ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

1،1 ملرد تەكشە مەتر سۋ: ارالعا تولا باستادى

24 ماۋسىم 2024 553

سولتۇستىك ارالدىڭ سۋى تولىپ كەلەدى. تەڭىزگە 1،1 ملرد تەكشە مەتر سۋ كەلدى، - دەپ حابارلايدى Alash.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ. 

وسىلايشا، بۇگىندە سولتۇستىك ارالداعى سۋ كولەمى 21،4 ملرد تەكشە مەترگە جەتكەن. قۇرامىنا قازاقستان، قىرعىزستان، تاجىكستان، تۇرىكمەنستان جانە وزبەكستان كىرەتىن مەملەكەتارالىق سۋ شارۋاشىلىعى كوميسسياسىنىڭ 86-شى وتىرىسىندا تاراپتار سۋارۋ ماۋسىمىندا سولتۇستىك ارالعا اعىن سەكۋندىنا كەمىندە 30 تەكشە مەتر بولادى جانە 997 ملن تەكشە مەتر سۋ جىبەرىلەدى دەپ كەلىستى. ءقازىر تەڭىزگە سەكۋندىنا 50 تەكشە مەتر سۋ كەلەدى. ءبىر جىل بۇرىن اعىن سەكۋندىنا 6 تەكشە مەتر بولاتىن.

وسىعان دەيىن سولتۇستىك ارالدى وڭتۇستىكتەن ءبولىپ تۇرعان كوكارال بوگەتىنىڭ قۇرىلىسى اياقتالعان بولاتىن. بوگەت سولتۇستىك ارالدا سۋ دەڭگەيىن كوتەرۋگە مۇمكىندىك بەردى.

"بوگەت پايدالانۋعا بەرىلگەننەن بۇگىنگى كۇنگە دەيىن سىرداريا وزەنىنەن سولتۇستىك ارال تەڭىزىنە 46،6 ملرد تەكشە مەتر سۋ كەلدى. ال سوڭعى 7 جىلدا تەڭىزگە 13،3 ملرد تەكشە مەتر سۋ ءتۇستى. سوڭعى جىلدارى سولتۇستىك ارالدىڭ سۋ كولەمى ازايدى، الايدا 2024 جىلدىڭ باسىنان باستاپ دەڭگەيى قايتا كوتەرىلە باستادى جانە بۇگىندە 21،4 ملرد تەكشە مەترگە جەتتى"، - دەدى سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا.

ايتا كەتەيىك، سىرداريا وزەنى اعىنىنىڭ 75 پايىزى قىرعىزستاندا، 20 پايىزى وزبەكستاندا جانە 5 پايىزى قازاقستاندا قالىپتاسادى.

بۇل ماقالا تۋرالى نە ويلايسىز؟