ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الماتىدا سسسر تۋىن جۇلىپ تاستاعان بەلسەندى ءوز ەلىندە ايىپتى بولىپ، بەس تاۋلىككە قامالدى

11 مامىر 2024 692

كەڭەس وداعىنىڭ تۋىن الاۋلاتىپ-جالاۋلاتىپ الماتى كوشەلەرىمەن الىپ جۇرگەندەردىڭ تۋىن جۇلىپ العان قوعام بەلسەندىسى جانبولات ءشايزادا بەس تاۋلىككە قامالدى، دەپ حابارلايدى Alash.KZ ۇلتتىق پورتالى. 

ەكىنشى دۇنيەجۇزىلىك سوعىستىڭ اياقتالعانىنا وراي اتالىپ وتىلەتىن 9 مامىردا سوۆەت وداعىنىڭ تۋىن كوتەرگەن ادامدارمەن بايلانىسىپ قالعان بەلسەندى جانبولات ءشايزادانىڭ بەس تاۋلىككە قامالعانى حابارلاندى. الماتى قالالىق اكىمشىلىك سوتى ونى تاۋەلسىز قازاقستاندا وزگە سيپاتتاعى تۋ كوتەرگەندەرگە قارسى كەلگەنى ءۇشىن ايىپتى دەپ ساناپ، “ۇساق بۇزاقىلىق” بابى بويىنشا كىنالى دەپ تانىعان.

سوت شەشىمىندە قاتىستى اقپاراتقا سەنسەك، وندا "قوعامدىق ورىندا ءجۇرىپ، كەلە جاتقان كولىكتەردى ءوز بەتىمەن توقتاتىپ، جانجال شىعارىپ دورەكىلىك كورسەتىپ، بىلاپىت سوزدەر ايتقانى، كولىكتەن تۋلاردىڭ كوشىرمەلەرىن جۇلىپ الىپ قوعامدىق ءتارتىپتى بۇزعانى" جازىلعان.

الايدا، بەلسەندىنىڭ باق-قا بەرگەن سۇحباتىندا: “بالاعات ءسوز ايتقانىم راس، ءبىراق ەشقانداي ءتارتىپ بۇزبادىم”، - دەگەن. ءوزىنىڭ ساياسي كوزقاراسى، ۇلتتىق ساناسى ءۇشىن جازىقتى بولعان جانبولات ءشايزادا 9 مامىر كۇنى كەشكە ۇستالدى. تاراپتاردىڭ شەشىمگە قاتىستى شاعىم تۇسىرۋىنە مۇمكىندىگى بار.

ەسكە سالا كەتەيىك، 9 مامىر كۇنى الەۋمەتتىك جەلىدە ەر ادامنىڭ الماتى كوشەسىندە كولىككە ىلىنگەن سوۆەت وداعىنىڭ تۋىن الىپ، كولىكتەگى ادامدارمەن سوزگە كەلىپ قالعانى بەينەلەنگەن ۆيدەو تارادى. جانبولات ءشايزادانىڭ ايتۋىنشا، وقيعا 9 مامىردا كۇندىز بولعان. ول سسسر-دىڭ تۋىن جەلبىرەتىپ ءجۇرۋدى ەل بىرلىگىنە سىنا قاعىپ، "ارانداتۋ" ارەكەتى دەپ سانايتىنىن جەتكىزدى.

جانبولات ءشايزادا رەسەيدىڭ ۋكرايناعا باسقىنشىلىعى وسىنداي ارانداتۋشى ارەكەتتەردەن باستالعانىن اتاپ ءوتىپ، ىستەگەن ءىسىن دۇرىس سانايتىندىقتان وعان وكىنبەيتىنىن، جاساعانىن موينىمەن كوتەرۋگە دايىن ەكەنىن دە حابارلادى.

ءماجىلىس دەپۋتاتى ابزال قۇسپان كسرو تۋىمەن شەرۋگە شىققاندارعا قارسى بولعان الماتىلىق جانبولات شايزادانى قولداۋعا شاقىردى.

- جانبولاتتاي ۇلتقا تىرەك، ەلگە كەرەك ازاماتتاردى قولداماي تىنىش وتىرۋعا تاعى بولمايدى. سوندا نە ىستەمەك كەرەك؟ مەنىڭشە، قولدانىستاعى اكىمشىلىك كودەكسكە بوتەن، باسقا ەلدىڭ مەملەكەتتىك سيمۆوليكاسىن قوعامدىق ورىنداردا رۇقساتسىز پايدالانعانى ءۇشىن بولەك جاۋاپكەرشىلىك قاراستىرۋ كەرەك. سوندا ءبىز وسىنداي پروۆوكاسيالىق ارەكەتتەردىڭ الدىن العان بولار ەدىك. ايتپەسە، ءسسسر-دىڭ تۋىن جەلبىرەتىپ جۇرگەندەردىڭ ارەكەتى زاڭدى، ال وعان توسقاۋىل قويامىز دەۋشىلەردىڭ ارەكەتى زاڭسىز بولۋى ادىلەتتىلىك قاعيداتىنا قايشى، – دەپ جازادى ول.

ورايى كەلگەندە ايتا كەتەيىك، جىل سايىنعى جەڭىس كۇنىندە ەگەمەن ەلدىڭ اسپانىندا وزگە سيپاتتاعى نىشانداردى كوتەرەتىندەر كوزگە تۇسەدى. كەڭەستىك كەزدەگى ۇلتتىق قۇندىلىقتاردىڭ جانشىلىپ، ۇلت ءتىلىنىڭ تۇگەسىلۋى، قازاق ءتىلدى مەكتەپتەردىڭ جابىلۋى، اشارشىلىق پەن ۇلت زيالىلارىن قۋالاۋ سىندى قيىندىقتار ءتان سوۆەتتىك يمپەريانىڭ ساياساتىن ايىپتايتىندار بۇل قۇبىلىستى قۇلدىق سانامەن، وتارلاۋشىلىقتى جاقتاۋمەن، قازاق حالقىنا جاسالعان گەنوسيتتى بەيسانا قولداۋمەن بايلانىستىرىپ جاتادى. 

 

 



بۇل ماقالا تۋرالى نە ويلايسىز؟