ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الماتىنى دامىتۋدىڭ ناقتى جوسپارى ايقىندالدى

20 قىركۇيەك 2022 53
        بىلتىر «قازاقستاندىقتاردىڭ ءال-اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ» ۇلتتىق جوباسى بەكىتىلگەن بولاتىن. اتالمىش ۇلتتىق جوبانىڭ نەگىزگى ماقساتى – ەكونوميكانى ءارتاراپتاندىرۋ ەكەنى ايتىلدى. ناقتىراق ايتساق، حالىقتىڭ تابىسىن ارتتىرۋ، قازاقستاندىقتاردىڭ تۇرمىسىن تۇزەۋ. سودان بەرى ۇلتتىق جوبانىڭ قابىلدانعانىنا 1 جىل بولىپ قالدى. 2025 جىلعا دەيىن جوسپارلانعان، العا قويىلعان مىندەتتەردى ورىنداۋ ءۇشىن الماتى قالاسىندا قانداي جۇمىستار جاسالىپ جاتىر؟

وسى اپتادا الماتى قالاسى ءماسليحاتىنىڭ XXV سەسسياسى ءوتىپ، سونىڭ بارىسىندا «الماتى قالاسىن 2025 جىلعا دەيىنگى دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار» بەكىتىلدى.

جوبا اياسىنداعى كەلەلى وتىرىسقا ەڭ الدىمەن الماتى قالاسىنىڭ اكىمى ەربولات دوسايەۆ كەلىپ قاتىستى. ودان كەيىن، اكىمنىڭ ورىنباسارلارى، باسقارما باسشىلارى مەن ءماسليحات دەپۋتاتتارى كەلدى. قوعامدىق كەڭەس مۇشەلەرى مەن ساراپشىلار قاۋىمداستىعىنىڭ وكىلدەرى بولدى.

الماتى قالاسىن 2025 جىلعا دامىتۋدىڭ باعدارلاماسىن دايىنداۋ بارىسىندا ستراتەگيالىق جوسپارلار جاسالدى. سونىمەن بىرگە، حالىقارالىق تاجىريبە، الەمدىك مەگاپوليستەردى دامىتۋ قاعيداتتارى دا تەرەڭ زەردەلەندى. جوسپاردى ورىنداۋ ءۇشىن قالا ءومىرىنىڭ بارلىق سالالارىنداعى جاعدايلار تالقىلانىپ، تالداندى. دامىتۋ باعدارلاماسى اياسىندا سىن-قاتەرلەر ەسكەرىلەدى، قالا تۇرعىنداردىڭ بارلىق وتىنىش-تىلەكتەرى قارالىپ، مۇقيات وڭدەلەتىن بولادى. جيىندا تۋرا وسى اڭگىمە قوزعالدى.

الماتى قالاسىن دامۋ باعدارلاماسى بۇل وتە ۇلكەن جۇمىستىڭ ناتيجەسى. بۇعان الماتى اكىمدىگى مەن ءارتۇرلى قىزمەت سالالارىنان 130-دان استام ماماندانعان ساراپشى تارتىلدى. ولار 5 اي بويى جۇمىس جاساعان. باعدارلاما قالا تۇرعىندارىنىڭ ۇسىنىس-تىلەكتەرى نەگىزىندە جاسالعان. وسى ۇسىنىس بويىنشا بيىل شىلدەدە الماتىلىقتار قالا دامۋ باعدارلاماسىنىڭ باستى باسىمدىقتارىنا 1280 ءتۇرلى تۇسىنىكتەمە جىبەرگەن.

شاھار باسشىسى ەربولات دوسايەۆ ءوز سوزىندە الماتىنىڭ بارلىق تۇرعىندارىنا قالانى دامىتۋ باعدارلاماسىن تالداۋعا وتە بەلسەندى اتسالىسقاندارى ءۇشىن راقمەت ايتتى.

دامۋ باعدارلاماسىنىڭ بازالىق ەرەكشەلىگى مىناۋ: جايلى قالالىق ورتا جاساۋ، الماتىنىڭ بارلىق ءىرى جانە شاعىن اۋداندارىندا ءومىر ءسۇرۋ ساپاسىن ارتتىرۋ. ماسەلەن، الماتى قالاسىن 2025 جىلعا دەيىن دامۋ باعدارلاماسىندا 7 ءتۇرلى باستى  باعىت ايقىندالعان. ولار: جايلى قالالىق ورتا، ورنىقتى ەكونوميكالىق ءوسۋ، باسقارىلاتىن ۋرباندالۋ، الەۋمەتتىك ورنىقتىلىق پەن تۇراقتىلىق، جاسىل الماتى، سمارت سيتي، ءقاۋىپسىز قالا دەگەن سياقتى باعىتتار.

جيىن كەزىندە ءبىز اتاپ وتكەن قالانى دامىتۋدىڭ باستى باعىتتارىنىڭ ءارقايسىسى تۋرالى شاھار باسشىسىنىڭ ورىنباسارلارى مەن سيفرلاندىرۋ باسقارماسىنىڭ باسشىسى بايانداپ بەردى. بۇدان بولەك، جيىندا ءبىرقاتار نورماتيۆتىك-قۇقىقتىق اكتىلەر قابىلدانىپ، سونىڭ نەگىزىندە ناقتى جۇمىستار جاسالاتىن بولدى.

ج.شوكە
بۇل ماقالا تۋرالى نە ويلايسىز؟