ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

دزيۋدودان توپ جارعان قازاق قىزى جۇلدىزدى جەڭىسىن اتا-اناسىنا ارنادى

11 مامىر 2024 1021

عاليا تىنبايەۆا دزيۋدودان استاناداعى Grand Slam تۋرنيرىندە توپ جاردى. سپورت ساڭلاعى بۇگىنگى جارىستى دا قورىتىندىلاپ، قولداۋ كورسەتكەن جاندار مەن جاقىندارىنا شەكسىز العىسىن ءبىلدىردى، دەپ جازادى Alash.KZ ۇلتتىق پورتالى  Olympic.kz-كە سىلتەمە كورسەتە وتىرىپ. 

"وسى جارىستان مەدال الايىنشى دەپ تىلەدىم. كوبىرەك دۇعا ەتتىم. قازاقستاندا ءوتىپ جاتقان سوڭ، فينالعا شىعىپ، التىن السام دەپ ارماندادىم. ءبارى ءساتتى اياقتالدى.

بۇگىنگى قارسىلاستارىمنىڭ ءبارى دە مىقتى. ال فينالداعى قارسىلاسىم سابينا گيليازوۆانى ەرەكشە اتاپ وتكىم كەلەدى. تاشكەنتتەگى تۋرنيردە دە سول قىزدان جەڭىلدىم. ەكەۋمىز ءوزارا بىرنەشە رەت كەزدەستىك. بۇگىن، مىنە، جەڭىس ماعان بۇيىردى.

ماعان قولداۋ بىلدىرگەن جانكۇيەرلەرگە، ماعان كومەك قولىن سوزعان بارلىق جانعا راحمەت ايتامىن.

بۇگىنگى جەڭىسىمدى اتا-اناما ارنايمىن. قيىندىقتا دا، قۋانىشتا دا قاسىمدا بولعان سولار. ەندى الەم چەمپيوناتىنا دايىندالىپ، سول جاقتا دا جاقسى ناتيجە كورسەتۋگە تىرىسامىن"، - دەدى تىنبايەۆا. 

ەسكە سالا كەتەيىك، عاليا تىنبايەۆا فينالدا سابينا گيليازوۆانى (رەسەي) جەڭىپ، قازاق قىزدارى اراسىندا تۇڭعىش رەت Grand Slam جەڭىمپازى اتاندى. 

بۇل ماقالا تۋرالى نە ويلايسىز؟