ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"40 كۇن بويى 50 گرادۋسقا دەيىن ىستىق بولادى": سينوپتيكتەر WhatsApp-تا تاراعان اقپاراتقا پىكىر ءبىلدىردى

04 ماۋسىم 2024 625

اۋا تەمپەراتۋراسى سەلسيي بويىنشا 50 گرادۋسقا دەيىن كوتەرىلەدى. عالىمداردىڭ ايتۋىنشا، مۇنداي قۇبىلىس 60 جىلدا ءبىر رەت بولادى ەكەن. بۇل جالعان، دەپ جازادى Alash.kz سايتى stopfake.kz-كە سىلتەمە جاساپ.

اۋا تەمپەراتۋراسىنىڭ رەكوردتىق كورسەتكىشكە دەيىن كوتەرىلۋى تۋرالى فەيك بۇرىننان بار. ءبىزدىڭ سايت بىلتىر ماۋسىم ايىندا تاراعان وسى سياقتى اقپارات تۋرالى جازعان بولاتىن.

"قازگيدرومەت" رمك بيىل تاراعان اقپاراتقا قاتىستى پىكىر ءبىلدىردى.

"ماۋسىمدىق بولجامدار كونسۋلتاتيۆتىك بولىپ تابىلادى. ولار قىسقا مەرزىمدى بولجامدارمەن ناقتىلانىپ وتىرادى. "قازگيدرومەت" ءبىر تاۋلىككە، 3 كۇنگە جانە ءبىر اپتاعا بولجام جاسايدى. ايلىق بولجامداردىڭ تەك 70% عانا ورىندالادى.

قازاقستاندا قۋاڭ دالا ايماقتار بار. اتاپ ايتقاندا، تۇركىستان وبلىسى. بۇل وڭىردە جازدا اۋا تەمپەراتۋراسىنىڭ 40 گرادۋسقا دەيىن كوتەرىلۋى قالىپتى جاعداي.

الەمنىڭ بىردە-بىر ەلىندە سينوپتيكتەر تۇتاس ءبىر ماۋسىمعا بولجام جاسامايدى. ولار جورامالداپ ايتادى. دامىعان ەلدەردە بولجام ءبىر كۇنگە، 3 كۇنگە جانە ءبىر اپتاعا جاسالادى. ەسەسىنە، اپتالىق بولجامدار دا ناقتىلانادى. بولجام ۇزاق مەرزىمگە جاسالسا، ول ناقتى جاعدايعا سايكەس بولمايدى.

ينتەرنەتتە جاريالانعان اقپاراتقا ەمەس، تەك رەسمي دەرەككوزدەرگە عانا سەنىڭىز.

الداعى جازعا ارنالعان كونسۋلتاتيۆتىك بولجاممەن ءبىزدىڭ رەسمي پورتالىمىزدا تانىسا الاسىزدار"، – دەپ حابارلادى inbusiness.kz سايتى "قازگيدرومەت" رمك باسپا ءسوز قىزمەتىنە سىلتەپ.

بۇل ماقالا تۋرالى نە ويلايسىز؟