ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"چەرچەسوۆ رەسەيدە كەرەك بولماي قالعان مامان": قازاقستان قۇراماسىنىڭ باس باپكەرىنە سىن كوپ

04 ماۋسىم 2024 625

رەسەيدىڭ 60 جاستاعى فۋتبول مامانى ستانيسلاۆ چەرچەسوۆ قازاقستان قۇراماسىنىڭ باس باپكەرى بولىپ تاعايىندالدى. چەرچەسوۆتىڭ جالاقىسى جايلى تاراعان ينسايت اقپارات جۇرت نارازىلىعىنا تۇرتكى بولىپ، ماماننىڭ بىلىكتىلىگىنە قاتىستى دا پىكىرتالاس كۇشەيدى دەپ حابارلايدى Alash.kz.

بۇل قارسىلىققا نە سەبەپ؟ چەرچەسوۆتىڭ مۇمكىندىكتەرى قانداي؟ "ازاتتىق" وسى ساۋالدارعا جاۋاپ ىزدەپ كورىپتى.

جالاقى اينالاسىنداعى داۋ

3 ماۋسىمدا قازاقستان فۋتبول فەدەراسياسى (قفف) ستانيسلاۆ چەرچەسوۆپەن كەلىسىم-شارتقا قول قويعانىن رەسمي مالىمدەدى. ال قۇرامانى وسىعان دەيىن جاتتىقتىرعان تاعى ءبىر رەسەيلىك مامان ماگومەد ادييەۆ پەن قفف "ەكى جاقتى كەلىسىممەن" جۇمىستى اياقتاعان. ءبىراق قفف سايتىنداعى اقپاراتتا چەرچەسوۆپەن قانشا جىلعا كەلىسىم-شارتقا قول قويىلعانى، جالاقىسى جايلى اقپارات جوق.

وتكەن اپتادا قازاقستاندىق باسىلىمداردا "چەرچەسوۆ قازاقستان قۇراماسىن جاتتىقتىرادى جانە جىلىنا 1،2 ملن ەۋرو (581 ملن 750 مىڭ تەڭگە) جالاقى الادى" دەگەن اقپارات تاراعان ەدى. وسىدان سوڭ جەلى قولدانۋشىلارىنىڭ ءبىر بولىگى چەرچەسوۆتىڭ جالاقىسىنىڭ كوپ ەكەنىن ايتىپ، سىنعا العان.

جەلىدە قارسىلىق كۇشەيگەن تۇستا قفف چەرچەسوۆتىڭ "جالاقىسى تۋرالى اقپارات اسىرا كورسەتىلگەن جانە شىنايىلىققا سايكەس كەلمەيدى"، "جالاقىسى بيۋدجەت تاراپىنان قارجىلاندىرمايدى" دەپ مالىمدەدى. بۇعان قوسا، فەدەراسيا كەلىسىم-شارتتىڭ قۇپيالىعىنا بايلانىستى "جالاقى كولەمى جاريا ەتىلمەيتىنىن" دە حابارلادى.

ال رەسەيلىك جانە قازاقستاندىق سپورت سايتتارى چەرچەسوۆ قازاقستانمەن 2+1 جۇيەسىمەن كەلىسىم-شارتقا قول قويىلعانىن جازدى. ياعني، چەرچەسوۆ قازاقستان قۇراماسىن ەكى جىل جاتتىقتىرادى، ەگەر جاقسى ناتيجە كورسەتسە، تاعى ءبىر جىل جۇمىس ىستەيدى. رەسەيلىك مامان قازاقستان قۇراماسىن بيىل كۇزدە باستالاتىن ۇلتتار ليگاسىنا دايىندايدى. ودان سوڭ 2026 جىلعى الەم چەمپيوناتىنا ىرىكتەۋ ءتۋرنيرىن وتكىزۋى مۇمكىن.

فۋتبول كوممەنتاتورى، "ءبىرىنشى بول" سپورت پودكاستىنىڭ جۇرگىزۋشىسى ولجاس بايبوسىنوۆ "جالاقى تۋرالى اقپارات حالىقتىڭ شامىنا تيگەنىن" ايتادى.

- قازاقستاندا 1،2 ملن ەۋرو ايلىق الۋ مۇمكىن بە دەگەن سۇراق تۋىندايدى. شالعايداعى اۋىلدا جاتقان حالىق مۇنداي ايلىقتى ۇستاپ كورمەگەن دە. جالپى چەرچەسوۆتىڭ وسىنشاما ايلىق الادى دەگەنى ناقتى اقپارات ەمەس، ءبىراق ءبارىبىر وسىنداي اقپارات حالىقتى اشۋلاندىرادى. قارسىلىقتىڭ ءبىر سەبەبى – وسى، – دەيدى ول.

ال قازاقستاندىق فۋتبول ءجۋرناليسى، بۇرىن قفف-دا باسپا ءسوز حاتشى بولعان ەربول كايروۆ "قالاي بولعاندا دا قفف باپكەردىڭ جالاقىسىن دەمەۋشىلەردىڭ اقشاسىنا، FIFA مەن UEFA-دان بولىنەتىن قارجىدان تولەيتىنىن" ايتادى.

