Túrkimenstan bıligi jańa prezıdent Serdar Berdimuhamedovten jańa kúlt jasaýǵa barynsha tyrysyp jatyr. Máselen, Balqan ýálaıatynda memleket basshysyna arnalǵan oda óleńderge baıqaý jarıalandy.
Jeńimpazdarǵa úlken syılyq beriledi dep ýáde etip otyr deıdi Azatlyk radıosynyń batys óńirdegi tilshisi.
Bul jaıynda tilshige habarlaǵan búdjettik mekeme qyzmetkeri baıqaýdy jergilikti bilim jáne mádenıet basqarmasy uıymdastyryp otyrǵanyn aıtqan.
"Jergilikti bılik ýálaıat aqyndaryna úmit artyp otyr. Olar unaǵan óleńge án jazyp, respýblıka deńgeıinde hıt jasaýǵa ýáde etip otyr. Osylaı prezıdent aldynda óńirdiń bedelin kótergisi keledi",- deıdi aty-jónin jasyrǵan bilim salasynyń qyzmetkeri.
Taıaýda ǵana bul óńirge resmı saparmen barǵan prezıdent jańa aýrýhananyń tusaýyn kesken. Derekkózdiń aıtýynsha, sol kezde jańa basshyǵa ózin qoshemetpen kútip alý deńgeıi unamaǵan. Endi jergilikti bılik sonyń ornyn jabý úshin, prezıdentti madaqtaýǵa arnalǵan jyr baıqaýyn ótkizip jatyr.
Bıyl Túrkimenstanda naýryz aıynda kezekten tys "prezıdent saılaýy ótip", Gýrbangýly Berdimuhamedov óziniń ornyn 40 jastaǵy ulyna qaldyryp ketken.
