قىتايعا التى كۇندىك ساپارىن اياقتاعان بۇۇ-نىڭ ادام قۇقىقتارى جونىندەگى جوعارعى كوميسسارى ميشەل باچەلەت پەكيندى "ادام قۇقىعىنا كەرى اسەر ەتۋى مۇمكىن" ساياساتىن وزگەرتۋگە ۇندەگەن. وسىعان دەيىن باچەلەتتىڭ ساپارىن بەلسەندىلەر مەن قۇقىق قورعاۋشىلار سىنعا العان. اقش-تىڭ رەسمي تۇلعالارى مەن حالىقارالىق قۇقىق قورعاۋشىلار ميشەل باچەلەتتىڭ قىتايدىڭ رەسمي تۇلعالارىمەن قاتار تۇرىپ، بىرگە سۋرەتكە ءتۇسۋى 1 ميلليوننان استام مۇسىلماندى ەركىنەن تىس قاماعان پەكينگە وسى ساياساتىن ۇگىت-ناسيحاتپەن جۋىپ-شايۋىنا جاعداي جاسايدى دەپ الاڭداعان.
"تەرروريزم جانە دەراديكاليزاسيا شارالارىن كەڭىنەن قولدانۋ ماسەلەسىن كوتەردىم. اسىرەسە، ولاردىڭ ۇيعىرلار مەن وزگە دە مۇسىلمان توپتاردىڭ قۇقىعىنا اسەرىن ايتتىم" دەدى باچەلەت 28 مامىردا وتكىزگەن ونلاين بريفينگ كەزىندە.
ول ساپارى شىڭجاڭ ولكەسىن قامتىعانمەن ساپارىنىڭ باستى ماقساتى شىڭجاڭداعى ورەسكەل ادام قۇقىعىن بۇزۋ جايتتارىن زەرتتەۋ ەمەس ەكەنىن اتاپ ءوتتى.
Amnesty International توبىنىڭ باس حاتشىسى اگنەس كاللاماردىڭ پىكىرىنشە، بۇۇ ادام قۇقىقتارى جونىندەگى جوعارعى كوميسسارىنىڭ 17 جىل ىشىندە قىتايعا العاشقى ساپارى "جۇڭگو ۇكىمەتىنىڭ جوعارى لاۋازىمدى تۇلعالارىمەن سۋرەتكە ءتۇسۋ مۇمكىندىگىن پايدالانۋ جانە كوميسسار مالىمدەمەلەرىن جۇڭگو مەملەكەتتىك اقپارات قۇرالدارىنىڭ بۇرمالاۋىنا بارىنشا جاعداي جاساۋ" سياقتى جايتتارمەن عانا ەستە قالۋى مۇمكىن. "ول قۇددى جۇڭگو ۇكىمەتىنىڭ پروپاگاندالىق جاتتىعۋىنىڭ ورتاسىنا تۇسكەندەي اسەر قالدىرادى" دەدى كاللامار.
اقش مەملەكەتتىك دەپارتامەنتىنىڭ رەسمي وكىلى نەد پرايس [باچەلەتتىڭ] "جاڭاعىداي جاعدايدا بارۋعا كەلىسۋى قاتەلىك بولدى" دەدى.
جۇڭگو شىڭجاڭدا ءبىر ميلليوننان استام ۇيعىر، قازاق، قىرعىز جانە باسقا دا مۇسىلمانداردى قاماۋدا ۇستاپ وتىر. بۇل ايماق قازاقستان، قىرعىزستان، تاجىكستانمەن شەكتەسەدى. حالىقارالىق قاۋىمداستىق پەكيندى سول جەردە ادام قۇقىقتارىن ورەسكەل بۇزىپ، وسى ۇلتتاردىڭ مادەني ەرەكشەلىگىن جويۋعا تىرىسىپ جاتىر دەپ ءجيى ايىپتايدى. پەكين ونى جوققا شىعارعان.
