ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

2000 ەسەك: جامبىل وبلىسىنىڭ تۇرعىندارى ەسەك باققان شارۋاشىلىقتان الاڭدايدى

17 ماۋسىم 2024 883
قازاقتا "ەسىڭ كەتسە، ەشكى ب ا ق" دەگەن ءسوز بار ەدى. بۇل، ءسىرا، ەشكى جارىقتىقتىڭ ءوسىمتالدىعىنا بايلانىستى ايتىلسا كەرەك. ال ەندى "ۇيىرلەپ" ەسەك باققاندارعا نە دەيمىز؟ بۇل تۋرالى Alash.kz اقپارات پورتالى جامبىل وبلىسىندا تۇراتىن بەلگىلى جۋرناليست كوسەمالى ءساتتىباي ۇلىنىڭ جازباسىنا وراي ماتەريال جاريالايدى. 
 
اۆتور "باياعىدا ەسى بار قازاق ءبىر ەسەكتەن ارتىق ۇستامايتىن. ويتكەنى ءۇيدىڭ بار شارۋاسى ءبىر ەسەكتەن ارتىلمايتىن. ءقازىر شە؟ ءقازىر، ءتىپتى، ەسەككە قاراپ تۇرعان شارۋا دا جوق. سوندا مىنا مىڭعىرعان ەسەكتى نە ءۇشىن باعىپ-قاعىپ، ۇستاپ وتىر؟" دەپ، جامبىل وبلىسىنىڭ بايزاق اۋدانىنان حابارلاسقان تۇرعىنداردىڭ سۇراڭىن جاريالاپتى.
وندا بايزاق تۇرعىندارى: 
-اۋدانىمىزداعى شاحان اۋىلىندا ايتالى دەگەن بىرەۋ 2000 قارالى ەسەك باعىپ وتىر. ولارى اۋىلداعى جايىلىمدىقتى جايپاپ، اقتاقىرعا اينالدىرىپ تاستادى. يەسىمەن سويلەسىپ، مىنا "مالىڭدى" الىپ كەت دەيىن دەسەك، كەلمەيدى. بايلانىسقا دا شىقپايدى،-دەيدى.
سوڭعى جىلدارى "ەسەكتىڭ ەتىن كەيبىر ءدامحانالار مەن شۇجىق سەحتارىنا، سامسا، شاشلىك جاسايتىندارعا وتكىزەتىندەر پايدا بولىپتى" دەگەن اڭگىمە شىعا باستادى. جۇڭگو ەلىنە يمپورتتايدى دەيتىندەر دە بار.
 
 
"اۋدان تۇرعىندارىنىڭ دا الاڭداپ وتىرعاندارى وسى ساۋالدارعا جاۋاپ تابا الماعاندارىنان. ەگەر ەسەكتەردىڭ يەسى شارۋاسى زاڭدى ادام بولسا، وندا ول نەگە تۇرعىندارمەن جولىعىپ، بيزنەس- جوسپارىمەن تانىستىرمايدى؟ مۇنشاما ەسەكتەردى نە ىستەمەك؟ كۇش كولىك قىلا ما، الدە "ازىق-تۇلىك" قىلا ما؟ ءمان-جايىن ايتىپ، تۇسىندىرمەي مە حالىققا؟" دەيدى ارداگەر جۋرناليست.
 
Alash.kz اقپارات پورتالى بۇل ساۋالدى جامبىل وبلىستىق اۋىل شارۋاشىلىعى باسقارماسىنا، وبلىستىق سانيتارلىق- ەپيدەميالىق ستانسياسىنا جولداي وتىرىپ، ەكى مىڭداي ەسەكتىڭ ەسەبىن الىپ، قوجايىنىمەن سويلەسىپ،ەسەك باققان شارۋاشىلىق يەسىنىڭ ماقسات-مۇددەسىن انىقتاۋ قاجەت.
ەلدى الاڭداتپايىق! ويتكەنى، ەرتەڭ ەسەكتىڭ ەتى قازاقتىڭ قارا قازانىنان شىعىپ جۇرمەسىن؟ بالا باقشا، مەكتەپ اسحانالارى مەن كافەلەردى دە تەكسەرۋ قاجەت.
اتتارى اتالعان مەكەمە باسشىلارىنان جاۋاپ كۇتەمىز! 
بۇل ماقالا تۋرالى نە ويلايسىز؟