ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

11،6 ملن تەڭگە: بقو رەكتورى پارا العان

31 مامىر 2024 435

م.وسپانوۆ اتىنداعى باتىس قازاقستان مەديسينا ۋنيۆەرسيتەتىنىڭ رەكتورى جەمقورلىققا بايلانىستى كۇدىككە ءىلىندى. بۇل تۋرالى Alash.kz سايتى سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى مالىمدەدى.

اگەنتتىك مالىمەتىنشە، ول الماتى قالاسىندا كاسىپكەردەن 11،6 ملن تەڭگە كولەمىندە پارا العان.

الماتى وبلىسىنىڭ سىبايلاس جەمقورلىققا قارسى قىزمەتى «م.وسپانوۆ اتىنداعى باتىس قازاقستان مەديسينا ۋنيۆەرسيتەتى» كەاق باسقارما ءتوراعاسىن اشكەرەلەدى. ول مەديسينالىق جابدىقتاردى مەملەكەتتىك ساتىپ الۋ شارتتارى بويىنشا بيۋدجەت قاراجاتىن كەدەرگىسىز اۋدارعانى ءۇشىن الماتى قالاسىنىڭ كاسىپكەرىنەن 11،6 ملن تەڭگە كولەمىندە پارا العان، - دەلىنگەن حابارلامادا.

سوتتىڭ سانكسياسىمەن كۇدىكتى قاماۋعا الىندى. تەرگەۋ جالعاسىپ جاتىر. قىلمىستىق-پروسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.

كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

بۇل ماقالا تۋرالى نە ويلايسىز؟