ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

100 مىڭ تەڭگەگە ساتىپ الدى ما: ءبىرقاتار انشىلەر “ق ر قۇرمەتتى ازاماتى” اتاعىنا يە بولدى (فوتو)

06 ماۋسىم 2024 857

كۇنى كەشە وتاندىق ونەر جۇلدىزدارى ەرەكشە ماراپاتقا يە بولدى.“قازاقستاننىڭ قۇرمەتتى ازاماتى” اتاعىن بىرنەشە ونەر وكىلدەرى يەلەندى. بۇل تۋرالى Alash.kz ۇلتتىق پورتالى Stan.kz سايتىنا سىلتەمە جاساپ حابارلايدى.

ونەر جۇلدىزدارى سۋ جاڭا اتاقتارىن جەكە پاراقشالارىندا جاريالاپ، قۇتتىقتاۋ قابىلداۋدى باستاپ كەتكەن. 

“بۇگىن نەگىزى مەن قانداي ماراپات الاتىنىمدى بىلمەي كەلدىم. قوعامدىق مەدال “قازاقستان رەسپۋبليكاسىنىڭ قۇرمەتتى ازاماتى” توسبەلگىسى بۇيىرىپتى. راقمەت، ەلىم! ونەرىممەن حالىققا قىزمەت ەتۋدەن جالىقپايمىن.ءالى دە ۇلكەن جۇمىستار كۇتىپ تۇر. مەنىڭ ومىرلىك باستى ۇستانىمىم – تازا ەڭبەك،تازا جول. بۇل مەملەكەتتىك ناگرادا ەمەس، قوعامدىق ماراپات!”، – دەپ قۋانىشىن ءبولىستى رۋحيا بايدۇكەنوۆا. 

ودان كەيىن ءانشى نۇرجان قالجان دا كەۋدەسىنە تاققان وردەنىن قۋانا كورسەتىپ، سۋ جاڭا اتاعى شابىت سىيلايتىنىن جاسىرمادى. 

“بۇگىن استانادا وسىنداي ماراپاتقا يە بولدىم اعايىن. "قازاقستان رەسپۋبليكاسىنىڭ قۇرمەتتى ازاماتى" توسبەلگىسىنە يە بولدىم. قۇتتىقتاپ شابىت بەرىپ قويىڭىزدار. "بولار ەلدىڭ بالاسى ءبىرىن ءبىرى باتىرىم دەر" دەپ، قولداپ قۋانىشىمدى قۋانىشقا جالعاپ جاتساڭىزدار سودان اسقان باقىت جوق مەندە. بۇل جاي توسبەلگى، دەگەنمەن دە ءوزىم شابىت الىپ، ءالى الدا تالاي جۇمىس تۇرعانىن سەزىنىپ قايتتىم"، – دەپ جازدى نۇرجان حالجان. 

 

سونىمەن قاتار اتاق يەلەنگەندەر اراسىندا ءانشى فاريدا جولداسوۆا، اكتەر ەركەبۇلان توقتار، اكتريسا جۇلدىزاي دۇيسەنبييەۆا دا بار. 

“ق ر قۇرمەتتى ازاماتى اتتى ماراپات الدىم. جاستارعا ۇلكەن شابىت! سەنىمدەرىڭىزگە راحمەت! قۇتتى بولسىن!”، – دەپ اعىنان جارىلدى فاريدا جولداسوۆا. 

“اتا-انامنىڭ جەڭىسى. قولداعاندارىڭىزعا راقمەت! اللاعا شۇكىر”، – دەپ جازدى اكتريسا جۇلدىزاي دۇيسەنبييەۆا. 

جەلى قولدانۋشىلارى ءتۇرلى پىكىر ءبىلدىرىپ، قۇتتىقتاپ جاتىر. 

“اسپاننان اتاق جاۋعان كۇن بولىپتى”، “قاي ەڭبەگى ءۇشىن بەرىلىپتى”، “دۇرىس ەكەن، بارىڭىزگە قۇتتى بولسىن!”، “فونوگراممامەن ءان ايتقانى ءۇشىن بەرىلگەن شىعار”، “لايىقسىزدار، جاساي بەرىڭىزدەر، قازاق ونەرىنىڭ جارىق جۇلدىزدارى”، – دەپ جازىپ جاتىر وقىرمان قاۋىم.

ءماجىلىس دەپۋتاتى امانجول ءالتاي وسىنداي مەدالداردىڭ 100 مىڭ تەڭگەگە ساتىلاتىنا تۋرالى بايانداعان ەدى. 

«ءسىز 50 مىڭ تەڭگەگە پىسىقاي ۇيىمنىڭ اتىنان «قازاقستاننىڭ ەڭبەك سىڭىرگەن قىزمەتكەرى» مەدالىنە، ال 100 مىڭ تەڭگەگە «قازاقستاننىڭ قۇرمەتتى ازاماتى» اتاعىنا يە بولاسىز. سان عاسىرلىق ەلدىك تاريحىمىزدا «ۇلت ۇستازى» دەپ حالىق ۇسىنعان ساۋلەلى ءسوزدى قاستەرلەپ احمەت بايتۇرسىنۇلىنا عانا قولداناتىن ەدىك، ءقازىر «ۇلت ۇستازى» دەگەن اتاقتى بار بولعانى 10 مىڭ تەڭگەگە ساتىپ الا سالاسىز»، - دەيدى ول ءماجىلىستىڭ جالپى وتىرىسىندا.

 

 

بۇل ماقالا تۋرالى نە ويلايسىز؟