الماتى مەن ەلوردا كوشەلەرىنىڭ بىرىنە بەلگىلى مەملەكەت جانە قوعام قايراتكەرى التىنبەك سارسەنباي ۇلىنىڭ اتى بەرىلۋى مۇمكىن. بۇل تۋرالى ەۋرازيا ءبىرىنشى ارناسى جازدى.
التىنبەك سارسەنباي ۇلىنىڭ ەسىمىنە كوشە اتى بەرىلۋى مۇمكىن دەگەن جاڭالىقتى ءبىرىنشى ارنا ءىnstagram-داعى پاراقشاسىندا جازدى. وندا قۋانىشتى جاڭالىقتى بەلگىلى جۋرناليست ساعاتبەك مەدەۋبەك ۇلى جازدى دەگەن. ياعني ونەرتانۋشى ساۋالىنا اكىمدىكتەن جاۋاپ كەلىپتى.
“استانا مەن الماتىداعى كوشەلەرگە التىنبەك سارسەنباي ۇلىنىڭ اتى بەرىلۋى مۇمكىن. بۇل تۋرالى بەلگىلى جۋرناليست، پۋبليسيست، ونەر زەرتتەۋشىسى ساعاتبەك مەدەۋبەك ۇلى حابارلادى”، — دەپ جازىلعان اقپاراتتا.
التىنبەك سارسەنباي ۇلى — 1962 جىلى 12 قىركۇيەكتە الماتى وبلىسى، رايىمبەك اۋدانى، قاينار اۋىلىندا دۇنيەگە كەلگەن. قازاقستاننىڭ مەملەكەت جانە قوعام قايراتكەرى، ديپلومات، جۋرناليست.
كوزى تىرىسىندە قازاقستاننىڭ رەسەي فەدەراسياسىنداعى توتەنشە جانە وكىلەتتى ەلشىسى، اقپارات جانە قوعامدىق كەلىسىم ءمينيسترى بولدى. سونىمەن قاتار "اق جول" ساياسي پارتياسىنىڭ نەگىزىن قالاۋشىلاردىڭ ءبىرى.
ءبىراق 2006 جىلى اقپان ايىندا التىنبەك سارسەنبايۇلىن ەكى كومەكشىسىمەن بىرگە ۇرلاپ اكەتىپ، اتىپ ءولتىردى. قىلمىسقا ۇلتتىق قاۋىپسىزدىك كوميتەتى "ارىستان" توبىنىڭ وفيسەرلەرى قاتىسقانى انىقتالدى.
