدا بەرىپ قويعان ماعان. ال بىزدەگى اتاق جايلى ويلاۋدىڭ ءوزى جانىڭا باتادى. حالىق ءارتىسى اتاعى جاڭعىرعان بىلتىرعى ماراپاتتا ماعان نەگە بەرىلمەگەنىن ايتپاي-اق قويايىن. ەڭبەگىمدى قازاققا دالەلدەي الماي، باعالاتا الماي جارتى عاسىر ءومىر ءوتىپ بارادى. «ۋ ۆاس ۆسە ۆپەرەدي» دەيتىندەرگە ايتارىم، اتاڭنىڭ باسى! ...ءبارىن ايت تا ءبىرىن ايت، لاريسا گەرگييەۆامەن 30 جىلدان سوڭ كەزدەسكەن بۇل كەش تالاي وتكەندى ەسكە سالدى. 1995 جىلى حالىقارالىق ريمسكيي-كورساكوۆ كونكۋرسىنا قاتىسقان كەزىمدە لاريسا اپامنىڭ «ماريينسكيي تەاترعا قالساڭىزشى، ۆالەريي گەرگييەۆ جاڭا ديرەكتور بولدى. تالانتتى جاس انشىلەردى قولدايدى» دەگەن ۇسىنىسىنا ورىسشا بىلمەگەنىم ءۇشىن جۇرەكسىنىپ، راقمەتىمدى ايتىپ ەلگە ورالعان بولاتىنمىن. كەشە اپام سونى ايتىپ، «ال ەندى نە بولدى، سەن سول كەزدە مەنى تىڭداعانىڭدا وسى كۇنى قاي جەردە جۇرەر ەدىڭ؟» دەگەندە، جاستىق شاقتا ىستەگەن قاتەمدى ەندى ءتۇسىندىم، «ەتو سۋدبا، ماەسترو» دەگەننەن باسقا ءسوز تاپپادىم. ءيا، تاعدىر ءوز قولىڭدا. «قاسىڭدا دۇرىس جول سىلتەپ، اقىل ايتاتىن ۇستازىڭ بولسىن» دەگىم كەلەدى جاستارعا!» – دەيدى وپەرا ءانشىسى.

بۇل ماقالا تۋرالى نە ويلايسىز؟