Dúısenbi, 18 sáýirge qaraǵan túni Túrkıa áskeri Iraktyń soltústiginde Kúrdistan jumysshy partıasynyń (KJP) qarýly toptaryna qarsy jańa operasıa bastady. Bul týraly Túrkıanyń qorǵanys mınıstrligi habarlady.
Aldymen Túrkıanyń áskerı ushaqtary men artılerıasy KJP-ǵa tıesili nysanalarǵa shabýyl jasaǵan, odan keıin shekara túbindegi aýmaqqa jaıaý ásker kirgen. Bul týraly Túrkıa qorǵanys mınıstri Hýlýsı Akar málimdedi.
Akardyń sózinshe, Túrkıa áýe kúshteri KPJ-ǵa tıesili jasyryn oryndar, býnkerler, úńgirler, qarý-jaraq qoımalary men shtab-páterge "sátti" shabýyldaǵan. Biraq ol bul operasıaǵa qansha sarbaz ben ushaq jumyldyrylǵanyn aıtpady. Iraktyń soltústik bóliginde ornalasqan kúrd qarýly toptary áli eshqandaı málimdeme jasamady.
Keıingi ondaǵan jylda Túrkıa kúshteri KPJ-ǵa qarsy áýeden shabýyldap, qurlyqta birtalaı transshekaralyq operasıa júrgizgen. Túrkıa qorǵanys mınıstriniń málimdeýinshe, osy shabýyl Iraktyń Metına, Zap jáne Avashın-Basán deıtin úsh aýdanyn qamtyǵan.
1984 jyly KPJ Túrkıanyń kúrdter kóp turatyn ońtústik-shyǵys bóliginde partızandyq is-qımyldar bastaǵannan beri ondaǵan myń adam qaza tapty. Túrkıa, AQSH jáne Eýropadaǵy birqatar el KPJ-ny terror uıymy dep tanyǵan.
