ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

5 جاستاعى بالانى قاعىپ ولتىرگەن كولىك جۇرگىزۋشىسى مارقۇمنىڭ اتا-اناسىن بالاعاتتاپ، كىناسىزبىن دەگەن

14 مامىر 2024 1532

اتا-اناسى ءۇي اۋلاسىندا وتىرعان 5 جاستاعى بالاسىن قاعىپ كەتكەن كولىك جۇرگىزۋشىسى جازاسىز قالا ما دەپ قورقىپ وتىر. بۇل تۋرالى Informburo جاڭالىقتار قىزمەتى باياندادى. 

قايعىلى جاعداي مامىردا كەشكى ساعات 4-تەر شاماسىندا بولعان. 5 جاستاعى ءالي وعلى زۇلقاينارىن قۇمنىڭ ۇستىندە ويناپ وتىرعان ەكەن. سول جەردە جەڭىل اۆتوكولىك بالانى وتىرعان جەرىندە قاعىپ كەتكەن دەيدى. قاتتى سوققىدان 5 مەترگە دەيىن ۇشىپ كەتكەن ءبۇلدىرشىن بىردەن كوز جۇمعان دەيدى كورشىلەرى.

“تارس ەتكەن دىبىس ەستىلدى. مەن ءيتتى قاعىپ كەتتى مە دەدىم. تۇسىنبەي قالدىق، شىقساق، شاڭ-تۇمان بولىپ كەتتى. جۇگىرىپ بارساق، بالانى قاعىپ كەتكەن ەكەن. بالانىڭ باسى جارىلعان، كيىمى جىرتىلعان”، – دەدى كۋاگەر مارگاريتا ابدراحمانوۆا. 

تۇرعىندار دەرەۋ جەدەل جاردەم شاقىرىپ، بالانىڭ اتا-اناسىنا حابار بەرىپتى. ءبىراق ءالي وعلى زۇلقاينارىندى امان الىپ قالۋ مۇمكىن بولماعان. اۋىر سوققى العان ءبۇلدىرشىن اكەسىنىڭ قولىندا كوز جۇمعان.

“مەن جەردە جاتقان بالانى كورىپ، بىردەن اتا-اناسىن ايعايلاپ شاقىردىم. ءبارىمىز نە ىستەرىمىزدى بىلمەي قالدىق. كولىك جولدىڭ ار جاق بەتىندە تۇر ەكەن. جۇرگىزۋشىسى ۇزاق ۋاقىت شىقپادى. جەدەل جاردەم شاقىرىپ جاتقاندا، بالانىڭ جانىنا كەلىپ، بالاعات سوزدەر ايتتى. ارتىنشا كولىگىنىڭ ماڭىنا بارىپ تەلەفونمەن سويلەستى”، – دەدى اۋىل تۇرعىنى زارينا ساعارايەۆا. 

اۋىل تۇرعىندارى ءبۇلدىرشىندى قاققان كولىك يەسى وسى اۋىلدىڭ تۇرعىنى ءارى مەكتەپتە ءمۇعالىم بولىپ جۇمىس ىستەيدى دەيدى. ال مارقۇمنىڭ تۋىستارىنىڭ سوزىنشە، وقيعا بولعان كۇنى قۇزىرلى ورگان قىزمەتكەرلەرى جۇرگىزۋشىنىڭ جاعدايىنا قاتىستى ساراپتاما جۇرگىزبەگەن، تەرگەۋگە دە الماعان.

“قاققان كولىك جۇرگىزۋشىسىن قامامادى، ەشقانداي شارا قولدانىلمادى. ءتىپتى كەشىرىم سۇراعان جوق. كەشە تۋىستارىمەن كەلىپ، ءوزىنىڭ كىناسىز ەكەنىن ايتىپ، كەرىسىنشە ءبىزدى بالاعاتتاپ كەتتى. مەن كىنالى ايەل ءتيىستى جازاسىن السا دەيمىن. بۇگىن باۋىرىم ءولدى، ەندى ەرتەڭ تاعى بىرەۋدىڭ بالاسى ولەدى. ادىلەتتىلىك ورناۋى ءتيىس”، – دەدى مارقۇمنىڭ اعاسى مۇرات ءابيتوۆ.

وكرۋگ اكىمى دە وقيعادان حاباردار. مۇنداي جاعداي ءبىرىنشى رەت بولدى دەگەن اۋىل باسشىسى ءىستى قۇزىرلى ورگانعا تاپسىردىق دەيدى.

“قيىن جاعداي بولىپ وتىر. بۇل ماسەلەمەن بۇگىندە ەڭبەكشىقازاق اۋدانىنىڭ پوليسياسى اينالىسىپ جاتىر”، – دەدى سايماساي اۋىلدىق وكرۋگىنىڭ اكىمى باقىتجان چۋرماكوۆ.

الماتى وبلىستىق پوليسيا دەپارتامەنتى قىلمىستىق كودەكستىڭ 345-بابى "كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋ" بابى بويىنشا ءىس قوزعالعانىن ايتادى.

“كولىك جۇرگىزۋشىسى ۋاقىتشا ۇستاۋ يزولياتورىنا قاماۋعا الىندى. جول كولىك وقيعاسى بويىنشا قاجەتتى ساراپتامالار تاعايىندالۋىمەن قىلمىستىق ءىس تىركەلدى”، – دەپ مالىمدەدى الماتى وبلىسى پوليسيا دەپارتامەنتىنىڭ رەسمي وكىلى مەرۋەرت مورياكوۆا.

بالاسىنان ايىرىلعان وتباسى قىلمىسكەردىڭ ءتيىستى جازاسىن العانىن قالايدى. ەگەر وبلىس دەڭگەيىندە ماسەلە شەشىلمەسە، جوعارعى سوتقا شاعىمدانباق.

بۇل ماقالا تۋرالى نە ويلايسىز؟