Tiri bolsam, qazaqqa qyzmet etpeı qoımaımyn!

Álıhan Bókeıhan

"Uldaryn armıaǵa jibermeýge shaqyramyn!". "Jumbaq jaǵdaıda" komaǵa túsken sarbazdyń anasy kómekke zárý

24 mamyr 2024 261

Almatydaǵy Ulttyq ulannyń 5571 bóliminde byltyr qulap komaǵa túsken, bıyl sáýirde oıanǵan sarbaz Erbaıan Muhtarlyny týǵan-týystary Astanaǵa jetkize almaı otyr.

“Barmaǵan jerim, baspaǵan taýym joq”

Erbaıannyń anasy Gúlsim Qamıeva men ájesi Kúlásh Smaıylova Qazaqstan prezıdenti Qasym-Jomart Toqaev pen Joǵarǵy sotqa, Qazaqstan halqyna taǵy úndeý jarıalady. Gúlsim Qamıevanyń uly – qatardaǵy jaýynger Erbaıan Muhtar byltyr mamyrda merzimdi áskerı qyzmetke alynǵan. 2023 jyldyń 4 jeltoqsanynda túnde Almatydaǵy Ulttyq ulannyń №5571 bólimindegi dárethanada qulap, bas-mıynyń ashyq jaraqatyn alǵan. Ortalyq klınıkalyq aýrýhanasynyń anyqtamasy boıynsha, sarbazdyń bas súıegi jarylyp, jelke súıegi synǵan, aýyr mı jaraqatyn alǵan. Áskerı bólim «sarbaz dárethanada ózi qulap, basyn kafelge soǵyp aldy» degen. Erbaıan Muhtardyń ákesi de, sheshesi de bul nusqaǵa senbeıdi deıdi UlysMedıa.

– Armıada shekten shyqqan jaıttar bolyp jatyr. Erbaıan komadan shyqqannan keıin biz ony palataǵa aýystyrǵymyz kelgen. Biraq ony qalaıda birden áskerı gospıtálge aýystyryp jiberdi. Ol jaqta Erbaıan ekinshi ret komaǵa túsip qaldy. Ne sebepti ony saýyqqansha qalalyq 12-shi aýrýhanada qaldyrmady? Erbaıan esin jısa, bolǵan jaıttyń bárin aıtyp beredi dep qoryqty ma? Men kópbalaly ana retinde analardyń bárin de uldaryn armıaǵa jibermeýge shaqyramyn! – deıdi ol.

Gúlsim Qamıeva alty aı boıy ádilettilikti izdep, barmaǵan jerimiz, baspaǵan taýymyz joq deıdi. 

– Kináli adamdar jazasyn alsyn dep talap etemin! Soǵan senem! Meniń ulymdy Astanaǵa jetkizýge kómektesińizdershi! Oǵan kútim men em kerek! Eger osy jaqta emdeı almasa, shetelge emdeıtin jaǵdaı kerek! Kámeletke tolmaǵan úsh balamdy Astanaǵa qaldyryp, Almatyda júrmin. Materıaldyq ta, moraldyq da jaǵdaıymyz nasharlap ketti. Ana retinde maǵan kómektesýdi suraımyn, – deıdi ol.

“Ádeıi sozyp otyr ma dep qorqamyn”

Gúlsim Qamıeva resmı sanavıasıa Erbaıan úshin barmaıtynyn, jolaı bolsa alyp ketetinderin aıtqan. 

– Bular ádeıi sozyp otyr ma dep oılaımyn. Óıtkeni 27 mamyrda balanyń áskerı borysh merzimi bitedi. Sanavıasıamen barǵannyń ózinde “nege ruqsat berdińiz, erteń jolda ne bolatynyn bilmeısiz ǵoı. Jolda birdeńe bolsa, dem jetpeı qalsa, sizge jabýy múmkin” degen sybysty estidim. Jala jabyla ma dep te qorqamyn, – deıdi anasy Gúlsim.

Bul maqala týraly ne oılaısyz?