ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ارىستانبەكتىڭ كەزىندە بەس مىڭ دوللار". تانىمال اكتەر مەملەكەتتىك اتاقتىڭ نەبىر تۇرلەرىن ساتىپ الۋعا بولاتىنىن جايىپ سالدى

05 ماۋسىم 2024 1964

تانىمال اكتەر، پروديۋسەر المات ساقاتوۆ قازاقستاننىڭ ونەر سالاسىنداعى اتاق-داڭق، ماراپاتتاردىڭ بەرىلۋ جايى توڭىرەگىندە اڭگىمە ءوربىتىپ، مەملەكەتتىك ناگرادالاردىڭ ساتىلاتىنىن راستادى. بۇل جايلى Ashyq podcast youtube ارناسىندا ايتىپ بەردى،دەپ حابارلايدى Alash.KZ ۇلتتىق پورتالى. 

تانىمال اكتەر كينو سالاسىنا دا كوڭىلى تولمايتىنىن ايتىپ، وكپە-رەنىشىن ءبىلدىردى. سونىمەن قاتار، استارى جوق، ايتارى جوق تۋىندىلاردىڭ قوعامدىق ساناعا تيگىزەر كەرى اسەرىن باياندادى.  

“مەن ونەر سالاسىندا جوعارى ءبىلىم الماعان، تەاتر ينستيتۋتىن بىتىرمەگەن، اۋىل شارۋاشىلىعى، پوليتەحنيكالىق ۋنيۆەرسيتەتتەرىن ءبىتىرىپ، كۆن ويناپ تانىمال بولعان بالالار جايلى ايتىپ وتىرمىن. ولار ءقازىر كينو ءتۇسىرىپ جاتىر، ۇلكەن-ۇلكەن جۇلدىزدار، كونسەرتتەردى جۇرگىزىپ تانىمال بوپ كەتتى. ولار بۇعان ەڭبەكتىڭ ارقاسىندا كەلدى. وقىعان بالالار بار، ولار جالقاۋ، جۇمىس ىستەمەيدى. ءبىراق، اتاقتى بولعىسى كەلەدى. ال الگى وقىماعان بالالار جانتالاسىپ جۇمىس ىستەپ جاتىر. دەسە دە شىعارعان دۇنيەلەرى بىركۇندىك، تەز ءوتىپ كەتەتىن نارسەگە قىزىعادى. ەرتەڭىنە ەلدىڭ ەسىنەن شىعىپ كەتەدى. استارى جوق، ايتارى جوق، ءبىر رەت تىرقىلداپ كۇلىپ، كۇلىپ كەتەسىڭ، بولدى"،- دەدى. 

سونىمەن قاتار، اكتەر مەملەكەتتەن اتاق الا الماي قالعانى ءۇشىن ەكس-مينيستر ارىستانبەك مۇحامەديۇلىن ايىپتاپ، ماراپاتتى ساۋداعا سالعانىنا قىنجىلىس ءبىلدىردى. اقشاسى تولەنسە، اتاقتىڭ نەشە ءتۇرىن الاتىنىن باياندادى. 

"مەن كەزىندە اتاق الۋعا ۇمتىلىپ كوردىم. جىگىتتەر ەكى رەت ۇسىندى. ءبىر جولى ءبىر جىگىت "بەس مىڭ دوللار بەرسەڭ، ەرتەڭ-اق الىپ بەرەمىن" دەپ ايتتى. اتاق ءۇشىن بەس مىڭ بەرىپ نە قىلام دەدىم، ونسىز دا جۇمىسىمدى ىستەپ جاتىرمىن. ازدى-كوپتى ەل بىلەدى. "ماعان ءويتىپ ساتىپ العان اتاق كەرەك ەمەس" دەپ باس تارتتىم. "مىناۋ ارىستانبەك مينيستر وتىرعاندا سەن وتپەيسىڭ" دەپ ايتقان ادامدار بولدى. سەبەبى كەزىندە جاس كەزىمىزدە ۇستاسىپ قالعانبىز. "باۋىرجان شوۋدىڭ دۇركىرەپ تۇرعان كەزى، كەۋدەمىزگە نان پىسپەك تۇگىلى، ناۋبايحانا بولعان. سونداي كەزدەردە الگى مينيسترمەن ەرەگىسىپ قالعانبىز. ونىڭ دا كىناسى بولدى، نەگىزى. بالكىم سول ەسىندە قالىپ قويدى ما ەكەن. سونى ءبىر كەزدەسكەندە وزىنەن سۇرايمىن دەپ جۇرگەم. ءبىراق ءقازىر ارعى جاققا كەتىپ، وتىرىپ قالدى عوي"، – دەدى المات ساقاتوۆ.

ورايى كەلگەندە ايتا كەتەيىك،بۇركىتتىڭ جارى ايشا “مادەنيەت سالاسىنىڭ ۇزدىگى” توسبەلگىسىمەن ماراپاتتالعانىن جازعانبىز.  بۇعان قاتىستى وقىرماندار پىكىرتالاسقا ءتۇستى:

“قۇتتىقتايمىن جاستارعا كەرەمەت ۇلگىسىزدەر”، “قۇتتى بولسىن سول توسبەلگىسىنە لايىقتى جان”، “وتە مەيىرىمدى، اقكوڭىل جان، ماراپاتىنا ابدەن لايىق”، “نە ءۇشىن، قاي ەڭبەگى ءۇشىن، جاۋاپ جوق”، “ءوزى دە ۇيالاتىن سياقتى”، “بىزدە ساتىلماعان نە قالدى”، – دەپ جازعان ەدى ولار. 

بۇل ماقالا تۋرالى نە ويلايسىز؟