Tiri bolsam, qazaqqa qyzmet etpeı qoımaımyn!

Álıhan Bókeıhan

Týrızm mınıstri Býrabaıdaǵy qonaqúı áıeline tán ekenin aıtty

14 mamyr 2024 245

Týrızm jáne sport mınıstri Ermek Marjyqpaev Býrabaıda áıeliniń qonaqúıleri baryn moıyndady. Mınıstr óz laýazymy áıeliniń bıznesine yqpaly bolmaıdy dep esepteıdi, dep habarlaıdy alash.kz.

Marjyqpaev ne deıdi

Úkimettiń baspasóz ortalyǵynda jýrnalıser mınıstrden týǵan-týystarynyń bıznesi jaıly suraq qoıǵan. Bul saýal Marjyqpaevqa buryn da qoıylǵan edi.

– Buǵan deıin meniń ol jaıly aıtqanym bar. Memlekettik qyzmetke kelgen 2008 jylǵa deıin biz bıznespen aınalysqanbyz. Ol kásiporynǵa bıyl 30 jyl bolady. Men memlekettik qyzmetke kelgenge deıin ol kásip orny damydy, – dedi ol.

Jýrnalıser mınıstrden bul turǵyda múddeler qaqtyǵysy bolmaı ma dep suraǵan. 

– Ol jaqtaǵy shaǵyn otelder men mınıstrdiń jumysynda qandaı múddeler qaıshylyǵy bolýy múmkin. Ony qalaı elestetesiz. Qalaısha? Men olaı eseptemeımin, – deıdi Marjyqpaev.

Áıeliniń bıznesi jaıly

Áńgime bul jerde “Bereke-Býrabaı” qonaqúıler jelisi jaıly bolyp otyr dep jazady Ulysmedia.kz.

"Bereke" sanatorıı-kýrorttyq kesheniniń úlken aýmaǵy kórkem ekologıalyq kýrorttyq aımaqta ornalasqan. Basqa qalalardan kelýshilerge temirjol vokzalynan "Bereke" sanatorııine deıin avtomobıl joly bar. Qonaq úıdiń jarnamasynda jaıly bólmeler, jaıly ınterer jáne qyzmetkerlerdiń sapaly qyzmeti jaıly jazylady. Onda biregeı emdik qasıetteri bar mıneraldy sýda ǵana jumys isteıtin sý emhanasynyń qyzmetteri bary da aıtylady.

Buǵan deıin de suraq qoıylǵan

Týrızm jáne sport mınıstri Ermek Marjyqpaev "týrızm salasynda týystaryńyz jumys isteı me?" degen suraqqa jaýap bergen edi. 

Eske sala keteıik, bir jyl buryn Aqmola oblysy ákimi kezinde jýrnalıs Ashat Nıazovqa bergen suhbatynda Ermek Marjyqpaev týystarynyń atynda jer baryn, olar sharýashylyqpen aınalysatynyn aıtqan edi. Sol suhbatynda Marjyqpaev áıeli de bıznespen aınalysatynyn málim etken. “Agrobıznes te bar” degen edi ol.

Bul maqala týraly ne oılaısyz?