جەتىسۋ وبلىسىندا – 8 اۋدان، الماتى وبلىسىندا 9 اۋدان بولادى. بۇل جونىندە جۇما كۇنى الماتى وبلىسىنىڭ اكىمى قانات بوزىمبايەۆ مالىمدەدى. ونىڭ ايتۋىنشا، وبلىستاردى ءبولۋ جۇمىستارى باستالعان.
جەتىسۋ وبلىسىنا 8 اۋدان: اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ، سارقان اۋداندارى جانە تالدىقورعان مەن تەكەلى قالالارى كىرەدى.
ال بالقاش، ەڭبەكشىقازاق، جامبىل، ىلە، قاراساي، كەگەن، رايىمبەك، تالعار، ۇيعىر اۋداندارى، سونىمەن بىرگە قاپشاعاي قالاسى الماتى وبلىسىندا قالادى.
جەتىسۋ وبلىسىنا بارلىعى 352 ەلدى مەكەن كىرەدى، ال الماتى وبلىسىنا 380 ەلدى مەكەن قارايدى.
وبلىس اكىمىنىڭ پىكىرىنشە، وبلىستى ءبولۋ "مەملەكەتتىك باسقارۋ پروسەسىن وڭتايلاندىرادى، ازاماتتاردىڭ وبلىس ورتالىعىنا بارىپ-قايتۋىن جەڭىلدەتەدى، ىشكى كوشى-قون ماسەلەسىن رەتتەۋگە سەپتىگىن تيگىزەدى، ءوڭىردىڭ دامۋىنا قۋاتتى سەرپىن بەرەدى".
رەسمي اقپاراتقا قاراعاندا، "ماڭىزى بار اكىمشىلىك-اۋماقتىق بىرلىكتەردىڭ جاڭا شەكارالارى جانە باسقا دا گەوگرافيالىق دەرەكتەر كورسەتىلگەن سحەمالىق كارتا دايىندالىپ جاتىر". الماتى وبلىسى اكىمدىگىنىڭ باسپا ءسوز قىزمەتى تاراتقان حابارلامادا ەكونوميكالىق ەسەپتەۋلەر، تالداۋ، شتات سانىن قايتا ءبولۋ، مەملەكەتتىك ورگاندار ورنالاساتىن نىسانداردى ايقىنداۋ جۇمىستارى دا باستالعانى جازىلعان.
رەسمي اقپارات بويىنشا، سوڭعى 20 جىل ىشىندە وبلىس بيۋدجەتى 2001 جىلى 21 ملرد تەڭگەدەن 2021 جىلى 830 ملرد تەڭگەگە دەيىن وسكەن.
پرەزيدەنت قاسىم-جومارت توقايەۆتىڭ ناۋرىز ورتاسىنداعى حالىققا جولداۋىنان كەيىن قازاقستاندا تاعى ءۇش وبلىس پايدا بولاتىنى بەلگىلى بولعان: شىعىس قازاقستان وبلىسىنىڭ سەمەي ايماعىندا – اباي وبلىسى، قاراعاندى وبلىسىنىڭ جەزقازعان وڭىرىندە – ۇلىتاۋ، الماتى وبلىسى اۋماعىندا جەتىسۋ وبلىسى قۇرىلادى.
بۇعان دەيىن قازتاگ اگەنتتىگى ءۇش وبلىس ماۋسىم ايىنا دەيىن قۇرىلۋى مۇمكىن ەكەنىن حابارلاعان.
