ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

55 سەكۋندتا 12 سوققى: ليفتىدە ايەلىن ۇرعان ەر ادامدى ەشكىم توقتاتپاعان

17 مامىر 2024 283

ليفتىگە كىرەر كەزدە بۇرىنعى ايەلىن اياۋسىز سوققىعا جىققان ەر ادامنىڭ ۆيدەوسى تارادى، دەپ حابارلايدى Alash.kz.

نەمولچي قوعامدىق قورى جەلىدە تاراتقان ۆيدەودان ەر ادامنىڭ ايەلدى سوڭىنان قۋىپ كەلىپ، ۇرىپ-سوعىپ، تەپكىلەگەنىن بايقاۋعا بولادى. سول ساتتە ليفت كۇتىپ تۇرعان ەكى جىگىت جاعدايدى جاي عانا باقىلاپ، ايەلگە كومەك قولىن سوزبادى.

نەمولچي قوعامدىق قورىنىڭ جەتەكشىسى دينا ءتاڭسارى ايەلدى ۇرىپ جاتقاندا اراشا تۇسپەگەن ەكى جىگىتتىڭ ارەكەتىنە تاڭدانىسىن ءبىلدىردى.  

"ءبىر ەر ادام ايەلدى ۇرادى. ەكەۋى جاي عانا قاراپ تۇرادى. بۇل جاعدايعا تاعى قانداي تۇسىنىكتەمە بەرە الامىن؟ ءبارىن وزدەرىڭىز كورىپ وتىرسىزدار. نەگىزى ايەل بۇل ەركەكپەن اجىراسقان، الايدا ول ونى ۇستاپ الىپ، ۇرىپ-سوعادى. كادرلاردان ونى توقتاتقان بىردە ءبىر ادامدى كورمەدىك. جاي عانا ەر ادامنىڭ قولىن ۇستاپ، ارتقا قايىرعانداي سىڭاي تانىتقاننان باسقا ەشتەڭە ىستەمەدى. “ەكى جىگىت بۇل ىسكە قورىققانىنان ارالاسپادى” دەپ اقتاماڭىزدار. بۇل – جاي عانا ولاردىڭ كۇندەلىكتى كورىپ جۇرگەن كورىنىسى. بۇل ادامدار ليفتتە تالاي زورلىق-زومبىلىققا كۋا بولعان. دەنى ساۋ ادام مۇنداي ارەكەتتى كورگەندە كومەككە اسىعادى. تەك بىزدىكىلەر ەمەس"، – دەپ جازدى دينا ءتاڭسارى.

بۇل ماقالا تۋرالى نە ويلايسىز؟