ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

اسىراپ العان 6 بالاسىنا يت پەن مىسىقتىڭ ەتىن بەرگەن ەمشى 3 ايلىق ەگىزدى دە اسىراپ العان - تىڭ دەرەك شىقتى

06 ماۋسىم 2024 452

شىمكەنتتە اسىراپ العان بالالارىنا جاۋىزدىق تانىتىپ، يت پەن مىسىقتىڭ ەتىن جەگىزدى دەگەن ەمشى ىسىنە قاتىستى تاعى جاڭا دەرەك شىقتى، دەپ حابارلايدى Alash.kz ۇلتتىق پورتالى قازاقپارات قسايتىنا سىلتەمە جاساپ. 

بۇلدىرشىندەردىڭ ءبىرى اتالعان وتباسىعا نەبارى 1،5 ايلىعىندا قامقورلىققا بەرىلگەن. 

شىمكەنتتە ەمشى كامەلەت جاسىنا تولماعان 6 بالانى 2021 جانە 2023 جىلدارى قامقورلىعىنا العان. ولاردىڭ ەكەۋى سوت شەشىمىمەن ايەلى ەكەۋىنىڭ اسىراندى بالالارى سانالسا، قالعان تورتەۋى ءوزىنىڭ قامقورشىلىق تاربيەسىندە بولعان. 

بالالاردىڭ ۇلكەنى - 2008 جىلدىڭ ساۋىرىندە دۇنيەگە كەلگەن ۇل بالا. 2021 جىلدىڭ 7 شىلدەسىندە شىمكەنت قالالىق ءبىلىم باسقارماسى باسشىسىنىڭ №344 بۇيرىعىمەن ەمشىگە قامقورشىلىققا بەرىلگەن. 2021 جىلدىڭ 12 قازانىندا شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ شەشىمىمەن ءجاسوسپىرىمدى ەمشى مەن ونىڭ ايەلى اسىراپ العان. 

2021 جىلدىڭ 17 مامىرىندا تۋعان قىز بالا 2021 جىلدىڭ 7 شىلدەسىندە استانا قالالىق ءبىلىم باسقارماسى باسشىسىنىڭ № 336 بۇيرىعىمەن قامقورشىلىققا بەرىلگەن. ەمشى مەن ونىڭ جۇبايى 2023 جىلدىڭ 30 قازانىندا ءبۇلدىرشىندى سوت شەشىمىمەن اسىراپ العان. 

ءۇشىنشى جانە ءتورتىنشى پەرزەنت - 2021 جىلدىڭ 26 مامىرىندا دۇنيەگە كەلگەن ەگىز ۇل مەن قىز. ەگىزدەر 3 ايعا جەتەر-جەتپەس جاستا 2021 جىلدىڭ 18 تامىزىندا استانا قالالىق ءبىلىم باسقارماسى باسشىسىنىڭ № 436 بۇيرىعىمەن ەمشىگە قامقورشىلىققا بەرىلگەن. 

2020 جىلدىڭ جەلتوقسانىندا دۇنيەگە كەلگەن جانە 2019 جىلدىڭ ماۋسىمىندا تۋعان ەكى ۇل بالا 2023 جىلدىڭ 19 قىركۇيەگىندە شىمكەنت قالالىق ءبىلىم باسقارماسى باسشىسىنىڭ بۇيرىعىمەن قامقورشىلىققا بەرىلگەن. 

قالالىق ءبىلىم باسقارماسى بالالاردى قامقورلىققا بەرۋ جانە اسىراپ الۋ پروسەدۋرالارى ءبىلىم جانە عىلىم ءمينيسترىنىڭ 2020 جىلدىڭ 24 ساۋىردەگى № 158 «وتباسى جانە بالالار سالاسىنداعى مەملەكەتتىك كورسەتىلەتىن قىزمەتتەر كورسەتۋ قاعيدالارىن بەكىتۋ تۋرالى» بۇيرىعىمەن بەلگىلەنگەن تارتىپپەن جۇزەگە اسىرىلعانىن العا تارتتى. 

«2021 جىلدىڭ 7 ساۋىرىندە ءبىلىم باسقارماسىنا شىمكەنت قالاسى اباي اۋدانى كوكبۇلاق تۇرعىن الابىندا تۇراتىن ازاماتتان جەتىم جانە اتا-اناسىنىڭ قامقورلىعىنسىز قالعان كامەلەتكە تولماعان بالالاردى قامقورشىلىققا الۋ ءۇشىن كانديدات رەتىندە رەسپۋبليكالىق دەرەكتەر بانكىنە ەسەپكە قويۋ ءۇشىن ءتيىستى قۇجاتتارىمەن ءوتىنىشى كەلىپ ءتۇستى. ۇسىنعان قۇجاتتار باسقارما قىزمەتكەرلەرى تاراپىنان زەردەلەنىپ تەكسەرىلدى. ساراپتاما جۇرگىزىلىپ، وتىنىشتە كورسەتىلگەن مەكەنجاي بويىنشا تۇرعىن ءۇي-تۇرمىستىق جاعدايى تۋرالى اكت جاسالدى. جوعارىدا اتالعان راسىمدەردىڭ وڭ ناتيجەسىنە بايلانىستى ازامات جەتىم جانە اتا-اناسىنىڭ قامقورلىعىنسىز قالعان بالالاردى قورعانشىلىق جانە قامقورشىلىققا الۋ ءۇشىن كانديدات رەتىندە رەسپۋبليكالىق دەرەكتەر بانكىندە تىركەلدى»، - دەدى باسقارماداعىلار. 

قالالىق ءبىلىم باسقارماسى ۇسىنعان انىقتاما
فوتو: قالالىق ءبىلىم باسقارماسى ۇسىنعان انىقتاما

ۆەدومستۆو مالىمەتىنشە، بەلگىلەنگەن تارتىپكە سايكەس، قالالىق ءبىلىم ءبولىمىنىڭ قورعانشىلىق جانە قامقورشىلىق ءبولىمىنىڭ قىزمەتكەرلەرى 2021 جىلدىڭ ءساۋىر مەن ماۋسىم ايلارىندا، 2023 جىلدىڭ قىركۇيەگىندە ەمشىنىڭ تۇرعىن ءۇيىنىڭ تۇرمىستىق جاعدايىنا قوسىمشا تەكسەرۋ جۇرگىزگەن. 

 

بۇل ماقالا تۋرالى نە ويلايسىز؟