ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الماتىدا سسسر قىزىل تۋىن جۇلىپ العان بەلسەندى جانبولات ءشايزادا بوساتىلدى

15 مامىر 2024 483

9 مامىردا الماتىدا قىزىل كەڭەس تۋىن اۆتوكولىككە قاداعان ادامداردىڭ جالاۋىن جۇلىپ الىپ،ولارمەن شەكىسىپ قالعانى ءۇشىن 5 تاۋلىككە قاماۋعا الىنعان جانبولات ءشايزادا بوساتىلدى.  الماتى قالالىق اكىمشىلىك سوتى اتالعان ازاماتتى "ۇساق بۇزاقىلىق" بابى بويىنشا 5 كۇنگە قاماعان بولاتىن، دەپ حابارلايدى Alash.KZ ۇلتتىق پورتالى.

جانبولات ءشايزادا قاماۋدان بوساپ شىقتى. 14 مامىر كەشكە قالالىق پوليسيا دەپارتامەنتى الدىنا بەلسەندىنى كۇتىپ الۋعا 50-گە جۋىق ادام جينالدى.ولار قازاق ەلىنىڭ كوك تۋىن جەلبىرەتىپ، قۇرمەتپەن بەلسەندىنى كۇتىپ الدى. 

ەسكە سالا كەتەيىك، 9 مامىر كۇنى الەۋمەتتىك جەلىدە ەر ادامنىڭ الماتى كوشەسىندە كولىككە ىلىنگەن سوۆەت وداعىنىڭ تۋىن الىپ، كولىكتەگى ادامدارمەن سوزگە كەلىپ قالعانى بەينەلەنگەن ۆيدەو تارادى. جانبولات ءشايزادانىڭ ايتۋىنشا، وقيعا 9 مامىردا كۇندىز بولعان. ول سسسر-دىڭ تۋىن جەلبىرەتىپ ءجۇرۋدى ەل بىرلىگىنە سىنا قاعىپ، "ارانداتۋ" ارەكەتى دەپ سانايتىنىن جەتكىزدى.

جانبولات ءشايزادا رەسەيدىڭ ۋكرايناعا باسقىنشىلىعى وسىنداي ارانداتۋشى ارەكەتتەردەن باستالعانىن اتاپ ءوتىپ، ىستەگەن ءىسىن دۇرىس سانايتىندىقتان وعان وكىنبەيتىنىن، جاساعانىن موينىمەن كوتەرۋگە دايىن ەكەنىن دە حابارلادى.

ءماجىلىس دەپۋتاتى ابزال قۇسپان كسرو تۋىمەن شەرۋگە شىققاندارعا قارسى بولعان الماتىلىق جانبولات شايزادانى قولداۋعا شاقىردى.

جانبولاتتاي ۇلتقا تىرەك، ەلگە كەرەك ازاماتتاردى قولداماي تىنىش وتىرۋعا تاعى بولمايدى. سوندا نە ىستەمەك كەرەك؟ مەنىڭشە، قولدانىستاعى اكىمشىلىك كودەكسكە بوتەن، باسقا ەلدىڭ مەملەكەتتىك سيمۆوليكاسىن قوعامدىق ورىنداردا رۇقساتسىز پايدالانعانى ءۇشىن بولەك جاۋاپكەرشىلىك قاراستىرۋ كەرەك. سوندا ءبىز وسىنداي پروۆوكاسيالىق ارەكەتتەردىڭ الدىن العان بولار ەدىك. ايتپەسە، ءسسسر-دىڭ تۋىن جەلبىرەتىپ جۇرگەندەردىڭ ارەكەتى زاڭدى، ال وعان توسقاۋىل قويامىز دەۋشىلەردىڭ ارەكەتى زاڭسىز بولۋى ادىلەتتىلىك قاعيداتىنا قايشى، – دەپ جازادى ول.

ورايى كەلگەندە ايتا كەتەيىك، جىل سايىنعى جەڭىس كۇنىندە ەگەمەن ەلدىڭ اسپانىندا وزگە سيپاتتاعى نىشانداردى كوتەرەتىندەر كوزگە تۇسەدى. كەڭەستىك كەزدەگى ۇلتتىق قۇندىلىقتاردىڭ جانشىلىپ، ۇلت ءتىلىنىڭ تۇگەسىلۋى، قازاق ءتىلدى مەكتەپتەردىڭ جابىلۋى، اشارشىلىق پەن ۇلت زيالىلارىن قۋالاۋ سىندى قيىندىقتار ءتان سوۆەتتىك يمپەريانىڭ ساياساتىن ايىپتايتىندار بۇل قۇبىلىستى قۇلدىق سانامەن، وتارلاۋشىلىقتى جاقتاۋمەن، قازاق حالقىنا جاسالعان گەنوسيتتى بەيسانا قولداۋمەن بايلانىستىرىپ جاتادى. 

بۇل ماقالا تۋرالى نە ويلايسىز؟