Balabıevtiń aıtýynsha, Jambyl oblysy aǵyn sýdy transshekaralyq ózenderden alady. Onyń 82 paıyzy Qyrǵyz Respýblıkasynan keledi. Osy jyldyń shilde-tamyz aılarynda Qyrǵyzstannan beriletin 3,5 mln tekshe metr sýdyń taýsylýyna baılanysty berilgen sý toqtatylǵany belgili. Osyǵan baılanysty shilde-tamyz aılarynda Jambyl oblysynyń alty aýdanynda aǵyn sý tapshylyǵy oryn alyp, 9 myń gektar alqaptaǵy egis zardap shekken. Shyǵyn kólemi 3,6 mlrd teńge. Jambyl men Túrkistan oblysynda sýarmaly jerler 300-500 myń gektarǵa jerge deıin jetedi.
«Bul oblystyń bári transshekaralyq aýyl sharýashylyǵy óńiri bolǵandyqtan sý ár ýaqytta qajet. Ózińiz Jambyl oblysyn basqarǵan tusta sharýalardy sýdan taryqtyryp aldyńyz. Sý salasynyń mınıstri bolyp júrgen kezde maqtashylarǵa sý jetkize almadyńyz. Kúngeıdegi sharýalardyń shyryldap júrgende kúz de ótip ketti. Bizdiń elimizde beriletin transshekaralyq ózen sýlaryn arttyrý máselesi qarastyryla ma? Máseleni qandaı joldarmen sheshpeksizder? Qashanǵy kisideginiń kilti aspanda demekshi kórshilerdiń kóńiline qaraımyz? Kiriptarlyqtan qutylatyn kún bar ma? Bıylǵy qurǵaqshylyqtyń keleshekte qaıtalanbaýyna qandaı kepildikter bar?» - dep surady mınıstrden depýtat.
Bul suraqqa jaýap bergen mınıstr Nurjigitov rasynda da, bıyl Jambyl oblysynda sý tapshylyǵyna baılanysty sharýa qojalyqtar zardap shekkenin aıtady. Bul jalpy «jyldyń Jambyl oblysyndaǵy Talas pen Shý ózeni boıynsha sýlyǵyna baılanysty boldy» deıdi. Sebebi Qyrǵyzstanda sý mólsheri sondaı deńgeıde boldy dep túsindiredi.
«Al endi transshekaralyq ózender boıynsha kelisimdi qalaı júrgizemiz? Qyrǵyzstanmen mysaly 2000 jyly ekijaqty transshekaralyq ózenderdi paıdalaný jaǵynan kelisimderimiz bar. Sol kelisimshartqa baılanysty Talas ózeni 50/50 mólsherinde, al Shý ózeni 42/58 paıyz bólingen. Sondyqtan, ár jyldyń óziniń sýlylyǵyna baılanysty sý kólemi bólinedi. Bizdiń taraptan ony kóterý máselesin biz qarastyryp jatqan joqpyz. Sebebi naqty paıyzdyq mólsheri bar», - deıdi ol.
Mınıstrdiń sózinshe, Ortalyq Azıadaǵy bes memleket 1992 jyly týra sondaı kelisim jasaǵan. Sol kelisimde burynǵy Keńes odaǵyndaǵy sý qalaı bólinedi – týra sondaı kólem rastalǵan.
«Atap aıtqanda, Syrdarıa ózeninde sý kóp bolsa, bizge Qazaqstanǵa 12 tekshe shaqyrym sý beriledi. Sondyqtan, bul jumystar tek kelissózder arqasynda atqarylyp jatyr», - deıdi Nurjigitov.
Eske sala keteıik, Nurjan Nurjigitov sý resýrstary jáne ırrıgasıa mınıstri qyzmetine bıyl qyrkúıekte taǵaıyndalǵan edi.
