ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

«ادىلدىك جانە وركەندەۋ» قورى اپاتتى ايماققا كومەك كورسەتۋدى كەشەنىن ىسكە اسىرۋدى باستادى

12 ءساۋىر 2024 274

«ادىلدىك جانە وركەندەۋ» قوعامدىق قورى سۋ تاسقىنىنان زارداپ شەككەن قازاقستان وڭىرلەرىنىڭ تۇرعىندارىنا كومەك كورسەتۋگە كۇش-جىگەردى شوعىرلاندىرۋ ماقساتىندا بارلىق وبلىس وكىلدەرىنىڭ قاتىسۋىمەن احۋالدىق شتاب قۇردى.



سۋ تاسقىنىنان زارداپ شەككەن وڭىرلەردەگى قور وكىلدەرى جەرگىلىكتى جاعدايدى جانە اپاتقا قارسى كۇرەستىڭ العاشقى كۇندەرىندەگى تاجىريبەنى ەسكەرە وتىرىپ، توتەنشە جاعداي رەجيمى جاريالانعان وبلىستارعا كومەك كورسەتۋ بويىنشا شارالار كەشەنىن ۇسىندى.

بۇگىن شتابتىڭ ءبىرىنشى وتىرىسى ءوتتى. جيىندا زارداپ شەككەندەرگە كومەك كورسەتۋدىڭ ءبىرىنشى كەزەكتەگى شارالارىمەن قاتار، جاقىن ارادا ۇلكەن سۋ كەتكەن كەزدە قوعامدىق بەلسەندىلەر ءوز جۇمىسىن شوعىرلاندىراتىن شارالار بارىسى تالقىلاندى.

ەل پرەزيدەنتىنىڭ تاپسىرماسى بويىنشا ۇكىمەت پەن جەرگىلىكتى اتقارۋشى ورگاندار سۋ تاسقىنىنىڭ سالدارىن ازايتۋعا كۇش سالدى. قوردىڭ بارلىق وكىلدىگى مەملەكەتتىك ورگاندار، ۆولونتەرلىك ۇيىمدار، ازاماتتىق بەلسەندىلەرمەن بىرلەسىپ جۇمىس ىستەي وتىرىپ، ەلدەگى سۋ تاسقىنى جاعدايى ناشارلاعان كەزدەن باستاپ ءتىلسىز جاۋعا قارسى ءىس-قيمىل جانە ولاردىڭ سالدارىن بارىنشا ازايتۋ جونىندەگى جۇمىسقا بەلسەندى قاتىسىپ جاتىر.

شتاب وتىرىسىنا بەينە-كونفەرەنسيا بايلانىس رەجيمىندە قوردىڭ بارلىق 20 وڭىرلىك وكىلدىگىنىڭ باسشىلارى قاتىستى. تابيعي اپاتتىڭ العاشقى كۇندەرىندە توتەنشە جاعداي جاريالانعان وبلىستارداعى وكىلدىك جەتەكشىلەرى تۋىنداعان احۋالعا قاتىستى جەدەل ارەكەت ەتكەنى اتاپ ءوتىلدى: ولار الەۋمەتتىك جەلىلەردە اپات اۋداندارىنداعى تۇرعىندارعا كومەك كورسەتۋ ءۇشىن قاجەتتى زاتتاردى جيناۋ تۋرالى جاريالادى، ادامداردى بوگەتتەر مەن بەكىنىستەر سالۋعا جۇمىلدىردى، ەرىكتىلەردىڭ تاماقتانۋىن ۇيىمداستىردى. قق-نىڭ بارلىق قىزمەتكەرى زارداپ شەككەن وڭىرلەردەن كەلگەن قازاقستاندىقتارعا ءبىر كۇندىك جالاقىلارىن اۋداردى.

