ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

اساۋ ۇيرەتەتىن الەكساندرا

19 مامىر 2024 262

شىعىس قازاقستان وبلىسى ۇلان اۋدانىنىڭ ارۋى الەكساندرا دەن شۋ اساۋدى اۋىزدىقتاپ، سايگۇلىكتىڭ قۇلاعىندا وينايدى، - دەپ جازادى alash.kz cايتى 24.kz-كە سىلتەمە جاساپ. 

بالا كۇنىنەن بايگەگە قاتىسقان باتىل قىز قىزقۋۋدا سوڭىنان قۋعان جىگىتتەردى شاڭىنا دا ىلەستىرمەي كەتەدى. جىلقىعا قۇمار جان ءقازىر ۇلتتىق سپورت تۇرلەرىن جانداندىرىپ ءجۇر. جاستارعا تىزگىن تارتىپ، جامبى اتۋدى ۇيرەتەدى.

الەكساندرا دەن ساداق اتۋدىڭ ەۋروپالىق جانە ازيالىق ادىستەرىن جەتىك بىلەدى. قازاق دالاسىندا وسكەن ورىس قىزى بالا كۇنىنەن توقىم ۇشى تيمەگەن شۋ اساۋدى جۋاسىتىپ، ساياتقا شىققاندى سۇيەدى. بۇگىندە قازاقتىڭ ۇلتتىق ءداستۇرىن ۇلىقتاپ، كوپكە دارىپتەپ ءجۇر. اۋداندا ساداق اتۋ جانە اتبەگىلەر كلۋبىن ۇيىمداستىرعان. تاقىمى بەرىك ءارى جەبەسى ءمۇلت كەتپەيتىندەردى ىرىكتەپ، "جامبى اتۋعا" باۋليدى. الەكساندرا بۇل ونەردى ەلىمىزدە 20-عا جۋىق قىز-كەلىنشەكتىڭ يگەرگەنىن ايتىپ وتىر. سوندىقتان ۇلتتىق سپورتقا قىزداردى كوبىرەك تارتۋدى كوزدەگەن. ءقازىر ۇيىرمەگە 40 تالىمگەر جازىلدى.

"قىزداردىڭ قىزىعۋشىلىعى باسىم. ءبىرىنشى نىسانانى ءبىر ورىننان تۇرىپ كوزدەيمىز. ساداقتى يگەرگەننەن كەيىن جىلقى ۇستىندە شاۋىپ كەلە جاتىپ اتۋدى دا يگەرەدى. بۇل ءىستى ودان ءارى دامىتقىمىز كەلەدى. ۇلتتىق سپورت تۇرلەرىنەن كاسىبي سپورتشىلاردى تاربيەلەۋ جوسپاردا بار"، - دەدى سپورتشى الەكساندرا دەن.

الەكساندرا دەننىڭ وقۋشىلارىنىڭ اراسىندا 9 جاسار قىزى جانەل دە بار. اناسى سياقتى ول دا بالا كۇنىنەن سايگۇلىكتىڭ تىزگىنىن تارتىپ مىنگەن. اتتىڭ قۇلاعىندا وينايتىن جاس شاباندوز ءقازىر ەل بىرىنشىلىگىنە دايىندالىپ ءجۇر. بايگىگە قوسار اعىلشىن تۇقىمىنان سايگۇلىگى دە بار. ەلىمىزدىڭ تۇكپىر-تۇكپىرىندە ۇلتتىق سپورتتى دارىپتەپ جۇرگەن مۇنداي جانداردىڭ ارقاسىندا بابالار ءداستۇرى ۇمىت قالماسى انىق. ال قىركۇيەكتە استانادا وتەتىن كوشپەندىلەر ويىندارىندا الەكساندرا دەن سياقتى سپورتشىلار ەلىمىزدىڭ تۋىن اسقاقتاتارى ءسوزسىز.

بۇل ماقالا تۋرالى نە ويلايسىز؟