كىمدەر ورنىن ساقتاپ قالدى؟
رومان سكليار ۇكىمەت باسشىسىنىڭ ءبىرىنشى ورىنباسارى، ال تامارا دۇيسەنوۆا، سەرىك جۇمانعارين دا ورىنباسار لاۋازىمىندا قالدى. ەكەۋى دە الدىڭعى پرەمەردىڭ كەزىندە جۇمىس ىستەگەن.
سونىمەن بىرگە، مۇرات نۇرتىلەۋ پرەمەر-مينيسترىنىڭ ورىنباسارى – سىرتقى ىستەر ءمينيسترى، رۋسلان جاقسىلىقوۆ قورعانىس ءمينيسترى، ەرجان سادەنوۆ تە ىشكى ىستەر ءمينيسترى قىزمەتىن جالعاستىرادى.
لاۋازىمىن ساقتاپ قالعان باسشىلاردىڭ قاتارىندا ەنەرگەتيكا ءمينيسترى الماسادام ساتقالييەۆ، مادەنيەت جانە اقپارات ءمينيسترى ايدا بالايەۆا، ادىلەت ءمينيسترى ازامات ەسقارايەۆ، وقۋ-اعارتۋ ءمينيسترى عاني بەيسەمبايەۆ، عىلىم جانە جوعارى ءبىلىم ءمينيسترى ساياسات نۇربەك، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، تۋريزم جانە سپورت ءمينيسترى ەرمەك مارجىقپايەۆ، سيفرلىق دامۋ، يننوۆاسيالار جانە اەروعارىش ءمينيسترى باعدات مۋسين، ساۋدا جانە ينتەگراسيا ءمينيسترى ارمان شاققالييەۆ، كولىك ءمينيسترى مارات قارابايەۆ پەن سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ بار.
جاڭا مينيسترلەر
مينيستر قىزمەتىنە كەلگەندەر كوپ ەمەس. اجار عينياتتىڭ ورنىن سەناتور اقمارال ءالنازاروۆا باستى. ۇلتتىق ەكونوميكا مينيسترلىگىنە نۇرلان بايبازاروۆ كەلسە، شىڭعىس ءارىنوۆ توتەنشە جاعدايلار ءمينيسترى، ءمادي تاكييەۆ قارجى ءمينيسترى بولىپ تاعايىندالدى.