شتاب وتىرىسىنا قاتىسۋشىلار بۇعان دەيىن ۋاقىتىلى اتقارىلعان ءىس – قيمىلداردىڭ ماڭىزىن ەرەكشە اتاپ ءوتىپ، سۋ كەتكەن ۋچاسكەلەردى تازارتۋ، ۇيلەر مەن ينفراقۇرىلىمدى قالپىنا كەلتىرۋ جونىندەگى شارالاردىڭ ەكىنشى كەزەڭىن ىسكە اسىرۋ قاجەتتىگىنە نازار اۋداردى. وسىعان بايلانىستى قوستاناي وكىلدىگىنىڭ باسشىسى اماندىق ءامىرحامزين بەلسەندىلەرگە تۇرعىندارمەن كەزدەسۋلەر وتكىزۋدى، ناقتى زالالدى باعالاۋ ءۇشىن اۋداندار مەن اۋىلدىق پۋنكتەرگە بارىپ، ولاردىڭ قانداي كومەككە مۇقتاج ەكەنىن ءبىلۋدى ۇسىندى.

قوردىڭ باتىس قازاقستان وكىلدىگىنىڭ باسشىسى اسىلانبەك گۋباشيەۆ ەرىكتى جاساقتاردىڭ جۇمىسىن ۇيىمداستىرۋدى ۇسىندى: «قازىرگى جۇمىس كولەمى وراسان زور. بىزگە ەرىكتىلەر كەرەك. سۋ تاسقىنى سالدارىن جويۋ جۇمىستارىمەن اينالىساتىن ەر ادامدار تاپشى. سونىمەن قاتار بەي-جاي قاراپ وتىرۋدان اۋلاق بولۋ كەرەك»، - دەدى بەلسەندى.

ارىپتەسىن الماتىدان كەلگەن ميراس بايسەيىتوۆ قولدادى.

«ءبىز زارداپ شەككەن عيماراتتاردى قالپىنا كەلتىرۋ جانە جاڭا ۇيلەر سالۋ ءۇشىن ەرىكتى قۇرىلىس جاساقتارىن قۇرۋ باستاماسىن قولعا الۋىمىز»، - دەدى ول ارىپتەستەرىنە.

سونداي-اق قوعام قايراتكەرى سۋ تاسقىنى سالدارىن جويۋ قىزمەتىنە دەمەۋشىلەردى دە تارتۋ قاجەت دەپ سانايدى. ۇيىمدار تاراپىنان تەحنيكا، قۇرال-جابدىق جانە بىلىكتى مامانداردى جۇمىلدىرۋ كەرەك بولىپ تۇر.

ۇسىنىستاردى تالقىلاۋ بارىسىندا قوردىڭ ەلوردالىق وكىلدىگىنىڭ باسشىسى ءلاززات احاتوۆا زارداپ شەككەندەرگە ءدال وسى ۋاقىتتا وزەكتى بولىپ تۇرعان زاڭگەرلىك كەڭەس بەرۋ ماسەلەسىن قوزعادى.

«اۋىل تۇرعىندارى ۇيلەرىنىڭ قۇجاتتارىن جوعالتىپ نەمەسە عيماراتتار ۋاقىتىلى زاڭداستىرىلماعان، بىرەۋدىڭ مالى ەسەپكە الىنباعان جاعداي تۋىنداۋى مۇمكىن. بۇل ماتەريالدىق زالالدىڭ مولشەرىن ەسەپتەۋ كەزىندە ۇلكەن پروبلەما بولادى جانە مۇندا ءوڭىر تۇرعىندارىنا بىلىكتى قۇقىقتىق كومەك قاجەت بولادى»، - دەدى زاڭگەر ل.احاتوۆا.

سونىمەن قاتار قوعام بەلسەندىلەرى سۋ تاسقىنىنان زارداپ شەككەن وتباسىلاردان شىققان مەكتەپ جاسىنداعى بالالار ءۇشىن جازعى دەمالىستى ۇيىمداستىرۋ باستاماسىن قوزعادى.

