بۇگىن، 27 ناۋرىزدا استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قۋاندىق بيشىمبايەۆتىڭ ءىسى بويىنشا القابيلەردى ىرىكتەۋ ءوتتى.
بۇل تۋرالى جوعارعى سوت Telegram ارناسىندا مالىمەت جاريالادى.
«القابيلەر القاسىنا 12 ادام تاڭدالدى: 10 – نەگىزگى قۇرام، 2 – قوسالقى. اشىق رەجيمدە وتەتىن كەلەسى سوت وتىرىسى 2024 جىلدىڭ 27 ناۋرىزىندا ساعات 16:00-گە بەلگىلەندى»، - دەلىنگەن جوعارعى سوتتىڭ باسپا ءسوز حابارلاماسىندا.
ايتا كەتەيىك، 11-12 ناۋرىزدا استانادا ايەلى سالتانات نۇكەنوۆانى ءولتىردى دەپ ايىپتالىپ جاتقان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ءىسى بويىنشا الدىن الا سوت تىڭداۋى وتكەن بولاتىن.
ەسكە سالساق، بۇعان دەيىن جوعارعى سوت بيشىمبايەۆتىڭ سوتىندا القابيلەردى سۋرەتكە تۇسىرۋگە جانە جەكە باسىن انىقتاۋعا تىيىم سالعانىن حابارلاعانبىز.
