Tiri bolsam, qazaqqa qyzmet etpeı qoımaımyn!

Álıhan Bókeıhan

"Halqynyń namysyn qorǵaǵan Janbolatty jazalaýǵa tegis qazaqtardyń qatysýy - ulttyq topastyq" - Depýtat Ermurat Bapı

11 mamyr 2024 1169

Keńes odaǵynyń týyn alaýlatyp-jalaýlatyp Almaty kóshelerimen alyp júrgenderdiń týyn julyp alǵan qoǵam belsendisi Janbolat Sháızada bes táýlikke qamalǵanyn habarlaǵan edik. Bul jaǵdaıǵa qatysty Májilis depýtaty Ermurat Bapı ótkir oı aıtyp, batyl pikir bildirdi, dep habarlaıdy Alash.KZ ulttyq portaly.

Depýtat Janbolat Sháızadany ustaýǵa pármen bergen polısıa bastyǵyn synap, qazaqtyń ulttyq qasıetin kareraǵa aıyrbastap jiberýge daıyndar jandaıshaptarǵa shúılikti: 

Prokýratýradaǵy paryqsyz oryndaýshy qalalyq polısıaǵa Janbolatty ustap ákelińder dep komanda beredi (erteń el ne deıdi, qazaq qoǵamy tolqyp ketedi-aý degen oı topas mıyna kirmeıdi); Qazaqı ulttyq qasıetin karera úshin aıyrbastap jiberýge jandármen bolǵan polısıa bastyǵy Janbolatty ustap ákelýge eki serjantty jumsaıdy (izdestirip jatyrmyz, qaladan syrtqa shyǵyp ketipti dep, beıkúná jigitti qutqaryp qalýǵa qam qylarlyq qasıetten jurdaı); Eki serjant Janbolatty dedektetip, ákimshilik sotqa alyp keledi (úıinde joq eken, izdep taba almaı júrmiz dep aıta almaıdy - syılyqtan qaǵylýy múmkin); Saıasatqa saldaqy bolǵan sot (sot emes - mot) Janbolatty bes kúnge qamaýǵa qaýly shyǵarady (shyǵarmasam, ózim shyǵarylam degen qorqynysh ulttyq namysyn taptap tastaǵan)!

Keıinnen qazaq halqynyń memlekettigin qorǵap, ulttyq minez kórsetker azamatty jazalaýǵa qatysqan tegis qazaqtardyń qylyǵyn synǵa aldy: 
 
Mine, halqynyń memlekettik namysyn qorǵap, ulttyq minez kórsetken jigitti jazalaýǵa qatysqandar - tegis qazaqtar! Osyny ulttyq topastyq demeske laj bar ma?! Bárin qoıalyqshy, jandaıshap jantyqtar bilgen boǵyn jesin! Biraq Janbolat Shaızadaǵa jasalǵan osy qıamet qıanattan keıin ulttyq patrıotızm týraly, qazaqı qasıetti qorǵaýǵa qatysty azamattyq paryzdyń porsha-porshasy shyqpaı ma?! Janbolatty ozbyrlarǵa jyǵyp bergen mynaý soraqylyqty kórgen qaı qazaqtyń balasy erteń el namysy úshin janqıarlyqqa bara alady?! Qudaı-aý, óz ultynyń namysyn ózeýregen ózgeden qorǵaı almaıtyn, qorǵaǵandy - qor qylatyn, bas kótergendi abaqtyǵa aıdaıtyn mundaı masqaralyq qazaqtan basqa qaı elde bar eken?! - dedi depýtat.
 
Eske sala keteıik, 9 mamyr kúni áleýmettik jelide er adamnyń Almaty kóshesinde kólikke ilingen Sovet odaǵynyń týyn alyp, kóliktegi adamdarmen sózge kelip qalǵany beınelengen vıdeo tarady. Janbolat Sháızadanyń aıtýynsha, oqıǵa 9 mamyrda kúndiz bolǵan. Ol SSSR-dyń týyn jelbiretip júrýdi el birligine syna qaǵyp, "arandatý" áreketi dep sanaıtynyn jetkizdi.

Janbolat Sháızada Reseıdiń Ýkraınaǵa basqynshylyǵy osyndaı arandatýshy áreketterden bastalǵanyn atap ótip, istegen isin durys sanaıtyndyqtan oǵan ókinbeıtinin, jasaǵanyn moınymen kóterýge daıyn ekenin de habarlady.

Májilis depýtaty Abzal Quspan KSRO týymen sherýge shyqqandarǵa qarsy bolǵan almatylyq Janbolat Shaızadany qoldaýǵa shaqyrdy.

Janbolattaı ultqa tirek, elge kerek azamattardy qoldamaı tynysh otyrýǵa taǵy bolmaıdy. Sonda ne istemek kerek? Menińshe, qoldanystaǵy ákimshilik kodekske bóten, basqa eldiń memlekettik sımvolıkasyn qoǵamdyq oryndarda ruqsatsyz paıdalanǵany úshin bólek jaýapkershilik qarastyrý kerek. Sonda biz osyndaı provokasıalyq áreketterdiń aldyn alǵan bolar edik. Áıtpese, SSSR-diń týyn jelbiretip júrgenderdiń áreketi zańdy, al oǵan tosqaýyl qoıamyz deýshilerdiń áreketi zańsyz bolýy ádilettilik qaǵıdatyna qaıshy, – dep jazady ol.

Oraıy kelgende aıta keteıik, jyl saıynǵy Jeńis kúninde egemen eldiń aspanynda ózge sıpattaǵy nyshandardy kóteretinder kózge túsedi. Keńestik kezdegi ulttyq qundylyqtardyń janshylyp, ult tiliniń túgesilýi, qazaq tildi mektepterdiń jabylýy, asharshylyq pen ult zıalylaryn qýalaý syndy qıyndyqtar tán sovettik ımperıanyń saıasatyn aıyptaıtyndar bul qubylysty quldyq sanamen, otarlaýshylyqty jaqtaýmen, qazaq halqyna jasalǵan genosıtti beısana qoldaýmen baılanystyryp jatady. 

 

Bul maqala týraly ne oılaısyz?