قازاقستاندا قاڭتار وقيعاسىنان كەيىن كۇشتىك قۇرىلىمداردىڭ ارەكەتىنە بايلانىستى پروكۋراتۋراعا 363 شاعىم تۇسكەن، ازاپتاۋ جانە تەرگەۋدىڭ زاڭسىز ادىستەرى بويىنشا 178 قىلمىستىق ءىس تەرگەلىپ جاتىر. 16 اقپاندا كەشكە باس پروكۋراتۋرانىڭ قىلمىستىق قۋدالاۋ قىزمەتى ءتوراعاسىنىڭ ورىنباسارى ەلدوس قيلىمجانوۆ وسىلاي دەپ مالىمدەدى.
قوعامدا رەزونانس تۋدىرعان 8 ءىس ارنايى پروكۋرورلار وندىرىسىنە الىنعان. اراسىندا اتىراۋدا "دينامو" سپورت كەشەنىندە بولعان جاعداي مەن الماتى وبلىسىندا ازامات باتىربايەۆ پەن كامەلەتكە تولماعان ەسبولات ۇلىنىڭ ازاپتالۋى بويىنشا ىستەر بار.
سارسەنبى كۇنى باس پروكۋراتۋرا بريفينگىسىندە قاڭتار وقيعاسىنا بايلانىستى قوزعالعان ىستەر مەن وزگە دە دەرەكتەر ايتىلدى. ەڭ نەگىزگىلەرى تومەندەگىدەي:
- ەلدە قاڭتار وقيعاسىنا بايلانىستى سوتقا دەيىنگى 3096 ءىس تىركەلگەن. ارنايى پروكۋرورلار جاپپاي تارتىپسىزدىك جانە تەرروريزم اكتىسى بويىنشا 181 ءىستى تەرگەپ جاتىر.
- 741 كۇدىكتى سوت سانكسياسىمەن قاماۋعا الىنعان. ۆەدومستۆو مالىمەتىنشە، 113ء-ى – بۇرىن سوتتالعان، 42ء-ى – ەكسترەميستىك ۇيىم وكىلى (قاي ۇيىمدار ەكەنىن ناقتىلامادى، ءبىراق بيلىك بۇعان دەيىن قۇقىق قورعاۋشىلار داۋلى شەشىم دەپ اتاعان ۇيىم وكىلدەرى بارىن ايتقان)، 35ء-ى – ۇيىمداسقان قىلمىستىق توپ مۇشەسى.
- 157 كۇدىكتىنىڭ بۇلتارتپاس شاراسى دەنساۋلىعى جانە وزگە جايتتارعا بايلانىستى قاماۋمەن بايلانىستى ەمەس شارا تۇرىمەن الماستىرىلعان.
- تارتىپسىزدىككە قاتىسى جوق 103 ادام ۋاقىتشا قاماۋ يزولياتورىنان بوساتىلعان.
- دەنساۋلىق ساقتاۋ مينيسترلىگىنىڭ مالىمەتىنشە، قاڭتار وقيعاسى كەزىندە 1726 ادام مەديسينالىق كومەككە جۇگىنگەن: 673-ىندە وق جاراقاتى بولعان، 469 ادام پىشاق نەمەسە ۇشكىر زاتتارمەن جاراقاتتانعان، 431 ادامنىڭ وزگە دەنە جاراقات تۇرلەرى بولعان. الماتىدا – 686 ادام، الماتى وبلىسىندا – 336، قىزىلوردا وبلىسىندا – 164، جامبىل وبلىسىندا – 153، شىمكەنتتە – 126، شىعىس قازاقستان وبلىسىندا 126 ادام مەديسينالىق كومەككە جۇگىنگەن. رەسمي اقپارات بويىنشا، ولاردىڭ كەيبىرى "مەملەكەتتىك نىساندارعا شابۋىل كەزىندە" جارالانعان.
- "تارتىپسىزدىك" كەزىندە 3 مىڭنان استام اسكەري قىزمەتكەر جانە قۇقىق قورعاۋ ورگان وكىلى ءتۇرلى دەنە جاراقات العان.
- ءقازىر اۋرۋحانالاردا 273 ادام ەمدەلىپ جاتىر، ءبىر بولىگى رەانيماسيادا.
جەرگىلىكتى اقپارات قۇرالدارىنىڭ حابارلاۋىنشا، 18 قاڭتاردا دەنساۋلىق ساقتاۋ ءمينيسترى اجار عينيات ەلدە توتەنشە جاعداي جاريالانعالى بەرى 2739 ادامنىڭ مەديسينالىق كومەككە جۇگىنگەنىن مالىمدەگەن. ول كەزدە 200 ادامنىڭ ستاسيوناردا ەمدەلىپ جاتقانى، 14ء-ى رەانيماسيا ەكەنى حابارلانعان. سول كۇنى ىشكى ىستەر ءمينيسترى كۇشتىك قۇرىلىمنىڭ 2911 وكىلىنىڭ ءتۇرلى دارەجەدە جاراقات العانىن ايتقان.
وتكەن ايدىڭ باسىندا حالىقتىڭ ءومىر ءسۇرۋىنىڭ ناشارلاۋىنان تۋىنداعان جاپپاي نارازىلىقتىڭ سوڭى قانتوگىسكە ۇلاسقان كەزدە قازاقستان بيلىگى "مەملەكەتتىك توڭكەرىس" جاساۋ تالپىنىسى تۋرالى ايتتى. بيلىك "سىرتقى كۇشتەر" مەن ەلگە "گاستاربايتەر" رەتىندە كەلگەن "سودىرلار" تۋرالى ايتقانمەن وعان دالەل كەلتىرمەگەن.