قوردىڭ جەتىسۋ وبلىستىق وكىلدىگىنىڭ باسشىسى ءاليا احمەدييەۆا بىلاي دەدى: «وبلىستا بالالار ءۇشىن تابيعاتى باي، تاماشا دەمالىس ورىندارى بار. ءبىز جەرگىلىكتى اتقارۋشى ورگاندارعا دا، وقۋ-اعارتۋ مينيسترلىگىنە دە سۋ باسۋ ايماعىنداعى بالالاردىڭ جازعى دەمالىسىن ۇيىمداستىرۋ بويىنشا ناقتى ۇسىنىستار جولدايمىز».

تۇركىستان وبلىسىنداعى وكىلدىك زارداپ شەككەن وڭىرلەردەگى ۇيلەردى قالپىنا كەلتىرىپ، قايتا سالۋ ءۇشىن وڭتۇستىك ايماقتاردان ەرىكتى وتريادتار جىبەرۋدى ۇيىمداستىرۋدى ءوز قولىنا الۋعا دايىن. وكىلدىك باسشىسى ادەماۋ تولىسبايەۆانىڭ ايتۋىنشا، ءقازىر بۇل ماسەلە قوردىڭ جامبىل وبلىسىنداعى وكىلدىگىمەن بىرلەسىپ پىسىقتالۋدا.

اقتوبە وبلىسىنداعى قق وكىلدىگىنىڭ باسشىسى الەكساندر ماندرىكين العاشقى كۇننەن باستاپ قۇتقارۋ جۇمىستارىنا، ەرىكتىلەر وتريادتارىن جۇمىلدىرۋعا قاتىسىپ، ءۇيى تولىعىمەن سۋ باسقان العالييەۆتەر وتباسىنا قور اتىنان قۇرىلىس ماتەريالدارىن ساتىپ الۋعا كومەك كورسەتكەنى تۋرالى باياندادى. «سۋ تاسقىنىنان العان ساباقتى مۇقيات زەردەلەۋ كەرەك، تاجىريبەلى مامانداردى تارتا وتىرىپ، سۋ جيناۋ ورىندارىن، سۋدىڭ ءجۇرۋ جولدارىن، نىعايتۋ جۇيەلەرىن تەكسەرۋ قاجەت»،- دەدى ا.ماندرىكين.

جيىندى قورىتىندىلاي كەلە، شتاب مۇشەلەرى شۇعىل كومەكتەن باستاپ قالپىنا كەلتىرۋ جۇمىستارىنىڭ بارىسىن ۇيىمداستىرۋعا دەيىنگى بارلىق كەزەڭدەگى ءىس – قيمىلداردى ناقتى ۇيلەستىرۋ قاجەتتىگىن اتاپ ءوتتى.

«ءقازىر بارلىق تاراپتىڭ، جەرگىلىكتى اتقارۋشى ورگانداردىڭ، قوعامدىق ۆولونتەرلىك ۇيىمداردىڭ كۇش-جىگەرىن شوعىرلاندىرۋ قاجەت. وسى كۇردەلى كەزەڭدەگى ازاماتتىق تۇرعىدا بەلسەندىلىك تانىتۋ وزەگى ەرەكشە»، - دەپ قورىتىندىلادى ديرەكتور قۋانىش جارلىقاس.

ايتا كەتەرلىگى، سۋ تاسقىنى كەزىندە «ادىلدىك جانە وركەندەۋ» قورىنىڭ بارلىق 7 قوعامدىق قابىلداۋى اپاتقا بايلانىستى قيىن جاعدايعا تاپ بولعان تۇرعىندارعا گۋمانيتارلىق جۇكتەردى جيناۋ جانە جەتكىزۋ، سونداي-اق ەرىكتىلەردى ۇيلەستىرۋ مىندەتتەرىن اتقارىپ جاتىر.

https://www.instagram.com/reel/C5pdgWvCtgL/؟igsh=OTlnc2FsMHV0dmVl 

 

بۇل ماقالا تۋرالى نە ويلايسىز؟