قۋاندىق بيشىمبايەۆتىڭ ءىسى بويىنشا ءوتىپ جاتقان سوت وتىرىسىندا باستى ايىپتالۋشى رەتىندە ىسكە قاتىستى ءوز نۇسقاسىن ايتتى.
بيشىمبايەۆتىڭ سوزىنشە، سالتانات قازاقستاندا تانىمال وتباسىلى اداممەن كەزدەسكەنىن مويىنداعان.
"سول كۇنى كەشكە ول ماعان مويىندادى. مەن ودان نەگە بۇلاي جۇيكەسى سىر بەرىپ جۇرگەنىن سۇرادىم. ودان ءتۇسىندىرىپ بەرۋىن سۇرادىم. تويدان كەيىن 3-4 كۇن وتكەن ەدى. ول مەنىڭ كابينەتىمدە ءبىر ادامنىڭ سۋرەتى تۇرعانىن ايتتى. سۋرەتتە مەن ونىمەن بىرگە (نۇكەنوۆا ايتىپ وتىرعان اداممەن بىرگە - ەسك.) تۇسكەنمىن. ول ءبىر كەزدەرى سول كىسىنىڭ اشىناسى بولعانىن ايتتى. مەن ونىمەن تانىسپىن. ارينە، بۇل اقپارات مەنى ەسەڭگىرەتىپ تاستادى.
ودان 20 جاستاي ۇلكەن، 4 بالاسى بار، قازاقستاندا كادىمگىدەي تانىمال ادام. تەك ەسىمىن ايتايىن، ونىڭ ەسىمى - رايىمبەك.
مەن رەنجىدىم، ول ادامدى بىلەمىن. جۇمىس بويىنشا ءبىر كەزدەرى كەزدەسكەنبىز. ورتاق تانىسىمىز دا كوپ. بىزدە بىر-بىرىمىزگە ءبارىن اشىق ايتاتىن ۋاقىت بولعان كەزدە ولاي ىستەمەگەنىنە رەنجىدىم. ودان نەگە ايتپاعانىن سۇرادىم. ول "بۇل ءبىزدىڭ قارىم-قاتىناسىمىزعا اسەر ەتەدى" دەپ قورىققانىن جەتكىزدى"، - دەدى بيشىمبايەۆ.
سونىمەن قاتار، بۇرىن دا سوتتى بولعان ەكس-مينيستر وزگە دە ادامداردىڭ ەسىمدەرىن اتادى. ونىڭ سوزىنشە، سالتانات وتباسىلى ادامدارمەن كەزدەسكەن.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
بۇعان دەيىن بيشىمبايەۆ سالتانات نۇكەنوۆاعا پورنوگرافيالىق ۆيدەولاردى كورسەتىپ، ۆيدەوداعى سەن ەمەس پە دەپ سۇراپ، قىسىم كورسەتكەنى ايتىلعان بولاتىن.
«ماعان تەلەگرام-ارناعا سىلتەمە كەلىپ، «مىنا ۆيدەونى اشساڭىز ايەلىڭىزگە ۇقسايتىن ادامدى كورەسىز» دەپ جازىلىپ تۇردى. بۇل تۇندە بولعان جاعداي. مەن تاڭعالىپ، اقتارىپ، ەروتيكالىق ۆيدەونى كوردىم. ۆيدەوداعى قىز قاتتى ۇقسايدى. ءتۇرى كورىنبەيدى، ءبىراق قاتتى ۇقسايدى. مەن سالتاناتقا ۆيدەونى كورسەتىپ «كەشىرشى، نەگە ماعان مىنانى جىبەرىپ جاتىر؟» دەپ سۇرادىم»، - دەيدى قۋاندىق بيشىمبايەۆ.
بيشىمبايەۆ سالتاناتتان ۆيدەوداعى كىم ەكەنىن ءتۇسىندىرۋدى سۇراعان. ونىڭ سوزىنشە، بۇل وقيعا ولار ۇيلەنگەننەن كەيىن 10 كۇننەن سوڭ بولىپتى.
«وتباسىلىق ءومىرىمىز وسىلاي باستالدى. ول ۆيدەوداعى ول ەمەس ەكەنىن ايتقانىنا سەنگەنىم تۇسىنىكتى»، - دەيدى بيشىمبايەۆ.
