ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

25 جىل بويى جەتىم قىز ەكەنىن بىلمەگەن ارۋ اتا-اناسىن ىزدەستىردى

23 مامىر 2024 263

25 جىل بويى جەتىم قىز ەكەنىن بىلمەگەن ايدانا ەستەنبايەۆا ەسىمدى قىز اتا-اناسىن ىزدەيدى، دەپ حابارلايدى Alash.kz Stan.kz سايتىنا سىلتەمە جاساپ

ايدانا 1988 جىلى 2 ساۋىردە تارازداعى پەرزەنتحانادا دۇنيەگە كەلىپتى. كوپ ۇزاماي “ءۇمىت” سابيلەر ۇيىنە وتكىزىلگەن. 

ول باسىندا ىزدەيمىن دەپ ماعان قاعازداردى بەردى. ول كەزدە جاس بولعان سوڭ قالاي ىزدەيتىنىمىزدى بىلمەدىك. قاعازدا تەك ماقاشيەۆا. ش.، 1970 دەپ جازىلعان. تۋۋ تۋرالى كۋالىگىنە ابدۋلينا ماريانا كوڭىلقوسوۆنا دەپ قالدىرعان. ول “مەن قازاقپىن با، ۇلتىم كىم” دەگەن سۇراقتارعا باس قاتىردى. ماقاشيەۆا. ش دەگەنگە ىزدەۋ سالساق، قازاقستان بازاسىندا مۇلدە جوق دەيدى، – دەيدى ايدانانىڭ قۇربىسى باقىتگۇل ءادىلوۆا.

ايدانا ەستەنبايەۆانى قازىرگى اتا-اناسى 1991 جىلى ءۇش جاسىندا اسىراپ العان ەكەن. ول ءوزىنىڭ جەتىم قىز ەكەنىن 10 جاسىندا بىلگەن. قازىرگى تاڭدا ايدانانىڭ ءوزى اقتاۋ قالاسىندا تۇرمىستا، ءتورت بالاسى بار ەكەن. 

ءوز اتا-انامدى ىزدەۋدى 2012 جىلدان باستادىم. جولداسىم دا قولدادى. بيولوگيالىق انام وسى باتىستىڭ توڭىرەگىندە دەپ ەستىدىم. جۇرەگىمنىڭ تۇبىندە انامدى تاباتىنىما سەنەمىن. كوپ ادامدار مەنى تۇسىنبەيدى. “باقتى، قاقتى، راقمەتى قايدا” دەپ ايتادى. “بالا تاپقاندىكى ەمەس، قاققاندىكى” دەپ جاتادى. شىنىمدى ايتايىن مەنى باعىپ-قاققان اتا-اناما، باۋىرلارىما ريزامىن. ءبىراق ءبارىبىر دە ادامدا “ءبىر كەم دۇنيە-اي” دەگەن بولادى. بىردەڭە جەتىسپەي تۇرادى. ەشكىم بالاسىن جايدان جاي تاستاپ كەتپەيدى عوي. مەن “قايدان كەلدىم، اتا-انام كىم” دەگەن ساۋالعا جاۋاپ تاپقىم كەلەدى. مۇمكىن ونىڭ دا باسىندا ءبىر قيىن جاعداي بولعان شىعار. ەشكىم بالاسىن سەبەپسىز تاستاپ كەتپەيدى، – دەيدى ايدانا. 

ايدانا انامنىڭ ءتىرى بولعانىن قالايمىن، ءوز كوزىممەن كورىپ، قۇشاقتاعىم كەلەدى دەيدى.

ءقازىر ءتىرى يا قايتىس بولىپ كەتتى مە دەگەن ساۋال 50-دە 50 بولىپ تۇر. ءتىرى بولعانىن قالايمىن. كورگىم كەلەدى. انام ءقازىر ورتا جاستاعى، اقىل توقتاتقان، مەنى ىزدەپ، كورگىسى كەلەتىن شىعار دەپ ويلايمىن. ماعان اسىراپ العان انام “ايدانا” دەگەن ەسىم بەردى. ال نەگىزگى، شىن ەسىمىم “مارياننا” بولعان، – دەدى ايدانا. 

“ءۇمىت” سابيلەر ءۇيىنىڭ قىزمەتكەرلەرى قۇلپىناي ايتنازاروۆانىڭ سوزىنشە، “مارياننا”دەگەن ەسىم سول كەزدە تەلەديداردان كورسەتىلىپ جاتقان “بايلار دا جىلايدى” دەگەن تەلەحيكايادان الىنعان ەكەن. 

ول كەزدە “مارياننا”، “زاۋرا” دەگەن كينولار بولىپ جاتتى عوي. سوعان قاراپ پەرزەنتحانادا بالالاردىڭ ەسىمى سولاي قويىلىپ كەلىپ جاتقانىن بىلەمىن. بىزگە ول جاقتان 7-8 كۇندە، شاقالاق كۇيىندە كەلەدى. ءبىز قازاقيلىعىمىزعا سالىنىپ، ولاردىڭ ءسابي كۇنىن ۇمىتپايمىز. قىرقىنان شىعارىپ، شاشىن، تىرناعىن الىپ، قىرىقتىققا سۋعا ءتۇسىرىپ، شومىلدىراتىنبىز، – دەدى “ءۇمىت” سابيلەر ءۇيىنىڭ قىزمەتكەرى قۇلپىناي ايتنازاروۆا.

سابيلەر ءۇيىنىڭ تاربيەشىسى ول زاماننان تەك “مارياننا” دەگەن ەسىمدى ەسكە تۇسىرە الدى. ول كەزدە مەكەمەگە وتە كوپ بالا تۇسكەندىكتەن باسقا مالىمەت ەستە جوق دەيدى.

بالا كۇندەگى سۋرەتتەرىنە قاراپ تانىسىمدى كورگەندەي بولدىم. ءبىراق سول جىلدارى سابيلەر ۇيىنە تۇسكەن بالالاردىڭ سانىندا ەسەپ بولمادى. وتە كوپ ەدى. بالالار دا ءبىراز قيىنشىلىق كوردى. ءبارىمىزدىڭ كۇش-قۋاتىمىزدىڭ ارقاسىندا امان قالدىق. سوندىقتان ول ءساتتى ەسكە ءتۇسىرۋدىڭ ءوزى قيىن، – دەدى “ءۇمىت” سابيلەر ءۇيىنىڭ تاربيەشىسى راديمحان حارسييەۆا. 



بۇل ماقالا تۋرالى نە ويلايسىز؟