ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

بيشىمبايەۆ 24 جىلعا سوتتالدى

13 مامىر 2024 541

ايەلىن ۇرىپ ءولتىردى دەپ ايىپتالىپ وتىرعان ەكس-مينيستر قۋاندىق بيشىمبايەۆقا بۇگىن سوت ۇكىمى شىعادى، - دەپ حابارلايدى alash.kz.

"2024 جىلى 13 مامىردا ساعات 17:00-دە استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بيشىمبايەۆ پەن بايجانوۆقا قاتىستى قىلمىستىق ءىس بويىنشا ۇكىم جاريالاندى"، - دەپ حابارلادى جوعارعى سوت.

Cونىمەن، بيشىمبايەۆ تاعىلعان ايىپ بويىنشا، ەكس-مينيستر 24 جىلعا باس بوستاندىعىنان ايىرىلدى. 

ال بايجانوۆ سوت ۇكىمىمەن ول 4 جىلعا سوتتالدى.

باقىتجان بايجانوۆ قىلمىستىق كودەكستىڭ ەكى بابى بويىنشا قىلمىس جاسادى دەپ ايىپتالدى: 432-باپ "اۋا اۋىر قىلمىستى جاسىرىپ قالۋ" جانە 434-باپ "اسا اۋىر قىلمىستى حابارلاماۋ".

ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube ارناسىنان ونلاين قارادى.

ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعادى.

ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا، يگور ۆرانچيەۆ.

27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.

سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

بيشىمبايەۆقا ەكى باپ بويىنشا ايىپ تاعىلدى:

  • اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
  • ازاپتاۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
بۇل ماقالا تۋرالى نە ويلايسىز؟