قازاقستان قۇراماسىنىڭ ويىندارىنان حابار تاراتىپ جۇرگەن سپورت ءجۋرناليسى بەك تولەۋ "چەرچەسوۆ تومەن جالاقىعا كەلە قويمايتىن مامان" دەپ سانايدى. ول "باپكەردىڭ جالاقىسى بيۋدجەتتەن تولەنسە جاريالانۋى ءتيىس بولادى، ءبىراق قفف باپكەردىڭ جالاقىسىن بيۋدجەتتەن تولەمەيدى، مۇنداي كەزدە ولارعا ەشكىم ەشتەڭە ايتا المايدى" دەيدى.

چەرچەسوۆتىڭ مۇمكىندىگى قانداي؟

چەرچەسوۆ سوۆەت وداعى كەزىندە فۋتبولشى بولعان، كەيىن باپكەرلىككە اۋىسقان. جاتتىقتىرۋشى كارەراسىن اۆستريا كلۋبتارىندا باستاپ، كەيىن ماسكەۋدىڭ "سپارتاك"، "دينامو" كوماندالارىن جاتتىقتىردى. ال 2018 جىلى رەسەيدە وتكەن الەم چەمپيوناتىندا رەسەي قۇراماسىن شيرەك فينالعا شىعارعان. الەم كۋبوگىندا ساۋد ارابياسى، ەگيپەتتى، يسپانيانى جەڭىپ، شيرەك فينالدا حورۆاتيادان پەنالتيدەن جەڭىلگەن ەدى. فۋتبول كوممەنتاتورى ولجاس بايبوسىنوۆ "چەرچەسوۆتىڭ جانكۇيەر ەسىندە قالعان جالعىز جەتىستىگى وسى الەم كۋبوگىنىڭ شيرەك فينالى" دەپ سانايدى.

- چەرچەسوۆ رەسەيدە كەرەك بولماي قالعان مامان. ءبىراق كەيىنگى جىلدارى رەسەيدە ەشقانداي جۇمىس ىستەپ جاتقان جوق. ونى جۇمىسقا شاقىرمايدى. نەگە ءبىز سۇرانىسقا يە بولماي قالعان ادامدى الىپ كەلە بەرەمىز؟ "ۇلتتىق قۇراما دەڭگەيىندە جۇمىس ىستەيتىن باسقا دا ماماندار جوق پا؟ ەۋروپادان نەگە الىپ كەلمەيدى؟" دەگەن ساۋال تۋىندايدى. ويتكەنى ءبىز ەرتە مە، كەش پە ەۋروپالىق فۋتبول ويناۋعا كوشۋىمىز كەرەك. قاشانعى كەڭەس داۋىرىندە قالعان فۋتبولدى ويناي بەرەمىز؟ – دەيدى بايبوسىنوۆ.

ەربول كايروۆ تا قازاقستان رەسەيدەن باپكەر شاقىرۋدى قىسقارتىپ، ەۋروپالىق ماماندارعا كوڭىل ءبولۋ كەرەك دەپ ەسەپتەيدى.

- ەۋروپادان، گەرمانيادان مىقتى باپكەرلەر اكەلۋگە بولادى. سەبەبى سوندا عانا ءبىز فۋتبول مەنتاليتەتىمىزدى وزگەرتەمىز، فۋتبول جۇيەمىز باسقاشا جۇمىس ىستەي باستايدى، - دەيدى ول.

ال بەك تولەۋ "جۇمىسسىز جۇرگەن رەسەيلىك مامانداردىڭ قازاقستانعا كەلۋى تەندەنسياعا اينالىپ بارا جاتقانىن جانكۇيەرلەر نارازى" دەپ ەسەپتەيدى.

- "قايرات" فۋتبول كلۋبىنا رەسەيلىك الەكساندر كەرجاكوۆ، "اقتوبەگە" رەسەيلىك دميتريي پارفەنوۆ كەلدى. ەندى مىنە، چەرچەسوۆ تاعايىندالدى. وسىنىڭ بارىنە جانكۇيەرلەردى ەكىۇداي كۇيدە قالدىرىپ جاتىر، - دەيدى ول.

چەرچەسوۆتىڭ ءوزى قازاقستان قۇراماسىنا باس باپكەر بولىپ تاعايىندالعانىنا قاتىستى رەسمي پىكىر بىلدىرگەن جوق. ول باستاعان قازاقستان قۇراماسى قىركۇيەكتە ۇلتتار ليگاسى جارىسىن باستايدى. قازاقستان ۆ ديۆيزونىناندا نورۆەگيا، اۆستريا جانە سلوۆەنيامەن وينايدى. فۋتبول كوممەنتاتورى ولجاس بايبوسىنوۆ بۇل تۋرنير چەرچەسوۆ ءۇشىن ۇلكەن سىناق بولادى دەپ سانايدى.

- قۇراما ۇلتتار ليگاسىندا كوپ جەڭىلسە، چەرچەسوۆ سىننىڭ استىندا قالادى. بۇل سىندى كوتەرە الا ما، الدا قفف نە شەشەدى؟ ونى ۋاقىت كورسەتەدى، - دەيدى ول.

 

بۇل ماقالا تۋرالى نە ويلايسىز؟