ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"اكىمنىڭ ورىنباسارىن، ۇلكەن لاۋازىمدى تۇلعالاردى دا جاۋاپكەرشىلىككە تارتتىق" - اسحات ايماعامبەتوۆ

22 ءساۋىر 2024 421

"قاسقا جول" يۋتۋب ارناسىنا سۇحبات بەرگەن بۇرىنعى ءبىلىم ءمينيسترى، قازىرگى ءماجىلىس دەپۋتاتى اسحات ايماعامبەتوۆ ءوزى مينيستر بولىپ تۇرعان كەزدە ءبىلىم سالاسىندا قانداي بىلىقتار بولعانىن،سونىمەن بىرگە پەداگوگتەرگە قانداي قىسىم جاسالعانىن اشىق ايتىپتى.

ايماعامبەتوۆتىڭ ايتۋىنشا، ۇستازداردىڭ قۇقىعىن قورعاۋ ءۇشىن تالاي لاۋازىمدى تۇلعالاردى جاۋاپكەرشىلىككە تارتۋعا تۋرا كەلىپتى.

"ماماندىق بويىنشا كونكۋرسى ەڭ كوپ ۇشتىك بولسا، سونىڭ ىشىندە پەداگوگ ماماندىعى بار. ەندى مەكتەپكە كەلەتىن مۇعالىمدەردىڭ ساپاسى وتە جوعارى بولادى. بىرىنشىدەن، مۇعالىمدەردىڭ جالاقىسىن كوتەردىك. ەكى جارىم، ءۇش ەسەگە كوتەرىلدى. جانىمىزداعى مەملەكەتتەردىڭ بىرىمەن دە سالىستىرۋعا كەلمەيدى. ونى اشىق ايتۋىمىز كەرەك.

ەكىنشىدەن، كەزىندە ولار (مۇعالىمدەر - رەد) ۇيلەردىڭ ەسىكتەرىن قاعىپ كەتتى. بارلىق جۇمىستى سولارعا اسىپ قويدى. ءقازىر مۇعالىمدەر ءۇي ارالاۋ دەگەندى ۇمىتتى. سەنبىلىك بولسىن - بارلىق نارسەگە مۇعالىمدەردى جەگىپ قوياتىن. جينالىس بولسا، مۇعالىمدەر بارادى. كەزدەسۋ بولسا، مۇعالىمدەر بارادى. ساباق قايدا سوندا؟! جىلىنا 1000 ادامنان اكىمشىلىك جاۋاپكەرشىلىككە تارتۋعا تۋرا كەلدى"، - دەدى ول.

ايماعامبەتوۆ بۇل قاتاردا بەلدى، لاۋازىمدى شەندىلەر بولعانىن دا جەتكىزدى دەيدى دالانيەۆس.

"كەزىندە مەن مينيستر بولعاندا ءتىپتى ءبىر وبلىستىڭ اكىمىنىڭ ورىنباسارىن اكىمشىلىك جاۋاپكەرشىلىككە تارتتىق. سوندا وبلىس اكىمى ماعان حابارلاسىپ، "ءبىز ارىپتەس ەمەسپىز بە، مەنىڭ ورىنباسارىمدى قالاي جاۋاپكەرشىلىككە تارتىپ جاتسىڭ؟" دەدى. ءبىز "زاڭنىڭ اتى - زاڭ، بارلىعىنا بىردەي" دەدىك.

جۇزدەگەن ديرەكتوردى جاۋاپكەرشىلىككە تارتتىق. قانشاما اكىمنىڭ ورىنباسارىن، ۇلكەن لاۋازىمدى تۇلعالاردى دا جاۋاپكەرشىلىككە تارتتىق. مۇعالىمدەر بالالاردى وقىتۋ كەرەك، باسقا بولماۋى كەرەك. وسىلايشا ءبىراز ماسەلەنى وزگەرتتىك دەپ ايتا الامىن"، - دەيدى سۇحباتىندا. 

بۇل ماقالا تۋرالى نە ويلايسىز؟