ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

بالالار باعدارلاماسى بالاعات سوزبەن تولىپ كەتتى - دەپۋتات

23 مامىر 2024 357

بالالارعا ارنالعان انيماسيالىق فيلمدەردەگى ۇلتتىق قۇندىلىقتى ساقتاۋ تۋرالى دەپۋتات ەسكەرتۋ ايتتى، دەپ حابارلايدى Alash.kz ۇلتتىق پورتالى Stan.kz-كە سىلتەمە جاساپ

دەپۋتاتتىڭ ايتۋىنشا، شامادان تىس بەلسەندى ۆيرتۋالدى الەمنىڭ اسەرىنە توتەپ بەرۋ ءۇشىن ۇلتتىق ءتىل مەن مادەني تۋىندىلاردى ورتاق قۇندىلىقتار رەتىندە بەلسەندى تۇردە ناسيحاتتاۋ اسا ماڭىزدى. وتانشىل ۇرپاقتى قالىپتاستىرۋ ءۇشىن سول اقپاراتتىق تەحنولوگيانى جەتە مەڭگەرىپ، انا تىلىمىزدەگى مادەني ءونىم مەن تاربيە قۇرالدارىن زاماناۋي فورماتتا جاڭعىرتۋ، بۇگىنگىنىڭ تىلىندە ۇسىنۋ اسا وزەكتى بولىپ تۇر. 

سەناتوردىڭ پىكىرىنشە، وسى ماسەلەلەر ەڭ كۇردەلى پروبلەما. قازىرگى بالالاردىڭ بار ىقىلاسى مەن ىنتا-جىگەرى تولىعىمەن سمارتفونعا اۋعان. انيماسيالىق فيلمدەر بۇلدىرشىندەردىڭ دۇنيەتانىمىن قالىپتاستىراتىن، ءتىلىن ۇشتايتىن بىردەن-بىر تالىم-تاربيە قۇرالىنا اينالىپ وتىر. الايدا قازاق مۋلتفيلمدەرى جوعارى تالاپتارعا ساي كەلمەسە، بالالار ونى كورمەيدى.

"ۇلتتىق تانىمىمىزعا ساي يدەولوگيالىق مازمۇن-ماڭىزعا يە، بالانىڭ ساناسى تەز قابىلدايتىن تاربيەلىك ءمانى بار انيماسيا ونىمدەرى دە، بالدىرعاندارعا ارنالعان كىتاپتار دا وتە از. ءتىلى شۇبارلانىپ، قازاقى ءتىلدىڭ قايماعىنان ايىرىلعان، ءتىپتى انايى سوزبەن بىلعانا باستاعان قازاق كينوسىنىڭ كۇردەلى جاعدايى دا جەكە ساۋالدىڭ جۇگى. سودان بولار، بالالاردىڭ ءتىلى وزگە تىلدە شىعىپ، تانىم-تۇسىنىگى ۇلتىمىزعا جات قالىپتاسىپ كەلەدى. بۇل –  ۇلتتىڭ كەلەشەگى ءۇشىن وتە ءقاۋىپتى قۇبىلىس. سەبەبى، انيماسيا – جاھاندانۋدىڭ ەڭ ماڭىزدى قۇرالىنا اينالدى. وزىق ەلدەر انيماسياعا ستراتەگيالىق دەڭگەيدە ءمان بەرىپ، ءوزىنىڭ ۇلتتىق قۇندىلىعىن وزگە ەلدەرگە دارىتىپ وتىر"، – دەدى رۋسلان رۇستەموۆ.

سەناتور وتاندىق انيماسيانى دامىتۋ تۇجىرىمداماسىن ازىرلەۋدى، "كينەماتوگرافيا تۋرالى" زاڭدى قايتا قاراۋدى، قارجى سۋبسيدياسىمەن ۇلتتىق انيماسيالىق ورتالىق اشۋدى ۇسىندى. سونىمەن قاتار ول انيماسيالىق كينو رەجيسسەرى ماماندىعىنا گرانتتاردى ۇلعايتۋ قاجەتىن، ۇلتتىق رۋحقا سايكەس كەلەتىن مۋلتفيلمدەرگە جىل سايىنعى تاپسىرىس بەرۋدىڭ ماڭىزىن، شەتەلدىك انيماسيالىق فيلمدەردى مەملەكەتتىك تىلگە اۋدارۋدىڭ قاتاڭ كريتەرييلەرىن بەكىتۋدى جانە "ۇلتتىق انيماسيا ونەرى تۋرالى" زاڭ جوباسىن دايىنداۋ قاجەت ەكەنىن اتاپ ءوتتى.

بۇل ماقالا تۋرالى نە ويلايسىز؟