Tiri bolsam, qazaqqa qyzmet etpeı qoımaımyn!

Álıhan Bókeıhan

Ult kósemi: Qazaqtyń oqyǵan azamattary, qazaqqa osyndaıda qyzmet etpegende, qashan qyzmet etip, paıdamyzdy tıgizemiz?

22 mamyr 2024 318

Maıdanda naýqastanǵan jigitterdi Zemskı soıýzdyń maıdandaǵy aýrýhanalaryna jiberedi. Onda doktorlar, feldsherler qazaqsha,aýyrǵan jigitter oryssha bilmeıdi. Drýjınadaǵy jigitterdiń óz arasynan qoıylǵan tilmáshtar jóndi til bilmegen soń, aýrýdyń jaıyn jetkizip aıta almaıdy. Bul jaıdy jetkizgen soń, Zemskı soıýz bizge: "tez ózderiń doktorlaryńdy, feldsherlerińdi taýyp berińder, biz olardy ózderińniń qazaqtaryna qoıalyq",- deıdi.

Beretin aılyq aqshasy: doktorlarǵa jalovanıe aıǵa 300-350 som, kıimge 400 som (bir ret beriledi), rashodyna 90 som, páter soıýzdan, jol júrisi aqshasyz.

Feldsherlerge jalovanıe 190 som, kıimdik 200 som, basqa jaǵy doktorlardiki sıaqty.

Joǵarǵy qyzmetterge barýǵa tilegen azamattar Ǵalı hanǵa telegram bersin: Mınsk, Zemgorsoıýz, front, Býkeıhanový.

Bizdiń ótinish qazaq doktorlar, feldsherler osyǵan kelýi. Biz doktor, feldsherlerdi shaqyrǵaly, gazetke jazǵaly birtalaı ýaqyt boldy, bul kúnge sheıin kelgen, ıakı kelemin degen bir kisi bolmaı tur.

Qazaqtyń oqyǵan azamattary, qazaqqa osyndaıda qyzmet etpegende, qashan qyzmet etip, paıdamyzdy tıgizemiz?

Kisi tez kerek. Talapker perevodshıkter joǵarǵy adreske hám "Qazaq" basqarmasyna telegramm bersin.

Álıhan BÓKEIHAN

"Qazaq" gazeti, №221, 09.03.1917 jyl. Mınski

Derekkóz: Bókeıhan Á. Shyǵarmalary. IX tom.- Astana, 2018

Alash.kz ulttyq portaly

Bul maqala týraly ne oılaısyz?