ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ارابيادان كەلگەن شەيح وسمان توقاعا قاراي تۇرا ۇمتىلعان قاۋىمنىڭ قىلىعى كوپشىلىكتىڭ سىنىنا ۇشىرادى

25 مامىر 2024 1519

شىمكەنت قالاسىنداعى سەيىتجان قاري ەسجان ۇلى اتىنداعى ۇلكەن مەشىتتىڭ اشىلۋ سالتاناتىنا ايگىلى كالليگراف شەيح وسمان توقانىڭ كەلگەنى الەۋمەتتىك جەلى ارقىلى ءدۇيىم جۇرتقا بەلگىلى بولدى. ساۋد ارابياسىندا تۇراتىن 90 جاستان اسقان كالليگرافتىڭ قولىن سۇيۋگە جاپاتارماعاي اسىققان قاۋىمنىڭ قىلىعىن كوپشىلىك سىنعا الدى، دەپ جازدى Alash.KZ ۇلتتىق پورتالى. 

قۇران كىتابىن ءۇش جىل بويى قولمەن جازىپ شىققان شەيح وسمان توقا شىمكەنت قالاسىنا كەلگەنى تۋرالى بەينەجازبا اقپاراتتىق كەڭىستىكتە تارادى. ب ا ق حابارلاۋىنشا، ونى اۋەجايدان ارنايى بەلگىلى بيزنەسمەن سەرىكجان سەيتجانوۆ كۇتىپ العان.

شەيح وسمان توقا 24 مامىر كۇنى سەيىتجان قاري ەسجان ۇلى رۋحاني ورتالىعىنىڭ رەسمي اشىلۋ سالتاناتىنا قاتىسقان كەزدە جۇرت جاپىرىلا وعان ۇمتىلعان. بەينەجازبالاردان حالىقتىڭ ءبىرىنىڭ ۇستىنە ءبىرى مىنبەلەپ، قارياعا قاراي ۇمتىلىپ جاتقانىن باجايلاۋعا بولادى.

بۇعان قاتىستى قوعام بەلسەندىسى رۇستەم ەسىمحان ۇلى پىكىر ءبىلدىردى: 

مىنا ادامداردىڭ ەشقايسىسى جىرتىق كيىممەن جۇرگەن جوق. ياعني، ءسىڭىرى شىققان كەدەي ەمەس... دەمەك ادامنىڭ مادەنيەتتى بولۋى - ونىڭ ماتەريالدىق جاعدايىنا مۇلدەم قاتىسى جوق دۇنيە، - دەپ پىكىر ءبىلدىردى. 

شەيح وسمان توقا مۇسىلماندار ءۇشىن قاسيەتتى سانالاتىن قۇران كىتابىن جانە ونىڭ بىرنەشە تىلدەگى اۋدارماسىن قولمەن جازىپ شىققان. قۇران كومبيناتىندا قاسيەتتى كىتاپتى 70 تىلگە اۋدارعان. ول ءوزىن قازاق سانايتىنىن، ۇلتىنىڭ قازاق ەكەنىن ايتقان: 

«سەندەردى كورگەندە بابامدى كورگەندەي بولدىم. مەنىڭ بابامنىڭ تۇرلەرى سەندەردەن اۋمايتىن كىسى بولاتىن. ءبىزدىڭ اتا-بابالارىمىز ياسساۋيدان 150 جىل الدىن كوشىپ كەتكەن».

بۇل ماقالا تۋرالى نە ويلايسىز؟