ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

اقش استاناسىنداعى قازاق بالاباقشاcى

03 ماۋسىم 2024 378

بالالار مەرەكەسى قارساڭىندا اقش استاناسى ۆاشينگتوندا قازاق بالاباقشاسى اشىلدى. بۇل – بۇلدىرشىندەردى قازاق تىلىندە تاربيەلەيتىن وسى ايماقتاعى جالعىز ورتالىق. بۇل كۇندە بالالارىنىڭ ءتىلى انا تىلىندە شىققانىن قالايتىن قازاق وتباسىلارى كوبەيگەن. بۇل بالاباقشادا تاربيە تۇرلەرى ءتول مادەنيەتىمىزگە نەگىزدەلگەن. بۇلدىرشىندەرگە حالقىمىزدىڭ ءسالت-داستۇرى ۇيرەتىلەدى. بالالار حالقىمىزدىڭ ونەرىمەن جاقىن تانىسىپ، ۇلتتىق تاعامدارىمىزدى جاساپ، ءدامىن تاتىپ وتىرادى دەپ جازادى Alash.kz.

20 جىلدان بەرى امەريكادا تۇرىپ جاتقان 3 بالانىڭ اناسى مادينا كەنجە قىزىن بالاباقشاعا العاشقىلاردىڭ ءبىرى بولىپ اكەلگەن. ول: "وكىنىشكە قاراي، ءبىزدىڭ 2 بالامىز اعىلشىن بالاباقشاعا باردى. ول كەزدە قازاق بالاباقشا بولمادى. ەندى اشىلدى. ەندى بالامىز انا ءتىلىن ۇيرەنەدى، قازاقتارمەن وينايدى. قۋانىشتىمىز" دەپ كوڭىلىن كۇيىن جاسىرا المادى.

اسەل كۇزەۋحان شەتەلدە تۋعان بالالارى قازاق تىلىندە تاربيە السا دەپ ارمانداعان. ءبىراق ونداي ورتالىق تاپپاعان سوڭ يگى ءىستى ءوزى قولعا الادى. ءسويتىپ قازاق بالاباقشاسىن اشىپ، بۇلدىرشىندەرگە ۇلتتىق تاربيە بەرۋگە كىرىسەدى. ءقازىر كىشكەنتايلارىن وسى تاربيە ورداسىنا بەرگىسى كەلەتىن اتا-انا كوپ، – دەپ جازدى 24.kz سايتى.

ول: "ءبىزدىڭ مىنا تۇرىپ جاتقان جەرىمىزدى قاراساڭىز، شاعىن قازاقستان دەۋگە دە بولادى. سوڭعى ۋاقىتتا امەريكاعا كەلىپ ءومىر سۇرەتىن قازاقتار وتە كوپ. ءبىزدىڭ اينالامىزدىڭ وزىندە 30-40 وتباسى تۇرامىز. سولاردىڭ ءوزىنىڭ كوبى بالالارىن قازاق بالاباقشاسىنا بەرگىسى كەلەدى" دەپ ءتۇسىندىردى.

اقش-تا مەكتەپكە دەيىنگى بالالاردى تاربيەلەۋ ورتالىقتارىنىڭ اي سايىنعى تولەمى وتە قىمبات، شامامەن 2000 دوللار بولادى. ونىڭ ۇستىنە، كوبىندە ىستىق تاماق بەرىلمەيدى. ال قازاق بالاباقشاسىنىڭ قۇنى ەداۋىر ارزان ءارى ۇلتتىق مازىرگە نەگىزدەلگەن ءۇش مەزگىل تاماعى بار.  اسەل كۇزەۋحان بولاشاقتا دومبىرا مەن بي ۇيىرمەسىن اشىپ، بالاباقشانى ۇلكەن قازاقى ورتالىققا اينالدىرۋدى كوزدەپ وتىر.

 

بۇل ماقالا تۋرالى نە ويلايسىز؟