ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الماتىدا 4 جاسار حانتورەنى ۇرىپ ولتىرگەن وگەي اكەگە قاتىستى سوت ۇكىمى شىقتى

22 مامىر 2024 516

ازاماتتىق نەكەدە تۇرعان ايەلىنىڭ 4 جاسار بالاسىن ۇرىپ ولتىرگەن 19 جاستاعى ەر ادامعا قاتىستى سوت ۇكىمى شىقتى، دەپ حابارلايدى Alash.KZ ۇلتتىق پورتالى Stan.kz اقپارات اگەنتتىگىنە سىلتەپ.

الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى بالدىرعاندى ءولتىردى دەپ ايىپتالعان ەر ادامعا قاتىستى قىلمىستىق ءىستى قارادى.

سوت انىقتاعانداي، ەر ادام 2023 جىلدىڭ تامىز ايىنان بەرى جالدامالى پاتەردە بالانىڭ اناسىمەن بىرگە تۇرىپ كەلگەن. 2023 جىلدىڭ قىركۇيەك ايىندا سوتتالۋشى جەكە وشپەندىلىك جانە بالانىڭ اكەسىنەن كەك الۋ ماقساتىندا كامەلەتكە تولماعان وگەي ۇلى ح.-نى سوققىعا جىققان. بۇعان قاتىستى: 

"سوتتالۋشى بالانىڭ باسى مەن اسقازانىنا 8-9 رەت ۇرعان. سالدارىنان باۋىرى جارىلىپ، ىشكى قان كەتۋدەن بالا كوز جۇمدى. ەر ادام بالانى ءولىمشى حالدە بالاباقشاعا اپارىپ تاستاعان. ناتيجەسىندە، بالا بالاباقشادان اۋرۋحاناعا جەتكىزىلدى، بىرنەشە كۇننەن كەيىن ول اۋرۋحانادا العان جاراقاتتاردان قايتىس بولدى"، – دەپ حابارلادى سوتتىڭ باسپا ءسوز قىزمەتى.

پروكۋرور ايىپتالۋشىنى 20 جىلعا باس بوستاندىعىنان ايىرۋدى سۇرادى. سوتتالۋشى ءوز كىناسىن مويىندامادى.

سوت ەر ادامدى وگەي ۇلىن ولتىرگەنى ءۇشىن كىنالى دەپ تاۋىپ، 20 جىلعا باس بوستاندىعىنان ايىردى. سوتتىڭ ۇكىمى ءالى زاڭدى كۇشىنە ەنگەن جوق.

ەستەرىڭىزگە سالا كەتەيىك، ءتورت جاسار حانتورەنى اناسى ازاماتتىق نەكەدەگى كۇيەۋىنە قالدىرىپ جۇمىسقا كەتكەن. سول ۋاقىتتا جاس جىگىت ءبۇلدىرشىندى سوققىعا جىعىپ، بالاباقشاعا اپارىپ تاستاعان. اۋىر جاراقات العان بالانىڭ جاعدايى بوبەكجايدا كۇرت ناشارلاپ، اۋرۋحانادان ءبىر-اق شىققان. ءىش قۇرىلىسى زاقىمدانعان بالا ءتورت كۇننەن كەيىن جانساقتاۋ بولىمىندە كوز جۇمدى.

بۇل ماقالا تۋرالى نە ويلايسىز؟