ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

165 كۇن قاماپ ۇستاعان: گۇلميرا ساتىبالدىنىڭ سوتىندا جانتۇرشىگەرلىك دەرەكتەر ايتىلۋدا

03 ماۋسىم 2024 1083

سوتتا جابىرلەنۋشى اباي ءجۇنىسوۆ وزىنە كورسەتىلگەن قىسىم تۋرالى ايتىپ بەردى. الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدى مەن ونىڭ بۇرىنعى جۇرگىزۋشىسى ءمادي باتىرشايەۆقا قاتىستى كاسىپكەردى بوپسالاۋ جانە زاڭسىز باس بوستاندىعىنان ايىرۋ ءىسى بويىنشا سوت تالقىلاۋى باستالدى، دەپ جازادى Alash.kz سايتى inbusiness.kz-كە سىلتەپ. 

جابىرلەنۋشى BAUR Kazakhstan كومپانياسىنىڭ بۇرىنعى يەسى اباي ءجۇنىسوۆ ءوز ايعاقتارىندا قالاي 165 كۇن بويى ۇيىندە قاماۋدا بولعانىن، قىسىمعا ۇشىراپ، بيزنەسىن تارتىپ العانىن ايتىپ بەردى. ايتۋىنشا، بۇل وقيعا  2019 جىلدىڭ اقپان ايىنان باستالعان. سول كەزدە گۇلميرا ساتىبالدى باستاعان توپ ونى اتا-اناسىنىڭ ءۇيىنىڭ جانىندا ۇرلاپ اكەتكەن.

"13 اقپاندا مەن قالقامانداعى انامنىڭ مەكەنجايىندا بولعانىمدا، دوسىم ەكەۋمىز سىرتقا شىعىپ، كولىككە وتىرماق بولدىق. وسى كەزدە گۇلميرا ءوزىنىڭ جۇرگىزۋشىسى ءمادي باتىرشايەۆپەن جانە بىرنەشە قىزمەتكەرمەن بىرگە كەلدى. ول ءوزىن اگرەسسيۆتى ۇستاپ، ەشتەڭە تۇسىندىرمەدى. ءمادي بىرەۋمەن تەلەفون ارقىلى سويلەسىپ تۇردى. ال گۇلميرا ماعان ونىڭ وپگ مۇشەسىمەن سويلەسىپ جاتقانىن ايتىپ قورقىتتى. سودان كەيىن پسيحولوگيالىق قىسىممەن مەنى كولىككە وتىرعىزدى. ەگەر ايتقانىنا كونبەسەم، مىلتىقتى اۋزىما تاقاپ، اكەتەتىنىن ايتتى"، – دەدى اباي ءجۇنىسوۆ.

كەيىن ونى "گاۋحارتاس" تك-دەگى BAUR Kazakhstan كەڭسەسىنە اكەلگەن. كىرە بەرىستە بەتپەردە كيگەن ادامدار قارسى العان. كەڭسەدە ونىڭ اعاسى قاسىم مەن ساتىبالدى بولعان. ولار ابايعا بيزنەستى ۇرلادى دەپ جالا جاپقان.

"ول ۇستىمە ءبىر بوتەلكە سۋ قۇيىپ جىبەردى. ەگەر مەن مويىنداماسام جانە اكتيۆتەر بەرمەسەم، تومەندەگى وپگ مۇشەلەرى مەنى ءوز ءقابىرىمدى قازۋ ءۇشىن ورمانعا اپاراتىنىن ايتىپ قورقىتتى"، – دەپ ەسكە الادى جابىرلەنۋشى.

ءجۇنىسوۆتىڭ ايتۋىنشا، ونى 2019 جىلدىڭ 14 اقپانىنان 28 ماۋسىمىنا دەيىن 165 كۇن بويى وقشاۋلانعان قارعالى شاعىناۋدانىنداعى ۇيىندە ۇستاعان.

"مەنى تاۋلىك بويى كۇزەتپەن ۇستادى، ۇيدەن شىعا المادىم. ال ساتىبالدىنىڭ ىقپالىنا بايلانىستى قۇقىق قورعاۋ ورگاندارىنان كومەك تە سۇراي المادىم. 18 اقپاندا ايەلىم مودەمدى ۇيدەن شىعارۋعا تىرىسقان كەزىندە قولىن تەرەڭ كەسىپ جىبەرگەن. جەدەل جاردەم شاقىرىپ، جۇبايىما كومەكتەسۋگە تىرىستىم. ال باتىرشايەۆ جەدەل جاردەمنىڭ كەلۋىنە جول بەرمەدى. كەيىن پوليسياعا قوڭىراۋ شالدىم. ال پوليسيا قىزمەتكەرلەرى وتباسىلىق-تۇرمىستىق جانجال شەشىلىپ قويىلعانىن ايتتى. كەيىن باتىرشايەۆ ماعان گۇلميرانىڭ حابارلاسقانىن جەتكىزدى. ول ايەلىمدى پسيحياتريالىق اۋرۋحاناعا جاتقىزىپ، مەنى ولتىرەمىن دەپ قورقىتتى"، – دەپ قوستى جابىرلەنۋشى.

ءجۇنىسوۆتىڭ ايتۋىنشا، 2019 جىلدىڭ ناۋرىز ايىندا قايرات ساتىبالدى جەكە كەزدەسۋى ءۇشىن "قايسار پلازاعا" شاقىرعان.

"گۇلميرا ساتىبالدى ماعان بۇل ءبىزدىڭ سوڭعى كەزدەسۋىمىز بولۋى مۇمكىن ەكەنىن ايتتى. مەنى قايرات ساتىبالدى كەڭسەسى ورنالاسقان جوعارعى قاباتقا اپاردى. گۇلميرا ماعان تاعى دا ۇرلىق جاسادى دەپ جالا جابا باستادى. بۇعان كىنالى ەمەس ەكەنىمدى ءتۇسىندىردىم. سودان كەيىن قايرات مەنى جارىقسىز كورشى كابينەتكە اپارىپ، ۇرلىققا قاتىسىمدى سۇراپ، جاۋاپ الا باستادى. ول “ەگەر مەن قاشۋعا تىرىسسام، قاي جەردەن بولسىن الىپ كەتەتىنىن ايتتى"، – دەدى اباي ءجۇنىسوۆ.

سونداي-اق اباي ءجۇنىسوۆ "قازاقتەلەكومعا" تيەسىلى جابدىق ارقىلى وتىرىك دەتەكتورىنان وتۋگە ءماجبۇر بولعان. ساتىبالدىنىڭ جۇبايى، سول ارقىلى شەتەلدەگى اكتيۆتەر مەن مۇلىك تۋرالى اقپاراتتى بىلۋگە تىرىسقان.

بۇل ماقالا تۋرالى نە ويلايسىز؟