ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

4-قاباتتان قۇلاپ كەتپەك بولعان بالانى قۇتقارىپ قالعان باتىردىڭ اناسىنا ۇيالى تەلەفون سىيلاندى

23 مامىر 2024 1995

استانا قالاسىنداعى ءتۇرعىۇ ۇيلەردىڭ ءبىرىنىڭ 4-قاباتىنان قۇلاپ كەتپەك بولعان كىشكەنتاي بالانى ءوز ەرلىگىمەن قۇتقارىپ قالعان 7-سىنىپ وقۋشىسىنىڭ اناسىنا "رەسپۋبليكا" پارتياسىنىڭ اتىنان ۇيالى تەلەفون سىيلاندى، دەپ حابارلايدى Alash.kz.

«ءسىز نەنى ارماندايسىز؟»،- دەپ سۇرادى ايداربەك قوجانازاروۆ جاقىندا جوعارعى قاباتتان قۇلاپ بارا جاتقان بالانى قۇتقارعان ون ءتورت جاسار باتىردان. «انامنىڭ جاڭا تەلەفونى بولسا»، - دەپ جاۋاپ بەردى اقان.

"رەسپۋبليكا" پارتياسىنىڭ ينستاگرام پاراقشاسىنداعى جازبادا، بۇگىن №31 مەكتەپ-گيمنازيانىڭ 7 سىنىپ وقۋشىسى اقان اكىمجانوۆ Respublica پارتياسىنىڭ ەلوردالىق كەڭسەسىندە بولعانى جازىلدى. اتا-اناسى زۋحرا مەن اسقار اكىمجانوۆپەن بىرگە ول پارتيا ءتوراعاسى، ق ر پارلامەنتى ءماجىلىسىنىڭ دەپۋتاتى ايداربەك قوجانازاروۆپەن كەزدەستى.

جەتىنشى سىنىپ وقۋشىسى استانا قالاسىندا بولعان قايعىلى وقيعانىڭ الدىن الدى. 20 مامىردا ەلوردا تۇرعىن ءۇي كەشەندەرى ءبىرىنىڭ اۋلاسىندا الاڭسىز ويناپ جۇرگەن بالالار 4-قاباتتاعى بالكوننان شىرىلداپ، قولى تالعاننان قۇلاي جازداپ تۇرعان بالانى كوردى. ويىن بالالارىنىڭ اراسىندا جۇرگەن اقان كوپ ويلانباستان، كوپقاباتتى ۇيگە جۇگىرىپ كىرىپ، بالانى قۇتقاردى.

ەرلىگىمەن ەلدى سۇيسىندىرگەن ەر بالا كوپبالالى وتباسىنان شىققان ەكەن. كىشكەنتايلارعا قامقورلىق جاساپ داعدىلانعان ول سىن ساعات تۋعان جاعدايدا ونىڭ باۋىرلارىنا دا باسقا بىرەۋ جاناشىرلىق تانىتىپ، كومەكتەسەر ەدى، دەيدى.

پارتيالىقتار اقانعا ايپاد سىيلاماق بولعان ەدى. ەندى وعان قوسىپ، باتىرىمىزدىڭ اناسىنا دا جاڭا تەلەفون تابىستايتىن بولدى.

«ۇل تاربيەسى - ۇلت تاربيەسى، دەيدى حالىق. ءسىز جاقسى ۇل تاربيەلەدىڭىز، ول ناعىز باتىر بولىپ ەر جەتتى. مەيىرىمدىلىك پەن باتىلدىق سياقتى قاسيەتتەر بارىنشا كەڭىنەن ناسيحاتتالۋى ءتيىس! سىزگە جانە شاڭىراعىڭىزعا اماندىق پەن جارقىن بولاشاق تىلەيمىن!»- دەدى پارتيا باسشىسى بالانىڭ اتا-اناسىنا ريزاشىلىعىن بىلدىرە وتىرىپ.

بۇل ماقالا تۋرالى نە ويلايسىز؟