ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

بەس جاسار بالانى قۇتقارىپ قالعان اقانعا پلانشەت پەن ءبىر ميلليون تەڭگە سىي بەرىلدى

22 مامىر 2024 1447

بار قازاقتى باۋىرىنداي كورەتىن استانالىق 7-cىنىپ وقۋشى بەس جاسار بالانى قۇتقارىپ قالدى. بەيبىت كۇننىڭ باتىرى اقان اكىمجانوۆتى استانا قالاسىنىڭ اكىمى جەڭىس قاسىمبەك ماراپاتتادى. اقانعا پلانشەت پەن ءبىر ميلليون تەڭگە سىيعا بەرىلدى، دەپ حابارلايدى Alash.KZ ۇلتتىق پورتالى.

استاناداعى تۇرعىن ءۇي كەشەندەرىنىڭ بىرىندە № 31 مەكتەپ-گيمنازياسى، 7 "د" سىنىپ وقۋشىسى اقان اكىمجانوۆ قايعىلى جاعدايدىڭ الدىن الىپ، كىشكەنە جۇرەگىمەن ۇلكەن ەرلىك جاسادى. ءوزىنىڭ دە ەلگەزەك، كوپشىل بالا ەكەنى حابارلاندى. ونىڭ بارلىق قازاق بالاسىنا باۋىرمال ءارى تۋعانىنداي قارايتىنى جالپاق جۇرتتى ءسۇيسىندىردى. استانا قالاسى اكىمى جاعدايعا قاتىستى پىكىر ءبىلدىرىپ، اقاندى ماراپاتتاعانىن حابارلادى.

اقان اكىمجانوۆپەن جانە ونىڭ اتا-اناسىمەن كەزدەستىم. اقان ءوزىنىڭ جىلدامدىعىمەن جانە باتىلدىعىمەن ىقتيمال قايعىلى جاعدايدىڭ الدىن الدى. 7-سىنىپ وقۋشىسى 4-قاباتتا ءىلىنىپ تۇرعان كىشكەنتاي ءبۇلدىرشىندى قۇتقارىپ قالدى.

اقاننىڭ اتا-اناسىنا ەرجۇرەك ۇل ءوسىرىپ، لايىقتى تاربيە بەرگەنى ءۇشىن العىسىمدى بىلدىرەمىن! اقان سول سياقتى وقۋدا دا، سپورتتا دا جەتىستىكتەرگە جەتىپ ءجۇر! مۇعالىمدەرى مەن سىنىپتاستارى ول تۋرالى ادال دوس، سانالى جانە جاۋاپكەرشىلىگى مول وقۋشى دەگەن پىكىردە!

اقانعا پلانشەت پەن ءبىر ميلليون تەڭگە سىيعا بەرىلدى. سونداي-اق بولاشاقتا كوللەدجگە نەمەسە ۋنيۆەرسيتەتكە ءتۇسۋ كەزىندە دە كومەك كورسەتەمىز.

بۇل ماقالا تۋرالى نە ويلايسىز؟