ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

دەپۋتات ۆيسە-پرەمەر رومان سكليار مەن وزگە شەنەۋنىكتەردى جازالاۋ كەرەگىن ايتتى

06 ءساۋىر 2024 526

ءماجىلىس دەپۋتاتى امانجول ءالتاي ەل اۋماعىنا جايىلعان سۋ تاسقىنىنا قاتىستى قاتەلىك جىبەرگەن شەنەۋنىكتەر جازالاپ، قىزمەتىنەن الاستاۋ كەرەگىن ايتتى. الدىمەن ءبىرىنشى ۆيسە-پرەمەر رومان سكلياردى ءسوز قىلدى، دەپ حابارلايدى Alash.KZ ۇلتتىق پورتالى. 


«ەلدى دە، وزگەنى دە مەزى قىلعان رومان سكليار سەكىلدى باياعىدان كەلە جاتقانداردى ورنىنان الاستايتىن ۋاقىت كەلدى. جالپى، سۋ تاسقىنى كەزىندە اقيقاتتىڭ ءوزى بەتىن اشىپ بەرگەندەي، جەرگىلىكتى بيلىك وكىلدەرى مەن ۇكىمەتتىڭ اراسىندا بايلانىس جوق ەكەنىن بايقادىق. سونىمەن قاتار بىزدەگى مينيسترلىكتەردىڭ اراسىندا دا تىعىز ارىپتەستىك ورناماعان»، - دەيدى دەپۋتات.

دەپۋتات مۇنداي اپاتتى جاعدايلار جانە تاسقىنمەن كۇرەسۋدە توتەنشە جاعداي مينيسترلىگى، سۋ مينيسترلىگى، اۋىل شارۋاشىلىعى مينيسترلىگى سەكىلدى مەملەكەتتىك ورگاندار بىر-بىرىمەن كەلىسە وتىرىپ، كۇش بىرىكتىرىپ جۇمىس ىستەۋ كەرەك دەپ سانايتىنىن جەتكىزدى.

«وكىنىشكە قاراي، بىزدە ونداي جۇيە قالىپتاسپاعان. كەڭەس ۇكىمەتى كەزىندەگىنىڭ ءبارىن جامانداي بەرمەۋىمىز كەرەك. ويتكەنى سول تۇستا اسىرەسە، گيدراتسيا سالاسىندا مىقتى ماماندار بولدى. ناقتى جۇيە بولدى. كوكتەمگى سۋ تاسقىنا ءبىر جىل بۇرىن كۇز ايىنان بەرى دايىندىق شارالارى جۇيەلى جۇرگىزىلدى. قازىرگى كەزدە ەشتەڭەگە جاۋاپ بەرگىمىز كەلمەيدى. قىس كەلىپ قاردىڭ استىندا قالساق تا، ەشكىم جاۋاپسىز. كوكتەم كەلىپ، سۋ اپاتى بولسا دا ەشكىم جاۋاپ بەرۋگە قۇلىقسىز. تابيعاتتىڭ توسىن جاعدايى دەپ قۇتىلىپ كەتەدى. بۇلاي اۋزىمىزدى قۇرعاق شوپپەن ءسۇرتىپ وتىرا بەرگەنىمىز جارامايدى»، - دەيدى امانجول ءالتاي.

 

بۇل ماقالا تۋرالى نە ويلايسىز؟